Miezaha ho Tonga Sakaizan’i Jehovah
1 Niaiky ny anabavy kristianina iray hoe: “Roapolo taona aho izao no tao amin’ny fahamarinana, ary fahazarana tamiko fotsiny ny nivory sy nanompo teny amin’ny saha.” Manohy ny teniny anefa izy hoe: ‘Hitako fa tsy ampy mba hiatrehana zava-manahirana ny fivoriana sy ny fanompoana, na dia zava-dehibe aza. Tsapako izao fa tsy maintsy manitsy ny fomba fisainako sy manomboka manao fandaharam-pianarana tsara aho, mba hahafahako hahalala tsara an’i Jehovah sy ho tia azy ary hankasitraka izay nomen’ny Zanany antsika.’
2 Mitaky ezaka ny fananana fifandraisana akaiky amin’i Jehovah. Tsy ampy fotsiny ny manao asa kristianina tsy tapaka. Raha mahalana isika vao miresaka amin’i Jehovah, dia ho lasa toy ny namantsika akaiky taloha, izay tsy ifandraisantsika intsony izy, amin’ny farany. (Apok. 2:4) Andeha àry hodinihintsika hoe nahoana ny fianarana samirery ny Baiboly sy ny vavaka no manampy antsika ho tonga sakaizan’i Jehovah.—Ohab. 3:32.
3 Tena ilaina ny vavaka sy ny fisaintsainana: Tsy ampy fotsiny ny manipika ny hevitra fototra sy mijery ny andinin-teny voatonona ao amin’ny lahatsoratra ianarana, raha tiana hisy vokany tsara eo amin’ny fo ny fianarana samirery. Ilaintsika ny misaintsaina hoe inona no asehon’ilay fanazavana momba ny lalan’i Jehovah sy ny fitsipiny ary ny toetrany. (Eks. 33:13) Manohina ny fontsika ny fahatakarantsika zavatra ara-panahy, ka manosika antsika handinika ny fiainantsika. (Sal. 119:35, 111) Ny hanatona an’i Jehovah no tokony ho zava-kendrena amin’ny fianarana samirery. (Jak. 4:8) Ilana fotoana sy toerana mety ny fianarana tsara. Ilaina koa ny mifehy tena raha te hanao azy io tsy tapaka. (Dan. 6:11) Na dia be atao aza ianao, moa ve ianao manokana fotoana isan’andro hisaintsainana ny toetra mahatalanjon’i Jehovah?—Sal. 119:147, 148; 143:5.
4 Tena ilaina ny vavaka avy amin’ny fo, raha te hanao fianarana samirery tsara. Mila ny fanahy masin’Andriamanitra isika raha tiantsika hanohina ny fontsika ny fahamarinana ara-baiboly, ka hanosika antsika ‘hanao fanompoana masina ho an’Andriamanitra, amin’ny fahatahorana sy ny fanajana.’ (Heb. 12:28) Tokony hangataka ny fanahin’i Jehovah àry isika alohan’ny hianarana. (Matio 5:3) Mila mamboraka izay ao am-pontsika amin’i Jehovah koa isika, rehefa misaintsaina ny Soratra Masina sy mianatra ny boky sy gazety omen’ny fandaminany. (Sal. 62:8) Anisan’ny fanompoana an’i Jehovah ny fanaovana izany. Asehontsika amin’izany fa mifikitra aminy isika sady manamafy ny fifandraisantsika aminy.—Joda 20, 21.
5 Toy ny fifandraisana rehetra, dia tsy maintsy kolokolointsika foana ny fifandraisantsika amin’i Jehovah, mba hihamafy hatrany mandritra ny androm-piainantsika. Aoka àry isika hanararaotra tsara ny fotoana isan’andro mba hanatonana an’Andriamanitra, satria hanatona antsika izy raha manao izany isika.—Sal. 1:2, 3; Efes. 5:15, 16.
[Fanontaniana]
1. Inona no tsapan’ny anabavy iray momba ny fahazarany nanao zavatra ara-panahy?
2. Nahoana no zava-dehibe ny iezahana ho tonga sakaizan’i Jehovah?
3. Inona no ilaintsika hatao rehefa mianatra samirery, mba hanatonantsika an’Andriamanitra?
4. Nahoana no manampy antsika hisakaiza amin’i Jehovah ny vavaka, alohan’ny fianarana samirery?
5. Nahoana no zava-dehibe ny hisaintsainantsika ny Tenin’Andriamanitra isan’andro?