Mamafaza Be, dia ho Tondraka ny Valisoa
1 Tsy andrintsika rehetra ny hahatanterahan’ireo faminaniana tena tsara ao amin’ny Tenin’Andriamanitra. Mitahy antsika be dia be anefa i Jehovah, na dia ankehitriny aza, ary mampitombo ny fifaliantsika izany. Miankina be dia be amin’ny ezaka ataontsika anefa ny soa raisintsika. Nilaza ny apostoly Paoly fa ‘izay mamafy be, dia be no hojinjainy.’ (2 Kor. 9:6) Mandiniha fomba roa azo ampiharana io toro lalana io.
2 Ny fanompoantsika: Mitondra valisoa lehibe ny fitoriana ny vaovao tsara, na rahoviana na rahoviana ahafahantsika manao izany. (Ohab. 3:27, 28) Mendri-piderana ireo mamafy be amin’ny fanitarana ny fanompoany. Misy, ohatra, manao ny asan’ny mpisava lalana mpanampy na maharitra. Mamafy be isika rehetra, rehefa tsy manao an-tsirambina ny fiverenana any amin’izay olona liana rehetra sy manolotra fampianarana Baiboly, raha azo atao. (Rom. 12:11) Raha miezaka manao izany isika, dia hahita zavatra mampahery ary ho faly kokoa eny amin’ny fanompoana.
3 Fanohanana ilay Fanjakana: Nampifandraisin’i Paoly ny fanomezana sy ny ‘famafazana be.’ (2 Kor. 9:6, 7, 11, 13) Maro ny zavatra azontsika atao amin’izao andro izao, mba hanohanana ilay Fanjakana. Afaka manome ny herintsika sy ny volantsika isika. Azontsika atao ny manampy amin’ny fanorenana Efitrano Fanjakana sy Efitrano Fivoriambe. Azontsika atao koa ny manolo-tena hanadio sy hikojakoja ireny toeram-pivavahana ireny. Afaka manome vola koa isika mba hisahanana ny fandanian’ny fiangonana eo an-toerana, ary ny asa fitoriana sy fampianarana maneran-tany. Hahafaly antsika rehetra tokoa ny hahita ny fitahiana tondraka arotsak’i Jehovah amin’io asa nanendreny io, raha samy manao ny anjarantsika avy isika!—Mal. 3:10; Lioka 6:38.
4 Mampirisika antsika ‘hanao soa sy hanankarena amin’ny asa tsara ary hazoto hanome sy hiantra’ ny Tenin’Andriamanitra. Hahazo fitahiana tondraka isika dieny izao, raha manaraka izany torohevitra izany. Ankoatra izany, dia ‘hihary fanorenana tsara ho an’ny tenantsika ho amin’ny andro ho avy isika, mba hihazonantsika ny tena fiainana.’—1 Tim. 6:18, 19.