Mitoria Amin’ny Olona Maro Araka Izay Azo Atao
1 Niezaka mafy nampiely ny hafatra momba ilay Fanjakana ireo mpianatr’i Jesosy voalohany. Nampiasa fomba mandaitra izy ireo, mba ho maro araka izay azo atao ny olona nandre ny vaovao tsara. Ny ampahany tamin’ny Soratra Masina nosoratan’izy ireo, dia nataony tamin’ny fiteny grika tsotra, izay niraisan’ireo firenena nofehezin’ny Romanina. Ireo mpitory be zotom-po tamin’ny taonjato faharoa sy fahatelo koa angamba no nampiasa voalohany ny kôdeksa. Mora nampiasaina kokoa noho ny horonana izy io, rehefa nitady ireo andininy.
2 Fampiasana ny teknolojia: Hoy i Jehovah tamin’ny alalan’i Isaia mpaminany: “Hinono amin’ny jentilisa [na ny firenena] hianao.” (Isaia 60:16) Tanteraka io faminaniana io ankehitriny, satria mampiasa fitaovana tena tsara vokarin’ireo firenena ny mpanompon’i Jehovah, mba hampandrosoana ny asa fitoriana. Tamin’ny 1914, ohatra, fony mbola tsy nampiasaina hitadiavam-bola firy ny sarimihetsika misy feo, dia efa nampiseho ilay “Fampisehoana An-tsary ny Famoronana” ny Mpianatra ny Baiboly. Sarimihetsika sy sary maharitra adiny valo izy io, ary miloko sady misy feo. Fitaovana nahomby nitoriana tamin’ny olona an-tapitrisany izy io.
3 Mampiasa milina fanontam-pirinty haingam-pandeha sy ordinatera ny vahoakan’Andriamanitra ankehitriny, mba hamoahana Baiboly sy boky aman-gazety ara-baiboly amin’ny fiteny an-jatony. Haingam-pandeha koa ny fitaovam-pitaterana itondrana ireny boky aman-gazety ireny any amin’ny faritra lavitra amin’ny tany, hany ka mahare ny vaovao tsara ny olona any amin’ny tany 235. Ampirisihin’i Jehovah amin’ny alalan’ny fanahiny ny mpanompony, mba hampiasa tsara ny teknolojia. Noho izany, dia betsaka noho ny hatramin’izay ny olona mahalala ny fahamarinana ara-baiboly.
4 Fiovana ataon’ny tsirairay: Nanao fiovana koa ireo tena mpivavaka, mba hitoriana ny vaovao tsara amin’olona maro kokoa. Maro no nanatsotra ny fiainany mba hitoriana bebe kokoa. Ny sasany nifindra toerana mba hanompo any amin’izay ilana mpitory ilay Fanjakana maro kokoa. Ny hafa indray nianatra fiteny vahiny mba hampitomboana ny fanompoany.
5 Ankoatra izany, dia maro kokoa no handre ny vaovao tsara, raha mitory amin’ny fotoana maha ao an-trano ny olona, sy eny amin’ny toerana falehan’ny olona isika. Raha tsy ao an-trano matetika ny olona eo amin’ny faritaninao mandritra ny andro, azonao ovana ve ny fandaharam-potoananao mba hitoriana amin’ny takariva? Misy toerana falehan’ny olona azonao itoriana ve? Efa nanandrana nitory tamin’ny faritany be toeram-piasana ve ianao? Mitady fomba hitoriana tsy ara-potoana ve ianao?
6 Voninahitra lehibe ho antsika tokoa ny manambara ny anaran’i Jehovah sy ny Fanjakany! Enga anie àry isika hanohy hitory amin’ny olona maro araka izay azo atao, mba hahafantaran’izy ireo ny fahamarinana ara-baiboly izay manome fiainana.—Matio 28:19, 20.
[Fanontaniana]
1. Inona no nataon’ireo Kristianina voalohany, mba hampahafantarana ny vaovao tsara tamin’ny olona maro araka izay azo atao?
2, 3. a) Ahoana no ahatanterahan’ny Isaia 60:16 ankehitriny? b) Ahoana no ampiasana ny teknolojia mba hampandrosoana ny fivavahana madio?
4. Inona no fiovana nataon’ny sasany, mba hitoriana ny vaovao tsara amin’olona maro kokoa?
5, 6. Inona no azo atao, mba hitoriana amin’ny olona maro araka izay azo atao eto amin’ny faritanintsika?