Taratasy avy Amin’ny Sampana

Ry mpitory ilay Fanjakana,

Misy faritra efatra vaovao eto Madagasikara, amin’ity taom-panompoana 2006 ity. Midika izany fa valo ny isan’ny faritra niforona, tato anatin’ny dimy taona farany. Fiangonana vaovao 131 koa no niforona, ka lasa 393 izao ny isan’ny fiangonana sy antoko-mpitory.

Miavaka ny asa vitan’ny mpisava lalana manokana, izay manely ny vaovao tsara any amin’ny toerana mitokana. Neken’ny Filan-kevi-pitantanana ny hampitomboana ny isan’ny mpisava lalana manokana ho 250, eto Madagasikara. Hiasa eny amin’ny saha izy ireo, ary hanampy ny olona liana hahafantatra an’i Jehovah. Mandroso tokoa ny asa. Tsy nisy mpitory mihitsy, ohatra, tany Manompana, any avaratr’i Toamasina, roa taona lasa izay. Misy mpitory 18 anefa any izao, ary 269 no nanatrika ny Fahatsiarovana tamin’ity taona ity. Nisy mpisava lalana manokana efatra koa nalefa tany Mahambo, tamin’ny Janoary 2005. Misy mpitory efatra sahady any izao, ary 68 no nanatrika ny Fahatsiarovana.

Ny fanelezana gazety no tena nifantohan’ny Filan-kevi-pitantanana, tamin’ity taona ity. Mahafinaritra fa maro ny gazety voapetraka eto amin’ny nosintsika. Betsaka ny olona maniry hahazo tsy tapaka an’ireny gazety tsara tarehy ireny isam-bolana. Vakio manontolo ny gazety, rehefa voarainao. Avy eo dia manokàna andro iray isan-kerinandro mba hanelezana gazety.

Tianay ny haneho fankasitrahana manokana an’ireo rahalahy miezaka mafy manorina Efitrano Fanjakana. Efitrano 15 eo ho eo izao no efa vita, raha ity taona ity fotsiny no resahina. Velom-pankasitrahana an’i Jehovah sy ny fandaminany isika, satria izy ireo no loharanon’ny vola anorenana ireny efitrano ireny.

Mendri-piderana tokoa izany zotom-ponareo hampandroso ny asan’ilay Fanjakana izany! Tena ankasitrahanay koa ny fanomezana ataonareo, mba hanohanana an’ilay asa. (Ohab. 3:9, 10) I Jehovah anie hitahy ny fiezahantsika rehetra ‘hanompo [azy] ho fiderana ny voninahiny.’—Efes. 1:12.

Ireo rahalahinareo,

Biraon’ny Sampana eto Madagasikara