Ny Fanompoana Kristianina no Asantsika Lehibe Indrindra
1 Manana asa isan-karazany tsy maintsy atao isika rehetra. Tsy maintsy mamelona ny ankohonantsika isika, araka ny didin’Andriamanitra. (1 Tim. 5:8) Tsy tokony ho lasa lehibe kokoa noho ny asa fitoriana ilay Fanjakana sy fanaovana mpianatra anefa izany.—Matio 24:14; 28:19, 20.
2 Namela ohatra ho antsika i Jesosy raha ny amin’ny ‘fikatsahana ilay fanjakana.’ (Matio 6:33; 1 Pet. 2:21) Nifantoka tanteraka tamin’ny fanaovana ny sitrapon’ny Rainy izy, na dia tsy nanankarena firy aza. (Lioka 4:43; 9:58; Jaona 4:34) Niezaka nitory izy, isaky ny afaka nanao izany. (Lioka 23:43; 1 Tim. 6:13) Nampirisika ny mpianany hifantoka tanteraka tamin’ny asa fijinjana koa izy.—Matio 9:37, 38.
3 Manahafa an’i Jesosy: Afaka manahaka ny ohatr’i Jesosy isika, ka hiezaka hanana fiainana tsotra, izay mifantoka tanteraka amin’ny fanompoana kristianina. Raha efa manana izay tena ilaina eo amin’ny fiainana isika, dia aoka hanaraka ilay torohevitry ny Baiboly hoe tsy tokony hanohy hanangona ny harenan’ity tontolo ity. (Matio 6:19, 20; 1 Tim. 6:8) Tsara lavitra raha mitady fomba handraisana anjara bebe kokoa amin’ny asa fitoriana isika! Raha miaritra zava-tsarotra isika, dia aoka hiezaka toa an’i Jesosy, mba tsy hamela ny fanahiana ho lasa zava-dehibe kokoa noho ilay asantsika lehibe indrindra, dia ny fitoriana ny vaovao tsaran’ilay Fanjakana.—Lioka 8:14; 9:59-62.
4 Na dia ireo manana andraikitra maro aza, dia manao ny asa fitoriana ho loha laharana. Maro anaka sy be andraikitra amin’ny asany ny rahalahy iray, ary anti-panahy, nefa hoy izy: “Ny fanompoana no tena anton’asako.” Hoy ny anabavy iray mpisava lalana: “Ambony lavitra noho ny asa tsara eto amin’ity tontolo ity ny asan’ny mpisava lalana.”
5 Aoka isika hanahaka ny ohatr’i Jesosy, na inona na inona tarehin-javatra misy antsika. Amin’ny fomba ahoana? Ny fanompoana kristianina no ataontsika ho asantsika lehibe indrindra.