Aoka Ianao Hiahy ny Olona ka Derao Izy
1 Mampahery sy mandrisika hanao zavatra ary mahafaly ny teny fiderana avy amin’ny fo. Hitan’ny mpitory maro fa matetika no mihaino antsika ny olona, rehefa midera azy amin’ny fo isika, na dia amin’ny teny kely fotsiny aza. Ahoana àry no azontsika iderana ny olona itoriantsika ny vaovao tsara?
2 Mahaiza mandinika: Nandinika ny asa tsaran’ireo fiangonana fito tany Azia Minora i Jesosy Kristy rehefa niverina tany an-danitra, ka nidera azy ireo. (Apok. 2:2, 3, 13, 19; 3:8) Handinika izay zavatra azo iderana ny olona itoriantsika koa isika, raha tena miahy azy. Afaka midera azy, ohatra, isika raha mahita fa madio tsara ny tokotaniny, na maneho fitiavana an-janany izy, na koa mitsikitsiky sy sariaka rehefa miarahaba antsika. Mandinika haingana ny zavatra toy ireny ve ianao, ka manararaotra izany mba hiderana an’ilay olona?
3 Mihainoa tsara: Mametraha fanontaniana tsy mahasanganehana, izay handrisika ny olona itorianao hilaza ny heviny. Manehoa fanajana azy, ka henoy tsara izay lazainy. (Rom. 12:10) Azo inoana fa ho azonao hararaotina mba hiderana azy ny zavatra sasany lazainy. Ho afaka hahita zavatra iombonana aminy ianao amin’izay, mba hanohizana ny resaka.
4 Mahaiza mandanjalanja: Inona no tokony hataontsika, raha tsy mifanaraka amin’ny fahamarinana ara-baiboly ny zavatra lazain’ilay olona? Aza miady hevitra aminy, fa isaory izy satria nilaza ny heviny. Afaka milaza, ohatra, ianao avy eo hoe: “Hitako fa nandinika lalina momba an’izany ianao.” (Kol. 4:6) Matetika isika no afaka midera an’ilay olona noho izy tena liana amin’ilay foto-kevitra, na dia miady hevitra amintsika aza izy. Mety hihamalefaka ny olona iray, izay toa manohitra mafy ny vaovao tsara, raha malemy fanahy toy izany isika.—Ohab. 25:15.
5 Tokony ho avy amin’ny fo ny teny fiderana lazaintsika, mba hisy vokany tsara. Hanome voninahitra an’i Jehovah isika raha manao teny mampahery toy izany, ary mety handrisika ny olona hihaino ny hafatra momba ilay Fanjakana.