Fandaharan’ny Fivoriambe Manokana Iray Andro
Izao no foto-kevitry ny fivoriambe manokana amin’ny taom-panompoana 2009: ‘Tandremo Hatrany Ilay Fanompoana, ka Tanteraho Tsara.’ Nalaina avy tao amin’ny Kolosianina 4:17 izy io. Zava-dehibe amintsika Kristianina io fampirisihana io. Ny hanatanteraka tsara ny fanompoana no tanjontsika, toy izay nataon’i Jesosy. (Jaona 17:4) Nanome modely ho antsika koa ny apostoly Paoly. Tapa-kevitra ny hamita ny fanompoany izy.—Asa. 20:24.
Hiresaka izay nataon’ny mpitory sasany mba hiatrehana zava-tsarotra mifandray amin’ny fanompoana, ny mpiandraikitra ny faritra. Ny lahateny manaraka hoe “Kolokoloy Izay Nambolenao”, dia hanasongadina ny fomba mandaitra hanampiana an’ireo ‘manana toe-po tsara mba hahazoana fiainana mandrakizay.’ (Asa. 13:48) Izao no lahateny voalohany hataon’ny mpandahateny mpitsidika: “Ahoana no Ampisehoantsika fa Mpanompon’Andriamanitra Isika?” Hohazavainy isan’andininy ny 2 Korintianina 6:1-10. Izao kosa no lahateny hataony ny tolakandro: “Hevero ho Tena Sarobidy ny Fanompoanao.” Azo antoka fa hampahery anao ilay lahateny hoe “Mankafy ny Fanompoana ny Ankizy sy ny Zokiolona” sy ilay hoe “Tanora Manatanteraka Tsara ny Fanompoana.” Tokony hampahafantatra haingana ny mpiandraikitra mpitantan-draharaha izay rehetra maniry hatao batisa ho porofon’ny fanoloran-tenany. Misy fianarana Ny Tilikambo Fiambenana foana rehefa fivoriambe. Ento àry ny gazety tokony hianarana amin’io herinandro io.
Mila manatanteraka tsara ny fanompoana nankinin’i Jehovah tamintsika isika, ka hitandrina mba tsy hisy zavatra hafa hanelingelina azy io. Hahazo fampaherezana miorina amin’ny Soratra Masina isika amin’io fivoriambe manokana io. Horesahina amin’izany izay tokony hataontsika mba ho loha laharana foana ny fanompoana. Hanampy antsika handini-tena koa izy io, mba hahafahantsika hanatanteraka tsara ny fanompoantsika.