Taratasy avy Amin’ny Sampana

Ry mpitory ilay Fanjakana,

Faly isika mahita fa nandroso tsara ny asa teto Madagasikara, nandritra ny taom-panompoana 2007! Nahatratra 2 296 ny mpisava lalana maharitra tamin’ny Febroary. Tampon’isa vaovao izany! Manana mpisava lalana manokana 280 izao isika. Be dia be tokoa ny asa vitan’izy ireo. Nisy mpisava lalana manokana roa, ohatra, nanampy mpiangona 20 sy mpitondra fivavahana tao amin’ny fiangonana iray, mba hanaiky ny fahamarinana. Misy mpitory tsy vita batisa dimy izao ao amin’ny faritanin’ireo mpisava lalana ireo, ary 40 no manatrika fivoriana tsy tapaka.

Tamin’ny taon-dasa isika, dia nizara ny Vaovao Momba Ilay Fanjakana No. 37 hoe “Ho Ringana Tsy ho Ela ny Fivavahan-diso!” Efa ho 700 000 no voazara teto amintsika. Nametraka azy io tao amin’ny hotely ny anabavy iray. Andro vitsivitsy tatỳ aoriana, dia nampiseho azy io taminy ny mpiasa iray tao, ary nilaza toy izao: ‘Mba lazao amiko re raha diso ny fivavahako e! Nampianarina anay mantsy fa tsy mety maty ny fanahy, nefa tsy izany no voalaza ato. Ity koa misy hoe: “Mivoaha ao aminy, ry oloko!”’ Nianatra Baiboly àry ilay mpiasa. Tsy nahita tory ny anabavy iray tsy nitory intsony, rehefa avy namaky an’ilay taratasy mivalona. Nivory izy ny alahadin’iny, ary nangataka hianatra Baiboly.

Ny hanampy ny olona tso-po hahalala izay tena ampianarin’ny Baiboly no tanjontsika, rehefa mizara ireny taratasy ireny. (Matio 28:19, 20) Aza hadinoina ny mandray an-tsoratra an’izay rehetra liana, ary miverena mitsidika azy, ka manomboha fampianarana Baiboly raha azo atao. Faly izahay miara-miasa akaiky aminareo amin’io asa lehibe io. Matokia fa tena tia anareo izahay.

Ireo rahalahinareo,

Biraon’ny Sampana eto Madagasikara