Ambarao ny Voninahitr’i Jehovah
1 Hoy ny mpanao salamo: “Mihirà ho an’i Jehovah, ry tany rehetra. ... Ambarao any amin’ny jentilisa ny voninahiny, ary any amin’ny firenena rehetra ny fahagagana ataony.” Manjary te hanambara ny voninahitr’i Jehovah isika, rehefa misaintsaina ny zavatra nataony ho antsika sy izay ataony ary mbola hataony.—Sal. 96:1, 3.
2 Eny amin’ny fanompoana: Voninahitra ho an’ny Vavolombelon’i Jehovah ny mitondra ny anaran’Andriamanitra, sy midera izany ampahibemaso hatraiza hatraiza. (Mal. 1:11) Mifanohitra tanteraka amin’izany ireo mpitondra fivavahana ao amin’ny Kristianisma Anarana! Sahy nanala ny anaran’Andriamanitra tao amin’ny fandikan-tenin’ny Baiboliny mantsy izy ireo. Tena ilaina maika anefa ny mampahafantatra ny anaran’Andriamanitra. Tsy maintsy mino sy miantso an’io anarana io mantsy ny olona, mba ho voavonjy amin’ilay fahoriana lehibe ho avy. (Rom. 10:13-15) Miankina amin’ny fanamasinana ny anaran’Andriamanitra koa ny fiadanana manerana izao rehetra izao, anisan’izany ny fiadanana eto an-tany. Misy ifandraisany amin’ny anarany tokoa ny asany rehetra.
3 “Lehibe Jehovah ka miendrika hoderaina indrindra.” Tsy maintsy mahalala ny marina momba azy anefa ny olona, vao afaka ‘hanome azy ny voninahitry ny anarany.’ (Sal. 96:4, 8) Misy anefa milaza hoe tsy misy Andriamanitra. (Sal. 14:1) Manaratsy azy ho tsy mahavita na inona na inona ny sasany, na milaza fa tsy miraharaha ny olombelona izy. Manome voninahitra an’i Jehovah isika, rehefa manampy ireo tso-po hahafantatra ny marina momba ny Mpamorona antsika sy ny fikasany ary ireo toetrany mahatehotia.
4 Amin’ny fitondran-tenantsika: Manome voninahitra an’i Jehovah isika rehefa manaraka ny fitsipiny marina. Voamariky ny olona ny fitondran-tena tsarantsika. (1 Pet. 2:12) Mety hidera antsika, ohatra, izy ireo, rehefa mahita antsika madio sy milamina. Azontsika hararaotina izany, mba hiresahana momba ny soa azo rehefa arahina ny toro lalan’ny Tenin’Andriamanitra. (1 Tim. 2:9, 10) Faly erỳ isika rehefa ‘mahita ny asa tsara ataontsika [ny olona], ka manome voninahitra ny Raintsika izay any an-danitra’!—Matio 5:16.
5 Enga anie ny tenintsika sy ny ataontsika hankalaza isan’andro an’ilay Andriamanitsika tsara indrindra. Hamaly an’ity antso ity isika amin’izay: “Mihirà ho an’i Jehovah, misaora ny anarany; lazao isan-andro isan-andro ny famonjeny mahafaly.”—Sal. 96:2.