Ampio ny Hafa ho Tonga ‘Mpankatò Amin’ny Fo’
1 Tena ilaina ny mankatò an’i Jehovah mba hanekeny ny fivavahantsika. (Deot. 12:28; 1 Pet. 1:14-16) Tsy ho ela dia hihatra amin’ireo “tsy mahalala an’Andriamanitra sy izay tsy mankatò ny vaovao tsara”, ny didim-pitsarany. (2 Tes. 1:8) Ahoana no hanampiantsika ny hafa ho tonga ‘mpankatò amin’ny fo’ ny fampianaran’ny Tenin’Andriamanitra?—Rom. 6:17.
2 Ampio izy hanana finoana sy fitiavana: Mifandray akaiky ny fankatoavana sy ny finoana, ao amin’ny Soratra Masina. Niresaka an’izany ny apostoly Paoly, rehefa nilaza ny amin’ny “didin’ilay Andriamanitra mandrakizay, mba hisian’ny fankatoavana avy amin’ny finoana.” (Rom. 16:26) Maro amin’ireo olona nanam-pinoana, voatanisa ao amin’ny Hebreo toko faha-11, no nanao zavatra nifanaraka tsara tamin’ny sitrapon’i Jehovah. (Heb. 11:7, 8, 17) Mifandray kosa ny tsy fankatoavana sy ny tsy finoana. (Jaona 3:36; Heb. 3:18, 19) Tokony hianatra hampiasa tsara kokoa ny Tenin’Andriamanitra àry isika, mba hanampiana ny hafa hanana ilay finoana hahatonga azy ho mpankatò.—2 Tim. 2:15; Jak. 2:14, 17.
3 Mifandray koa ny fankatoavana sy ny fitiavana an’Andriamanitra. (Deot. 5:10; 11:1, 22; 30:16) Hoy ny 1 Jaona 5:3: “Izao no fitiavana an’Andriamanitra, dia ny itandremantsika ny didiny. Tsy mavesatra anefa ny didiny.” Ahoana no hanampiantsika ny mpianatra Baiboly mba ho tia an’i Jehovah? Mitadiava fomba hampirisihana azy hankasitraka bebe kokoa ireo toetran’i Jehovah, rehefa mianatra ianareo. Lazao aminy fa tena tia an’Andriamanitra ianao. Ampio izy haniry hifandray tsara amin’i Jehovah. Ambonin’izany, ny fitiavana an’i Jehovah dia hanosika antsika sy ny hafa hankatò azy amin’ny fo.—Matio 22:37.
4 Aoka isika ho modely: Ny modely omentsika dia fomba mandaitra handrisihana ny hafa hankatò ny vaovao tsara. Tokony hanao ezaka mitohy anefa isika, mba ho tonga ‘mpankatò amin’ny fo.’ (Rom. 6:17; Ohab. 4:23) Inona avy no tafiditra amin’izany? Fenoy zavatra tsara foana ny fonao, amin’ny fianarana Baiboly sy fanatrehana fivoriana tsy tapaka. (Sal. 1:1, 2; Heb. 10:24, 25) Miaraha amin’ireo olona manompo an’i Jehovah amin’ny fo manontolo. (Ohab. 13:20) Manompoa tsy tapaka, ary ampitomboy ny fanirianao hanampy ny olona ao amin’ny faritaninao. Mivavaha mba hanampian’i Jehovah anao hanana fo tsara. (Sal. 86:11) Halaviro izay mety hanimba ny fonao, toy ny fialam-boly misy fitondran-tena maloto na herisetra. Ataovy izay hanatsarana ny fifandraisanao amin’Andriamanitra sy hahatonga anao ho akaiky kokoa azy.—Jak. 4:7, 8.
5 Nomen’i Jehovah toky ny vahoakany fahiny, fa hotahiny izy ireo raha nihaino ny feony. (Deot. 28:1, 2) Omeny fitahiana tondraka toy izany koa ankehitriny, ireo “mankatò azy amin’ny maha mpitondra azy.” (Asa. 5:32) Enga anie àry isika hanampy ny hafa ho tonga mpankatò amin’ny fo, amin’ny alalan’ny fampianarantsika sy ny modely omentsika.
[Fanontaniana]
1. Inona no takin’i Jehovah amin’ireo mpivavaka aminy?
2. Nahoana no tena ilaina ny manampy ny hafa hanana finoana matanjaka?
3. a) Ahoana no ifandraisan’ny fankatoavana sy ny fitiavana? b) Ahoana no hanampiantsika ny mpianatra Baiboly mba ho tia an’i Jehovah?
4. a) Nahoana no zava-dehibe ny modely omentsika? b) Inona no tokony hataontsika mba ho tonga ‘mpankatò amin’ny fo’?
5. Ahoana no itahiana ireo mpankatò?