Varavarana Misokatra ho Amin’ny Asa ny Sekoly Fampiofanana ho Amin’ny Fanompoana
1 Hoy i Jehovah, tamin’ny alalan’i Jeremia mpaminany: “Hanendry mpiandry ho [an’ny oloko] Aho, ka dia hiandry azy ireo; ka tsy hatahotra na hivadi-po intsony izy, sady tsy hisy tsy ho voavory.” (Jer. 23:4) Mandray soa avy amin’io asa fiandrasana io ny olona avy amin’ny firenena rehetra, ankehitriny. Anti-panahy an’aliny no manatanteraka izany, eo anivon’ny fiangonana. Maro koa ny tanora mazoto manolo-tena hanompo an’i Jehovah. (Sal. 110:3) Tena fitahiana ho an’ny fiangonan’ny vahoakan’Andriamanitra tokoa ireny rahalahy manetry tena ireny! Mitohy ny asa fanangonana ondry. Mbola ilaina àry ny lehilahy mahafeno fepetra sy vonona hanompo ny rahalahiny.
2 Natao hampiofanana anti-panahy sy mpanampy amin’ny fanompoana mpitovo hiantsoroka andraikitra fanampiny, ny Sekoly Fampiofanana ho Amin’ny Fanompoana. Mpianatra 22 000 mahery no efa voaofana hatramin’ny 1987, taona nanombohan’io fandaharana tsara dia tsara io. Avy amin’ny firenena 140 eo ho eo izy ireo, ary nizara ho kilasy 999. Tena “varavarana misokatra ho amin’ny asa” tokoa ilay sekoly, ho an’ireo rahalahy ireo. (1 Kor. 16:9) Faly àry izahay mampahafantatra anareo fa neken’ny Filan-kevi-pitantanana ny hanaovana io sekoly io amin’ny teny malagasy. Amin’ity volana Aprily 2005 ity no hatao ny kilasy voalohany. Hitondra fitahiana ho an’ny saha eto amintsika tokoa izany!
3 Tanjona: Ny hampiofana sy hanampy ireo rahalahy hahay hiantsoroka andraikitra any amin’izay ilana fanampiana, no tanjon’ilay sekoly. Amin’izay dia hitombo ny fahaizan’izy ireo mitarika ny asa fitoriana ny vaovao tsara, miandry ny andian’ondry, ary mampianatra eo anivon’ny fiangonana. Tendrena ho mpisava lalana manokana na mpiandraikitra mpitety faritany ao amin’ny taniny, na any an-tany hafa, ny mpianatra sasany rehefa mahazo diplaoma. Ny hafa kosa tendrena hiara-manompo amin’ny fiangonana misy azy ihany, na any amin’ny toerana ilana fanampiana bebe kokoa ao amin’ny taniny.
4 Mandalina ny Baiboly ny mpianatra, mandritra ny roa volana. Hodinihin’izy ireo akaiky ireo fampianarana ara-baiboly maro be, ny andraikitry ny mpiandry, ary ny toro lalana mahakasika ny fomba hiatrehan’ny Kristianina olana. Hianarany koa izay lazain’ny Soratra Masina momba ny fitantanan-draharaha, raharaham-pitsarana, ary ny fomba fandaminan-javatra. Hahazo fampiofanana manokana eo amin’ny fomba fanaovana lahateny izy ireo. Hahazo fanampiana koa ny tsirairay mba handroso haingana kokoa.
5 Fepetra takina: Tsy mahagaga raha ambony ny fepetra takina mba hanatrehana an’ilay sekoly. Tsy maintsy ho efa anti-panahy na mpanampy amin’ny fanompoana nandritra ny roa taona misesy, fara fahakeliny, ireo manao fangatahana. Tokony ho mpitovo avokoa izy ireo, ary eo anelanelan’ny 23 sy 50 taona. Tokony hahay hamaky sy hanoratra, ary hiteny misosa tsara ny teny malagasy izy ireo, ary tokony ho salama tsara sy tsy hila fikarakarana na fitandreman-tsakafo manokana. Ny mpisava lalana manokana sy maharitra no hofidina voalohany.
