Mampiasa Tsara Azy Ireny ve Ianao?
1 Nanoratra toy izao ny anabavy iray rehefa avy namaky Ny Tilikambo Fiambenana 1 Janoary 2008: “Tsy andriko mihitsy ny hanolorana azy io eny amin’ny saha!” Efa namaky ireo lahatsoratra mivoaka tsy tapaka ao amin’ny gazety ho an’ny besinimaro ve ianao? Efa nampiasa azy ireny ve ianao rehefa nitory?
2 “Inona no Nampianarin’i Jesosy Antsika”: Hitan’ny mpitory sasany fa manampy azy hanomboka fampianarana Baiboly io lahatsoratra io. Raha mbola tsy nanao izany ianao, dia andramo ity soso-kevitra ity: Vakio amin’ny olona itorianao ny lohatenin’ilay lahatsoratra. Asehoy azy, avy eo, izay nolazain’i Jesosy momba ilay loha hevitra, araka ny hita eo amin’ny fehintsoratra voalohany. Tohizo ilay resaka raha liana ilay olona. Vakio ny fanontaniana eo amin’ny lohatenikely manaraka, ary avelao izy hilaza ny heviny. Hazavao vetivety izay sary mifandray aminy, ary mifindrà eo amin’ny fehintsoratra manaraka. Mety ho afaka handinika ny antsasak’ilay lahatsoratra ianareo amin’io fotoana io, ary azonareo atao amin’ny manaraka ny ambiny. Miomàna hanohy an’ilay fianarana amin’ny boky Ampianarina.
3 “Torohevitra Hahasambatra ny Fianakaviana”: Mivoaka isaky ny telo volana io lahatsoratra io. Resahina ao ny fomba azon’ny mpivady sy ny ray aman-dreny ampiharana ny toro lalan’ny Baiboly, mba hamahana ireo olana mety hanimba ny fifandraisan’ny mpianakavy. Azo ampiasaina eny amin’ny saha koa izy io, mba hahitan’ny olona fa bokim-pahendrena ny Baiboly.—2 Tim. 3:16, 17.
4 Lahatsoratra ho an’ny ankizy sy ny tanora: Manampy ny mpamaky hisaintsaina sy hamakafaka tantara ara-baiboly, ilay lahatsoratra hoe “Ho An’ny Ankizy sy ny Tanora.” Azonao resahina amin’ny ankizy itorianao izy io, mba hahitany fa tena mahasoa ny mianatra ny Tenin’Andriamanitra. (Sal. 119:9, 105) Raha olona efa manan-janaka kosa no hitanao, dia asongadino ilay hoe “Ampianaro ny Zanakao.” Mivoaka isaky ny roa volana izy io, ary manampy ny ankizy handray lesona avy amin’ireo olona resahina ao amin’ny Baiboly. Efa namaky an’io lahatsoratra io tamin’ny zanakao ve ianao?
5 Lahatsoratra hafa: Mivoaka isam-bolana ilay lahatsoratra hoe “Manontany ny Mpamaky.” Valiana ao ny fanontaniana mety hanitikitika ny sain’ny olona tsy Vavolombelona. Azonao ampiasaina izy io rehefa mitory isan-trano ianao. Tantaram-piainan’ny misionera na olon-kafa kosa no ao amin’ilay hoe “Taratasy avy any...”, ary resahina ao ny zava-tsarotra atrehin’izy ireo eny amin’ny fanompoana. Rehefa mamaky an’ireny lahatsoratra ireny ny olona liana, dia ho takany fa torina maneran-tany ny vaovao tsara, ary porofon’ny fanatrehan’i Kristy izany.—Matio 24:3, 14.
6 Miorina amin’ny famakiana Baiboly amin’ny Sekolin’ny Fanompoana ilay lahatsoratra mivoaka isam-bolana hoe “Manatòna An’Andriamanitra.” Mety haniry hianatra bebe kokoa momba an’i Jehovah ny olona tso-po rehefa mamaky azy io. Mivoaka inefatra isan-taona kosa ilay hoe “Tahafo ny Finoan’izy Ireo.” Manampy ny mpamaky haka sary an-tsaina tantara ara-baiboly izy io, sady miresaka ny safidy nataon’ireo olona resahina ao amin’ny Baiboly, ny zava-tsarotra natrehiny, ary ny finoany.
7 Faly tokoa isika mahazo an’io gazety hoentina mitory io, isam-bolana. Aoka àry isika hiezaka hahalala tsara izay raketiny sy hampiasa azy ireny tsara rehefa mitory.