Aoka Ianao Hiahy ny Olona ka Mahaiza Manontany sy Mihaino
1 Tia milaza ny heviny ny ankamaroan’ny olona, nefa tsy tia tenitenenina na adinadinina be. Tokony hahay hametraka fanontaniana àry isika mpitory kristianina, mba hamantarana ny hevitry ny olona.—Ohab. 20:5.
2 Tsy tokony hahasadaikatra ny olona ny fanontaniantsika, fa tokony hampirisika azy hieritreritra. Manontany toy izao, ohatra, ny rahalahy iray rehefa mitory isan-trano: “Araka ny hevitrao, hifanaja ve ny olona indray andro any?” Hoy izy avy eo, arakaraka ny valin-tenin’ilay olona: “Inona no hitanao hoe ilaina mba hisian’izany?” na “Nahoana ianao no milaza an’izany?” Rehefa mitory tsy ara-potoana sy eny amin’ny toerana falehan’ny olona ny rahalahy hafa iray, dia manontany toy izao amin’ny olona manan-janaka: “Inona no tena tianao amin’izany hoe manan-janaka izany?” Manontany izy avy eo hoe: “Inona no tena mampanahy anao indrindra?” Mariho fa mahatonga ny olona hilaza ny heviny ireo fanontaniana ireo, nefa tsy mahasadaikatra azy. Samihafa ny tarehin-javatra misy ny olona ao amin’ny faritanintsika. Azontsika ovaovana àry ny fanontaniana sy ny fomba ametrahana izany.
3 Avelao ny olona hilaza ny heviny: Henoy tsara izay lazain’ny olona, rehefa te hilaza ny heviny izy, fa aza tapatapahina tsy amin’antony. (Jak. 1:19) Isaory amin-katsaram-panahy izy noho ny teniny. (Kol. 4:6) Afaka milaza fotsiny ianao hoe: “Misaotra anao nilaza izany, fa mahaliana ilay izy.” Derao amim-pahatsorana izy raha mety ny hanaovana izany. Mametraha fanontaniana hafa mba hahalalana ny heviny sy ny antony hiheverany toy izany, ary aoka ianao ho tsara fanahy. Mitadiava marimaritra iraisana. Afaka milaza toy izao ianao, rehefa te hisarika ny sainy ho amin’ny andinin-teny iray: “Mety ho vahaolana ve ity aminao?” Aza manizingizina ny hevitrao na mila ady.—2 Tim. 2:24, 25.
4 Mety hiankina be dia be amin’ny fomba hihainoantsika ny olona no hamaliany ny fanontaniantsika. Ho tsapan’ny olona raha mihaino azy tsara isika, na tsia. Hoy ny mpiandraikitra mpitety faritany iray: “Tena mora voasarika hiresaka aminao ny olona, rehefa asehonao fa vonona hihaino azy tsara ianao. Fomba tsara azonao ampisehoana koa izany fa tena miahy azy ianao.” Manaja ny hafa isika rehefa mihaino azy. Mety hahatonga azy hihaino ny vaovao tsara torintsika izany.—Rom. 12:10.