“Manompoa An’i Jehovah Amin’ny Fifaliana”
1 Nanoratra toy izao ny apostoly Paoly: “Mifalia hatrany ao amin’ny Tompo, eny, hoy indray aho: Mifalia!” (Fil. 4:4) Voninahitra ho antsika ny mitory ny vaovao tsara sy manampy ireo olona toy ny ondry hanompo an’i Jehovah, ary mitondra fifaliana lehibe izany. (Lioka 10:17; Asa. 15:3; 1 Tes. 2:19) Inona anefa no tokony hataontsika raha tsy mahita fifaliana amin’ny fanompoana isika indraindray?
2 Asa ampanaovin’Andriamanitra: Tadidio fa i Jehovah no naniraka antsika hitory. Voninahitra ho antsika tokoa ny ho “mpiara-miasa amin’Andriamanitra”, rehefa mitory ny hafatra momba ilay Fanjakana sy manao mpianatra. (1 Kor. 3:9) Miaraka amintsika i Jesosy Kristy, amin’ity asa tsy hiverina intsony ity. (Matio 28:18-20) Manampy koa ny anjely, ka miara-miasa amintsika amin’ilay asa fijinjana ara-panahy atao amin’izao fotoana izao. (Asa. 8:26; Apok. 14:6) Asehon’ny Soratra Masina fa manohana an’io asa io i Jehovah, ary manaporofo izany koa ny zavatra niainan’ny vahoakan’Andriamanitra. Mandeha mitory àry isika, satria “nirahin’Andriamanitra sy eo ambany masony ary tafaray amin’i Kristy.” (2 Kor. 2:17) Tena antom-pifaliana tokoa izany!
3 Tena ilaina ny vavaka mba hahitana fifaliana hatrany eny amin’ny fanompoana. (Gal. 5:22) Tsy ho vitantsika ny asan’Andriamanitra raha tsy noho ny heriny. Mila mangataka ny fanahiny àry isika, satria manome izany malalaka an’izay mangataka aminy izy. (Lioka 11:13; 2 Kor. 4:1, 7; Efes. 6:18-20) Raha mivavaka momba ny fanompoantsika isika, dia hanana toe-tsaina tsara foana, na dia tsy mandray tsara aza ny olona. Hanampy antsika izany mba hazoto sy ho faly hatrany amin’ny fitoriana.—Asa. 4:29-31; 5:40-42; 13:50-52.
4 Manomàna tsara: Fomba tena mandaitra hampitomboana ny fifaliana hitantsika eny amin’ny fanompoana ny fanomanana tsara. (1 Pet. 3:15) Tsy voatery hitaky fotoana be izany. Minitra vitsy monja no ilaina mba hamerenana ireo fomba fanolorana gazety na fomba fampiseho mety ho an’ny boky tianao hatolotra. Raha mitady fampidiran-dresaka mety ianao, dia jereo ny boky Fanjohian-kevitra na Ny Fanompoantsika Ilay Fanjakana teo aloha. Misy mpitory sasany nanoratra fomba fitory fohy tamin’ny taratasy kely. Manopy maso kely an’iny fotsiny izy ireo, dia tadidiny ilay izy. Manjary tsy matahotahotra izy, ka afaka mitory amim-pahasahiana.
5 Maro ny soa entin’ny fifaliana. Manintona kokoa ny hafatra entintsika raha falifaly isika. Manampy antsika hiaritra koa ny fifaliana. (Neh. 8:10; Heb. 12:2) Ny tena zava-dehibe aza dia hoe, manome voninahitra an’i Jehovah ny fanompoana ataontsika amim-pifaliana. Aoka àry isika ‘hanompo an’i Jehovah amin’ny fifaliana.’—Sal. 100:2.
[Fanontaniana]
1. Inona no mitondra fifaliana lehibe ho an’ny mpanompon’i Jehovah?
2. Iza no naniraka antsika hitory, ary nahoana ny fieritreretana izany no mahafaly antsika?
3. Nahoana no ilaina ny vavaka mba hahitantsika fifaliana hatrany amin’ny fanompoana an’Andriamanitra?
4. Nahoana no mampitombo ny fifaliana hitantsika amin’ny fitoriana ny fanomanana tsara, ary ahoana no azontsika anaovana izany?
5. Inona avy no soa entin’ny fifaliana?