Tahafo i Kristy Rehefa Manompo
1 Nanome modely hotahafintsika eny amin’ny fanompoana i Jesosy. Tena tia an’Andriamanitra sy ny olona izy, ary nasehony imbetsaka sy tamin’ny fomba maro izany. Nampianariny ny fahamarinana ireo mpandefitra. Nanao fahagagana koa izy, satria nangoraka an’ireo nijaly sy voahosihosy.—Matio 9:35.
2 Ny modelin’i Jesosy sy ny fampianarany: Tsy nanao politika i Jesosy, na nifantoka fotsiny tamin’ny asa soa ho fanatsarana ny fiaraha-monina. Nanao zavatra hafa nahasoa izy, nefa tsy variana tamin’izany. Ilay asa nanirahana azy foana no nataony loha laharana. (Lioka 8:1) Nifantoka tamin’ny fitoriana ny vaovao tsaran’ny Fanjakan’Andriamanitra izy, satria io ihany no hanafoana tanteraka ny olana mahazo ny olombelona. Be ny asa niandry an’i Jesosy, nefa kely ny fotoana nananany. Tian’ny mponin’i Kapernaomy hijanona tany aminy, ohatra, izy, nefa hoy izy tamin’ny mpianany: “Andeha isika ho any an-toeran-kafa ... mba hitoriako any koa, fa izany no nahatongavako.”—Marka 1:38.
3 Naniraka ny mpianany i Jesosy, rehefa avy nampiofana azy ireo. Izao no toromarika mazava nomeny: “Mitoria hoe: ‘Efa manakaiky ny fanjakan’ny lanitra.’ ” (Matio 10:7) Nampianariny an’ireo mpanara-dia azy, fa ilay Fanjakana no tokony ho zava-dehibe indrindra eo amin’ny fiainan’izy ireo. (Matio 6:33) Nanafatra ny mpianany i Jesosy rehefa hiakatra tany an-danitra, ka nanazava izay tokony hataon’izy ireo. Hoy izy: “Koa mandehana àry, ataovy mpianatra ny olona any amin’ny firenena rehetra.”—Matio 28:19.
4 Zava-dehibe ilay Fanjakana: Ny Fanjakan’Andriamanitra no tena foto-kevitry ny fitorian’i Jesosy, ary nampirisika ny mpianany izy mba hanaraka ny modeliny. Tsy hahavita hamaha ireo olana eto an-tany mihitsy mantsy ny olombelona. (Jer. 10:23) Ny Fanjakan’Andriamanitra ihany no hanamasina ny anaran’i Jehovah, sy hanala tanteraka ny fahorian’ny olona. (Matio 6:9, 10) Ampianarintsika ny fahamarinana momba ilay Fanjakana àry, ireo “misento sy mitaraina noho ny fahavetavetana rehetra atao eo aminy.” Manampy azy ireo hanana fiainana sambatra dieny izao izany, ary hanantena hoavy azo antoka.—Ezek. 9:4.
5 Mbola mandray anjara lehibe amin’ny asa fitoriana i Jesosy hatramin’izao, ary manome toky fa hanampy antsika foana. (Matio 28:20) Moa ve isika miezaka manaraka akaiky ny modeliny rehefa manompo? (1 Pet. 2:21) Enga anie isika hanao izay rehetra vitantsika, mba hanarahana akaiky ny modelin’i Jesosy, amin’izao andro farany izao!