6 Tokony ho vonona sy ho afaka hanompo any amin’izay toerana ilana azy, ireo manolo-tena. Izany dia mitaky toe-tsaina toy ny an’i Isaia mpaminany, izay nanolo-tena avy hatrany hanao asa manokana. Hoy izy: “Inty aho, iraho aho.” (Isaia 6:8) Nanetry tena koa izy nandritra ny androm-piainany. Ny fitiavana ireo rahalahiny sy ny faniriana hanompo azy no tokony hanosika an’ireo manao fangatahana hanatrika ilay sekoly, fa tsy ny faniriana hahazo toerana ambony. Antenaina hampihatra izay nianarany ny mpianatra, rehefa avy mandray izany fampiofanana tsara dia tsara izany, mba handraisan’ny hafa soa.—Lioka 12:48.
7 Soa azo: “Mivelona amin’ny tenin’ny finoana sy ny tenin’ny fampianarana tsara” ireo mpianatra, mandritra ireo roa volana ampiofanana azy. (1 Tim. 4:6) Amin’izay izy ireo dia ho afaka hanampy sy hampahery ny hafa eo anivon’ny fiangonana sy ny faritra anendrena azy. Nitombo ny fanompoana teny amin’ny saha, tany amin’ny toerana maro nanendrena ireo nahazo diplaoma tamin’ny Sekoly Fampiofanana ho Amin’ny Fanompoana. Nampirisihina hanao ny fanompoan’ny mpisava lalana koa ny mpitory, indrindra fa ny tanora, ary nanehoana fiheverana bebe kokoa ireo vaovao.
8 Anti-panahy na mpanampy amin’ny fanompoana mpitovo ve ianao, sady eo anelanelan’ny 23 sy 50 taona? Nahoana raha manao fangatahana hanatrika ny Sekoly Fampiofanana ho Amin’ny Fanompoana? Rahalahy tanora ve ianao, ary mbola misaintsaina ny tanjona tianao hotratrarina eo amin’ny fanompoana an’i Jehovah? Nahoana raha hazonina ho tsotra sy tsy misy fanelingelenana ny fiainanao, mba hahafahanao hiditra ao amin’io “varavarana misokatra ho amin’ny asa” io? Tena ho faly sy ho afa-po ianao, raha manao izany. Tsy ireo mpianatra nahazo diplaoma ihany anefa no mandray fitahiana amin’ilay sekoly, fa ny fiangonan’ny vahoakan’Andriamanitra maneran-tany koa.
9 Azonay antoka fa tena hampandroso ny saha eto amintsika io fandaharana io. Efa 200 mahery sahady izao ny fangatahana eto am-pelatananay, ary hokarakarainay miandalana izy ireny. Kasaina hasiana kilasy roa amin’ity taona 2005 ity. Hisy kilasy telo fanampiny, fara fahakeliny, amin’ny taona 2006. Ampirisihinay àry ny anti-panahy sy mpanampy amin’ny fanompoana mpitovo rehetra, mba hivavaka momba an’io fampiofanana avy amin’i Jehovah io.
[Teny notsongaina, pejy 4]
Nahasoa Azy Ireo Ilay Sekoly
“Lasa tena havanana amin’ny fampiasana ny Soratra Masina aho eny amin’ny fanompoana sy eo amin’ny asa fiandrasana, noho iny fampiofanana iny.”
“Matoky tena kokoa aho izao rehefa miantsoroka ireo andraikitro samihafa eo anivon’ny fiangonana, noho iny sekoly iny.”
“Saika nanova ny lafiny rehetra teo amin’ny fiainako izy iny, anisan’izany ny fiheverako ny fandaharan’Andriamanitra sy ny fandaminany.”
“Nanjary takatro fa mila manolo-tena hanompo any amin’izay ilana fanampiana aho, noho ny fampiofanana azoko.”