Fampianarana Hahazoana Fiainana
1 Sambatra erỳ ianao rehefa mahita olona dibo-kafaliana, noho izy nanjary nahatakatra ny fahamarinana ao amin’ny Tenin’Andriamanitra! Mahafa-po tokoa ny mampianatra ny olona ny fahalalana an’Andriamanitra sy ny fikasany. Mety hahazoany fiainana mandrakizay izany fampianarana izany.—Jaona 17:3.
2 Sarobidy kokoa: Tsy tambo isaina ankehitriny ny fomba enti-mampianatra sy ny zavatra ampianarina. (Mpit. 12:12) Tsy afaka mifampitaha amin’ny “asa lehibe nataon’Andriamanitra” anefa ireny fahalalana ireny. (Asa. 2:11) Nahatonga ny olona hanatona an’Andriamanitra sy hahalala ny fikasany ve ny fampianarana avy amin’ity tontolo ity? Nanampy azy ireo hahatakatra izay mitranga amin’ny olona maty, na ny mahatonga izao fijaliana be dia be izao ve izy io? Nahatonga azy ireo hanana fanantenana, na nanatsara ny fiainam-pianakaviany ve izy io? Tsia. Ny fampianarana avy amin’Andriamanitra ihany, no afaka manampy antsika hahita ny tena valin’ireo fanontaniana lehibe indrindra eo amin’ny fiainana.
3 Manjaka eto amin’ity tontolo ity ny fahalotoam-pitondran-tena. Manampy ny olona ho tsara fitondran-tena kokoa anefa ny fampianarana avy amin’Andriamanitra. Tsy misy fanavakavaham-bolon-koditra sy fanindrahindrana foko na firenena intsony, ao am-pon’ireo manaiky sy mampihatra ny fampianaran’ny Tenin’Andriamanitra. (Heb. 4:12) Lasa manalavitra ny karazana herisetra rehetra izy ireo, ary ‘mitafy ny toetra vaovao.’ (Kol. 3:9-11; Mika 4:1-3) An-tapitrisany koa ny olona nanjary nanan-kery handresena fanao sy toetra tsy tian’Andriamanitra, izay efa tena raiki-tampisaka taminy.—1 Kor. 6:9-11.
4 Ilaina maika ankehitriny: Milaza amintsika ilay Mpampianatra Lehibe Indrindra, fa miavaka ny vanim-potoana iainantsika. Mahakasika antsika ankehitriny ny didim-pitsarana nolazainy mialoha, ka tsy maintsy ambara maneran-tany. (Apok. 14:6, 7) Efa manjaka any an-danitra i Kristy, hofoanana tsy ho ela ny fivavahan-diso rehetra, ary efa vonona handrava ny fitondram-panjakana rehetra eto an-tany ny Fanjakan’Andriamanitra. (Dan. 2:44; Apok. 11:15; 17:16) Ilain’ny olona maika àry ny manaiky an’ilay Mpanjaka notendren’Andriamanitra. Mila mivoaka ao amin’ny Babylona Lehibe koa izy ireo, ary miantso ny anaran’i Jehovah amim-pinoana. (Sal. 2:11, 12; Rom. 10:13; Apok. 18:4) Enga anie isika handray anjara betsaka araka izay azo atao amin’ilay fampianarana hahazoana fiainana.