Fandaharana Vaovaon’ny Fivoriamben’ny Faritra
Tena zava-dehibe ny tsy hanariantsika mihitsy ny fitafiantsika ara-panahy sy ny hitadidiantsika foana fa Kristianina isika, mandritra ny andro faran’izao tontolo ratsy sady tranainy izao. (Apok. 16:15) Mety àry raha ny hoe “Tafio ny Toetra Vaovao” no foto-kevitry ny fivoriamben’ny faritra, amin’ny taom-panompoana 2006.—Kol. 3:10.
Andro voalohany: Hasongadin’ilay lahateny mifampitohy voalohany hoe “Manehoa An’ireo Lafiny Samihafa Amin’ny Toetra Vaovao”, fa handray soa amin’ny lafiny rehetra amin’ny fiainantsika isika raha mitafy ny toetra vaovao. Ahoana no hitafiantsika ny toetra vaovao? Hodinihina ao amin’ireo lahateny roa farany amin’ny andro voalohany izany. Izao avy no lohatenin’izy ireo: “Mifeheza Tena mba Hisaintsaina Araka ny Tokony ho Izy” sy “Fampianarana Mamolavola ny Toetra Vaovao.”
Andro faharoa: Misy heriny eo amin’ny fomba ampiasantsika ny lelantsika ny toetra vaovao. Izany no hodinihina ao amin’ilay lahateny mifampitohy faharoa hoe “Miezaha Hanana ny Lelan’ny Hendry.” “Mandresy An’ilay Ratsy ve Ianao?” no foto-kevitry ny lahateny ho an’ny besinimaro, izay hanazava fa ilaina ny ho mailo hatrany amin’ireo paikadin’i Satana. Hanampy antsika hanalavitra ny fihetsika sy fitondran-tena mifanipaka amin’ny lalana marin’Andriamanitra ireo lahateny roa farany, sady hanampy antsika tsy hiala mihitsy amin’ny fanompoana an’i Jehovah. Ny lohatenin’izy ireo dia hoe “Arovy ny Tenanao Tsy ho Voapentimpentin’izao Tontolo Izao” sy “Havaozy Isan’andro ny Toetranao.”
Tsy andrintsika izay hahazoana izany fampirisihana antsika hitafy hatrany ny toetra vaovao izany!