Mamelombelona ny Teny Fiderana
1 “Izaho angaha tsy hendry androany?”, hoy ilay zazavavy kely nifokofoko tao am-pandriana. Tsy nampoizin’ny reniny ilay fanontaniana. Hitany fa niezaka mafy erỳ ilay zanany mba ho hendry, kanefa tsy nilaza na dia teny fankasitrahana indraim-bava aza izy. Io zazavavy kely nitomany io dia tokony hampahatsiahy antsika fa mila teny fiderana isika rehetra, na tanora na antitra. Manao teny fankasitrahana izay mamelombelona ny hafa ve isika, rehefa manao zavatra tsara izy ireo?—Ohab. 25:11.
2 Betsaka ny antony tsara hanaovana teny fiderana an’ireo namantsika kristianina. Miasa mafy ny anti-panahy sy ny mpanampy amin’ny fanompoana ary ny mpisava lalana, mba hiantsorohana ny andraikiny. (1 Tim. 4:10; 5:17) Manao araka izay fara heriny ny ray aman-dreny matahotra an’Andriamanitra, mba hitaizana ny zanany amin’ny lalan’i Jehovah. (Efes. 6:4) Miady mafy ny tanora kristianina mba hanoherana ny “fanahin’izao tontolo izao.” (1 Kor. 2:12; Efes. 2:1-3) Manompo amim-pahatokiana an’i Jehovah kosa ny hafa, na dia eo aza ny fahanterana sy ny aretina na ny fisedrana hafa. (2 Kor. 12:7) Mendrika ny hoderaina izy rehetra ireo. Mankasitraka ny ezaka mendri-piderana ataon’izy ireo ve isika?
3 Amin’ny isam-batan’olona sy voafaritra tsara: Tena mankasitraka ny teny fiderana atao eny amin’ny lampihazo isika rehetra. Vao mainka mamelombelona anefa ny teny fiderana, rehefa isika isam-batan’olona mihitsy no ilazana azy. I Paoly, ohatra, dia nanao teny fiderana voafaritra tsara momba an’i Foiby, Priska sy Akoila, Tryfena sy Tryfosa, ary Persy, mbamin’ny hafa koa, ao amin’ny toko faha-16 amin’ny taratasiny ho an’ny Romanina. (Rom. 16:1-4, 12) Azo antoka fa tena namelombelona an’ireny olona nahatoky ireny ny teny fiderana nataony! Ny teny fiderana toy izany dia manome toky an’ireo rahalahy sy anabavintsika fa ilaina izy ireo. Ankoatra izany, dia mampifandray antsika bebe kokoa izany. Efa nisy olona nanaovanao teny fiderana voafaritra tsara ve tato ho ato?—Efes. 4:29.
4 Avy amin’ny fo: Tsy maintsy atao amim-pahatsorana ny teny fiderana, raha tiana hamelombelona. Hain’ny olona ny mamantatra raha vokatry ny fo ny tenintsika, na ‘mandrobo [na mandoka] amin’ny lela’ fotsiny isika. (Ohab. 28:23) Voatosika hanao teny fiderana isika, raha mizatra mijery ny toetra tsaran’ny olona. Enga anie isika hazoto hanao teny fiderana amim-pahatsorana, satria ‘tsara tokoa ny teny atao amin’izay andro mahamety azy!’—Ohab. 15:23.