Taratasy avy Amin’ny Sampana

Ry mpitory ilay Fanjakana,

“Andriamanitra no tsy nitsahatra nampitombo.” (1 Kor. 3:6) Tena mampientam-po ny mahita ny fandrosoana eto Madagasikara! Fampianarana Baiboly vaovao 7 000 mahery no natomboka nandritra ny taom-panompoana 2003. Tena mendri-koderaina izany.

Mitahy ny asa eny amin’ny saha i Jehovah. Noho izany, dia Efitrano Fanjakana sy Efitrano Fivoriambe maro no ilaina. Tena faly isika rehetra fa nahazo lalana tamin’ny Filan-kevi-pitantanana isika hanorina Efitrano Fanjakana mahazaka Fivoriambe. Dimy ny isan’izy ireo, ary efa misy roa vita sahady any Fianarantsoa sy Toliara. Hanomboka tsy ho ela ny asa any Antalaha, ary amin’ny hoavy ny any Ambatondrazaka sy Mahajanga.

Manana Efitrano Fivoriambe isika eto Antananarivo, any Antsirabe, Antsiranana, Fianarantsoa, ary Toliara. Tsy ankasitrahantsika rehetra tokoa ve izany fitahian’i Jehovah izany? Efitrano Fanjakana maro be koa no efa voaorina, ka azo anaovana fivoriamben’ny faritra sy manokana, ankoatra ny fivoriana ataon’ny fiangonana. Toy izany, ohatra, ny any Maevatanana sy Ambohimandroso. Misaotra an’i Jehovah isika noho ireny fanomezana tena tsara ireny.

Amin’izao fanombohan’ny taom-panompoana 2004 izao, dia mivavaka amin’i Jehovah miaraka aminareo izahay, mba ‘tsy hitsaharany hampitombo’ ny vokatra.

Ireo rahalahinareo,

Biraon’ny Sampana eto Madagasikara