‘Manaraha Ahy Mandrakariva’
1 Olona maro no tsy manao afa-tsy izay mahafinaritra ny tenany, nefa mbola tsy sambatra ihany. Nilaza kosa i Jesosy fa tena ho sambatra isika raha mazoto manome. (Asa. 20:35) Hoy izy: “Raha misy te hanaraka ahy, aoka izy handa ny tenany ... ary hanaraka ahy mandrakariva.” (Marka 8:34) Inona no dikan’izany? Tsy ampy ny mampandefitra tsindraindray ny zavatra sasany mahafinaritra antsika. Izay hampifaliana an’i Jehovah kosa no imasoantsika isan’andro, fa tsy izay hahafaly ny tenantsika.—Rom. 14:8; 15:3.
2 Diniho, ohatra, ny apostoly Paoly. Tsy nitady laza na fahefana intsony izy, fa nanokan-tena hampandroso ny asan’ilay Fanjakana. Tsapany mantsy fa “tsy misy toa azy ny hasarobidin’ny fahalalana an’i Kristy Jesosy.” (Fil. 3:7, 8) Hoy izy: “Raha ny amiko, dia ho faly tokoa aho hanome izay rehetra ananako sy hanao sorona tanteraka ny fiainako.” (2 Kor. 12:15) Tokony hanontany tena àry isika tsirairay hoe: ‘Ahoana no ampiasako ny fotoanako, ny heriko, ny fahaizako, ary ny fananako? Miezaka mampifaly an’i Jehovah ve aho, sa mitady izay hahasoa ny tenako fotsiny?’
3 Fomba ahafahana manome: Manokana ora maherin’ny arivo tapitrisa isan-taona ny vahoakan’Andriamanitra, mba hanaovana ilay asa mamonjy aina, dia ny fitoriana ilay Fanjakana. Mitondra soa ho an’ny hafa koa ireo asa sy anjara samihafa ataon’ny antitra sy ny tanora, eo anivon’ny fiangonana. Ankoatra izany, dia eo ireo asa maro mifandray amin’ny fivoriambe, miampy ny asa fanorenana sy fikojakojana ireo trano natao hampandrosoana ny fivavahana marina. Saintsaino koa ny fanampiana feno fitiavana omen’ireo rahalahy anisan’ny Komity Mifandray Amin’ny Hopitaly sy ny Antokona Mpamangy Marary. Sarobidy amin’ireo rahalahintsika kristianina ireny ezaka feno fahafoizan-tena rehetra ireny!—Sal. 110:3.
4 Afaka manampy ny hafa amin’ny fomba samihafa koa isika, rehefa misy loza mitranga na toe-javatra ilana vonjy. Matetika kokoa anefa isika no mahita mpiara-manompo mila fanampiana na fampaherezana. (Ohab. 17:17) Manaraka ny ohatra navelan’i Jesosy isika, rehefa vonona hanompo ny hafa sy hampandroso ny asan’ilay Fanjakana. (Fil. 2:5-8) Enga anie isika hiezaka mafy mba hanao izany mandrakariva.