Hisy Mifohaza! Manokana Hatolotra Amin’ny Septambra
1 Saika ny olon-drehetra no tia mandre siokam-borona sy mijery masoandro mody. Tsy mety mino anefa ny olona maro hoe ilay Ray be fitiavana any an-danitra no namorona an’ireny. Hanana tombontsoa miavaka àry isika amin’ny Septambra, satria hanaporofo fa i Jehovah no namorona ny zava-drehetra. (Isaia 40:28; 43:10) Hanolotra Mifohaza! miresaka manontolo an’ity foto-kevitra ity isika: “Nisy Namorona ve Izao Rehetra Izao?”
2 Eny amin’ny faritany: Miaraha mitory amin’ny fiangonana, isaky ny asabotsy, raha azo atao. Mazava ho azy fa afaka manolotra an’io gazety io koa ianao, amin’ny andro hafa mandritra ny herinandro. Azo inoana fa tena ho liana amin’izy io ny mpampianatra sy ny tompon’andraikitra hafa eo amin’ny sehatry ny fampianarana. Azo atao àry ny manao fandaharana manokana mba hitsidihana ireny olona ireny.
3 Raha liana amin’izay lazainao izy, dia mametraha fanontaniana hovaliana amin’ny manaraka. Afaka manontany, ohatra, ianao hoe: ‘Raha be fitiavana ny Mpamorona, nahoana no avelany hisy izao fijaliana be dia be izao?’ Rehefa miverina mitsidika azy ianao, dia afaka mampiseho ny toko 1 na faha-11 amin’ny boky Ampianarina. Na azonao atao koa amin’ny voalohany ny manontany azy ny antony namoronan’Andriamanitra ny tany, ary ampiasao ny toko faha-3 rehefa miverina any aminy.
4 Any am-pianarana: Ho anao mpianatra, nahoana raha atao fanomezana ho an’ny mpampianatra na ny mpiara-mianatra aminao ilay Mifohaza! manokana? Azonao apetraka eo ambony latabatrao fotsiny koa izy io. Mety hahatonga azy ireo hanontany momba ny finoanao izany. Azonao ampiasaina koa ny fanazavana ao mba hiarovana ny finoanao, rehefa misy fifanakalozan-kevitra ao an-dakilasy, na rehefa asaina manao famoronan-dahatsoratra ianao. Hisy lahatsoratra hanampy anao amin’izany ao. Izao no lohateniny: “Manontany ny Tanora Hoe... Ahoana no Hanaporofoako fa Nisy Namorona Izao Rehetra Izao?”
5 Mendrika handray voninahitra sy haja i Jehovah noho ny zavatra noforoniny. (Apok. 4:11) Mazotoa àry manolotra an’io Mifohaza! amin’ny volana Septambra io. Hanome voninahitra ny Mpamorona isika amin’izay, ary hanampy olon-kafa hanao toy izany koa.