Fomba Vaovao Hanombohana Fampianarana Baiboly
1. Inona ilay lahatsoratra vaovao ao amin’ny Tilikambo, ary inona no antony namoahana azy?
1 Hisy lahatsoratra vaovao hoe “Ianaro ny Tenin’Andriamanitra” ao amin’ny Tilikambo ho an’ny besinimaro, manomboka amin’ny Janoary. Natao hanombohana fampianarana izy io. Hahaliana ny olona ny hamaky azy io, nefa ny tena tanjona dia ny hiara-midinika aminy an’ilay izy.
2. Inona no mampiavaka an’ilay lahatsoratra?
2 Inona no mampiavaka azy io? Natao fanontaniana ny lohateny sy lohatenikely, ka azo apetraka amin’ny olona itoriana. Misy koa andinin-teny natao hovakina, mba ho ny Baiboly mihitsy no hampianatra an’ilay olona. Fohy ny fehintsoratra, ka azo dinihina eo am-baravarana. Hita ao koa ny toko azo anohizana an’ilay dinidinika ao amin’ny boky Ampianarina, rehefa mety izany.
3. Ahoana no azo ampiasana an’ilay lahatsoratra rehefa mitory isan-trano?
3 Ahoana no hampiasana azy? Mametraha fanontaniana mahaliana mifandray amin’ny loha hevitr’ilay lahatsoratra. Miresaka momba ny Baiboly, ohatra, ilay lahatsoratra, ao amin’ny Tilikambo 1 Janoary. Azo atao àry ny milaza hoe: “Araka ny hevitrao, Tenin’Andriamanitra ve ny Baiboly sa boky tsotra fotsiny? [Avelao izy hamaly.] Misy hevitra mahaliana ato amin’ity lahatsoratra ity.” Asehoy azy ilay fanontaniana voalohany. Vakio ny fehintsoratra voalohany sy ilay andinin-teny voatonona eo. Vakio indray ilay fanontaniana, ary asao izy hilaza ny heviny. Mifantoha amin’ny hevi-dehibe. Ataovy arakaraka ny fotoanan’ilay olona ny halavan’ny fianarana. Resaho avy eo ilay fanontaniana hodinihina amin’ny manaraka, ary manaova fotoana hentitra. Tsidiho isan-kerinandro izy ka tohizo ilay fianarana, mandra-pahatongan’ny gazety manaraka. Azo atao koa ny tonga dia manasa an’ilay olona hianatra Baiboly, ary ilay lahatsoratra no ampiasaina avy eo.
4. Ahoana no azo ampiasana an’ilay lahatsoratra, rehefa mitsidika olona liana?
4 Azo ampiasaina koa ilay izy rehefa mitsidika olona liana na olona fanaterana gazety. Afaka milaza ianao hoe: “Misy zava-baovao ao amin’ny Tilikambo. Andraso fa hasehoko anao ny fomba fampiasana azy.” Manantena isika fa hanampy olona maro “ho tonga amin’ny fahalalana ny marina” io lahatsoratra vaovao io.—1 Tim. 2:4.