Sakafo Ara-panahy Amin’ny Fotoana Mety
1 “Hataoko vokatra ny vary, ary tsy hanaterako mosary intsony hianareo”, hoy i Jehovah Tompo Fara Tampony. (Ezek. 36:29) Mihatra amin’ny vahoakan’Andriamanitra ankehitriny ireo teny ara-paminaniana ireo. Nataon’i Jehovah tondraka ho an’ny vahoakany ny sakafo ara-panahy, izay oharina amin’ny vary. Mampiseho mazava izany ny sakafo ara-panahy tonga ara-potoana, izay homena antsika any amin’ny fivoriamben’ny vondrom-paritra.
2 Nasain’i Jehovah nandray ilay anarana hoe Vavolombelon’i Jehovah ny mpanompony, tamin’ny fivoriambe natao tany Columbus, (Ohio), tamin’ny 1931. (Isaia 43:10-12) Fantatra tsara ny vahoaka be resahin’ny Apokalypsy 7:9-17, tamin’ny 1935. Nanao ilay lahateny hoe “Haharitra ve Ilay Fiadanana?” ny Rahalahy Knorr, tamin’ny 1942. Nandrisika ho amin’ny asa fitoriana maneran-tany io lahateny io, ary nahatonga ny fiforonan’ny Sekoly Ara-baibolin’i Gileada An’ny Tilikambo Fiambenana. Tena miavaka ka tsy hay hadinoina ny fivoriambe sasany, kanefa samy manome sakafo ara-panahy tondraka sady tonga ara-potoana ny fivoriambe rehetra.—Sal. 23:5; Matio 24:45.
3 Mazoto homana ve ianao? Mety ho mosarena isika na dia eo am-pototry ny sakafo aza, raha toa ka tsy miezaka ny hihinana. (Ohab. 26:15) Toy izany koa ny amin’ny sakafo ara-panahy. Voamarika mantsy tany amin’ny fivoriambe vitsivitsy, fa maro no nandehandeha na niresaka fotsiny tamin’ny namany nandritra ny fandaharana. Marina fa ilaina ny mifampahery mandritra ny fivoriambe, kanefa aloha sy aorian’ny fandaharam-pivoriana no tokony hanaovana izany. (Mpit. 3:1, 7) Mety hisy hevi-dehibe tsy ho voaraintsika, raha tsy mipetraka sy mihaino tsara isika. Indraindray dia mety hisy raharaha mahakasika ilay fivoriambe hitan’ireo mpiandraikitra sy ny rahalahy voatendry, fa tena ilaina horesahina mandritra ny fandaharana. Tokony hihaino tsara izy ireo mba ho ohatra ho an’ny hafa, raha tsy misy raharaha maika hokarakarainy. Tsy misy amintsika afaka hieritreritra hoe tsy maninona na dia tsy arahintsika aza ny fandaharana sasany.—1 Kor. 10:12; Fil. 2:12.
4 Faly erỳ isika mahazo ny sakafo ara-panahy tondraka omen’i Jehovah, tsy mba toy ny ao amin’ny Kristianisma Anarana. (Isaia 65:13, 14) Asehontsika fa mahay mankasitraka isika, raha mahay manararaotra ny fampianarana omen’i Jehovah mandritra ny fivoriambe. (Kol. 3:15) Koa mifantoha amin’ny lahateny fa tsy amin’ny mpandahateny, ary raiso ho toy ny avy amin’ilay “Mpampianatra” antsika ilay hafatra. (Isaia 30:20, 21; 54:13) Mihainoa tsara. Mandraisa an-tsoratra fohy an’ireo hevi-dehibe. Jereo indray ireo hevitra nisongadina tao amin’ilay fandaharana, amin’ny hariva. Ampiharo izay ianaranao.
5 Faharesena ho an’i Satana ny fivoriambe rehetra atao alohan’ny Hara-magedona, na any amin’ny tobin’ny mpitsoa-ponenana no anaovana azy, na any amin’ny tany rotidrotiky ny ady, na any amin’ny toerana tsy misy ady! Tafaray isika fianakavian’ny mpirahalahy, ka mankamamy ny fahafahana hiaraka any amin’ny fivoriamben’ny vondrom-paritra. (Ezek. 36:38) Matoky isika fa mbola hanome ‘sakafo amin’ny fotoana mety’ indray i Jehovah, satria tia antsika izy.—Lioka 12:42.
[Fanontaniana]
1. Ahoana no ahatanterahan’ny Ezekiela 36:29 ankehitriny?
2. Ahoana no nampiasan’i Jehovah ny fivoriamben’ny vondrom-paritra mba hanomezana sakafo ara-panahy tonga ara-potoana?
3. Inona no tsy maintsy ataontsika mba handraisana soa amin’ny fanasam-be ara-panahy any amin’ny fivoriambe?
4. Ahoana no ampisehoantsika fa mahay mankasitraka ny sakafo ara-panahy omen’i Jehovah isika?
5. Inona avy no antony mahafaly antsika any amin’ny fivoriamben’ny vondrom-paritra?
[Efajoro, pejy 4]
Mahaiza Mankasitraka ny Latabatr’i Jehovah
◼ Mihainoa tsara
◼ Raiso an-tsoratra ny hevi-dehibe
◼ Jereo indray ny hevitra nisongadina, amin’ny hariva
◼ Ampiharo izay ianaranao