Inona no Zava-dehibe Indrindra Aminao?
1 Fikambanana ara-pivavahana maro no mihevitra fa zava-dehibe ny manao asa soa, toy ny fanorenana sekoly na hopitaly. Ny fanampiana ny olona eo amin’ny lafiny ara-panahy anefa no zava-dehibe indrindra amin’ny Vavolombelon’i Jehovah, na dia tsy manadino “hanao soa sy hiantra” aza izy ireo.—Heb. 13:16.
2 Ohatra tamin’ny taonjato voalohany: Nanao asa soa betsaka i Jesosy nandritra ny fanompoany teto an-tany. Ny fanambarana ny marina anefa no asa lehibe indrindra nataony. (Lioka 4:43; Jaona 18:37; Asa. 10:38) Nandidy ny mpanara-dia azy izy mba ‘handeha, ka hanao mpianatra ny firenena rehetra.’ (Matio 28:19, 20) Nilaza koa izy fa hanitatra ny asa natombony ireo mino azy. (Jaona 14:12) Ny fitoriana no asa lehibe indrindra tamin’i Jesosy, satria manampy ny olona hahafantatra ny lalan’ny famonjena izy io.—Jaona 17:3.
3 Tsapan’ny apostoly Paoly fa asa “tsy maintsy” atao, na tsy azony nialana, ny asa fitoriana. (1 Kor. 9:16, 17) Vonona hanao sorona sy hiaritra ny fisedrana sy ny zava-tsarotra rehetra izy, mba hanatanterahana ny fanompoany. (Asa. 20:22-24) Nanana toe-tsaina nitovy tamin’izany koa ny apostoly Petera sy ny mpiara-miasa taminy. “Tsy nitsahatra nampianatra sy nitory an’i Jesosy ho Kristy isan-andro” izy ireo, na dia nogadraina sy nokapohina aza.—Asa. 5:40-42.
4 Ary isika? Ny fitoriana ny vaovao tsaran’ilay Fanjakana sy ny fanaovana mpianatra ve no zava-dehibe indrindra amintsika? Tena miahy an’ireo ‘nampahantraina ka nafoy toy ny ondry tsy misy mpiandry’ ve isika, toa an’i Jesosy? (Matio 9:36) Hita mazava tsara amin’ny zava-miseho maneran-tany sy ny faminanian’ny Baiboly, fa kely sisa dia tsy hisy intsony ity tontolo ratsy ity! Hazoto hitory hatrany isika raha mitadidy fa zava-dehibe ny asa fitoriana.
5 Diniho ny fiainanao: Matetika no miova ny fiainantsika tsirairay. Tsara àry indraindray ny hijerentsika, raha misy fanovana azontsika atao, mba hahafahantsika handray anjara bebe kokoa amin’ny asa fitoriana. Mpisava lalana maharitra foana ny anabavy iray nanomboka tamin’ireo taona 1950 ka hatramin’ireo taona 1970. Narary izy, taorian’izay, ka voatery nijanona tsy nanao io asa io. Nihasalama anefa izy, rehefa nandeha ny fotoana. Nodinihiny indray ny fiainany vao haingana, ka hitany fa afaka miverina ho mpisava lalana izy. Faly be mihitsy izy satria afaka nanatrika ny Sekolin’ny Fanompoan’ny Mpisava Lalana, tamin’izy 90 taona! Ary ianao? Efa hisotro ronono ve ianao sa efa hahavita fianarana? Hiova izao ny fiainanao, ka afaka hanao ny asan’ny mpisava lalana ve ianao?
6 Hitan’i Jesosy fa “sahirana tamin’ny fanompoana be” i Marta. Nilaza taminy tamin-katsaram-panahy àry i Jesosy hoe handray valisoa lehibe kokoa izy, raha manatsotra ny fiainany. (Lioka 10:40-42) Afaka manatsotra ny fomba fiainanao ve ianao? Tena mila miasa daholo ve ianareo mivady? Raha manova ny fomba fiainanareo ianareo, ka ny iray ihany no miasa, hahavelona ny fianakaviana ve izany? Maro no nandray soa ara-panahy, rehefa nanao fanovana mba handraisana anjara bebe kokoa amin’ny fanompoana.
7 Enga anie isika rehetra hanaraka ny ohatra navelan’i Jesosy sy ny apostoly! Tena hotahin’i Jehovah isika, raha miezaka amim-pahatsorana manao izay vitantsika amin’ny asa fitoriana ny vaovao tsaran’ilay Fanjakana.—Lioka 9:57-62.