Hisy Mifohaza! Manokana Hatolotra Amin’ny Novambra!
1 Tena mahaliana ny olona maro ny hahafantatra raha sarobidy tokoa ny Baiboly. Manontany àry izy ireo hoe: Nahoana no lazaina fa Tenin’Andriamanitra ny Baiboly nefa olona no nanoratra azy? Nahoana aho no afaka mitoky amin’ny Baiboly mba hitari-dalana ahy? Inona avy no soa ho azoko, raha miezaka mamaky sy mianatra Baiboly aho? Baiboly inona no tokony hampiasaiko? Ireo no fanontaniana sasany valiana ao amin’ilay Mifohaza! manokana hoe “Azo Itokisana ve ny Baiboly?”
2 Tiantsika hiely be ao amin’ny faritanintsika io Mifohaza! manokana io. Miaraha mitory isan-trano amin’ny fiangonana àry isaky ny asabotsy, mandritra ny volana Novambra. Omeo an’io Mifohaza! io ny havana, mpifanila trano, mpiara-miasa, mpampianatra, mpiara-mianatra, ary ny olona tsidihinao. Mitondrà amin’ilay gazety rehefa miantsena sy manao dia. Efa nampitomboinay ny isan’ny gazety nohafarana mba ho ampy araka izay ilain’ny fiangonana.
3 Manomboha fampianarana Baiboly: Raha mahapetraka an’io Mifohaza! io ianao, dia mety ho afaka hilaza zavatra hahafahanao hanomboka fampianarana Baiboly. Afaka milaza toy izao, ohatra, ianao alohan’ny hamaranana ny resaka: “Tiako haseho anao amin’ny manaraka ny valiny omen’ny Baiboly amin’ity fanontaniana ity: ‘Inona no fikasan’Andriamanitra momba ny tany?’ ” Rehefa hiverina any aminy ianao, dia mitondrà boky Ampianarina, ary asehoy azy ny pejy faha-4-5, na diniho ny fehintsoratra 1-3, ao amin’ny toko faha-3. Azo atao koa ny milaza hoe: “Tiako horesahina anao amin’ny manaraka ny faminaniana iray ao amin’ny Baiboly, izay tanteraka ankehitriny.” Rehefa miverina mitsidika azy ianao, dia asehoy azy ny toko faha-9 amin’ilay boky, ary iaraho midinika ny fehintsoratra 1-3. Afaka milaza koa ianao hoe: “Sarotra amin’ny olona maro ny mahatakatra izay vakiny ao amin’ny Baiboly. Tiako haseho anao amin’ny manaraka ny fomba hahatakaranao tsara kokoa izay lazain’izy io.” Mametraha boky Ampianarina amin’ny fotoana manaraka, ary atoroy azy ny fomba fianarana ilay boky.
4 Ny Baiboly ihany no mirakitra ny “Soratra Masina”, izay afaka ‘mampahahendry antsika ho amin’ny famonjena.’ (2 Tim. 3:15) Irintsika rehetra àry ny handray anjara amin’ny fizarana an’io Mifohaza! manokana io, mba hanampiana ny olona hatoky ny Baiboly!