Ampiofanin’i Jehovah Isika mba Hahay Hitory
1. Inona no ataon’i Jehovah, rehefa maniraka olona hanao asa iray izy?
1 Ampian’i Jehovah ny mpanompony, mba hahavita ny asa ampanaoviny. Nasainy nanamboatra sambofiara, ohatra, i Noa. Natoron’i Jehovah azy ny fomba fanaovana an’ilay izy, satria mbola tsy nanao izany mihitsy izy. (Gen. 6:14-16) Nasainy nankany amin’i Farao sy ny anti-panahy teo amin’ny Israely koa i Mosesy, izay mpiandry ondry malemy fanahy. Hoy izy: “Homba anao aho rehefa miteny ianao, ka hanoro anao izay tokony holazainao.” (Eks. 4:12) Ary ahoana ny amin’ny asa fitoriana ny vaovao tsara? Mampiofana antsika i Jehovah amin’ny alalan’ny Sekolin’ny Fanompoana sy ny Fivoriana Momba ny Fanompoana. Ahoana no handraisantsika soa avy amin’izany fampiofanana izany?
2. Inona no azo atao mba handraisan-tsoa avy amin’ny Sekolin’ny Fanompoana?
2 Sekolin’ny Fanompoana: Omano mialoha ireo anjara hatao any am-pivoriana. Hihatsara ny fahaizanao mampianatra, rehefa hitanao ny fomba namelabelaran’ireo mpianatra an’ilay fanazavana. (Ohab. 27:17) Ento ny boky Sekolin’ny Fanompoana, satria manao fanamarihana mifandray amin’izy io ny mpiandraikitra ny sekoly, aorian’ny anjaran’ny mpianatra tsirairay. Tsipiho izay hevi-dehibe tianao hampiharina, ary soraty eo amin’ny sisim-pejy izay hevitra mahasoa anao. Ny mandray anjara anefa no tena andraisan-tsoa. Efa manao sekoly ve ianao? Omano tsara ny anjaranao, ary ampiharo izay torohevitra omena anao. Ampiharo ilay lesona rehefa eny amin’ny fanompoana.
3. Ahoana no handraisantsika soa avy amin’ny Fivoriana Momba ny Fanompoana?
3 Fivoriana Momba ny Fanompoana: Vakio mialoha ilay lahatsoratra hodinihina ary manomàna valin-teny. Ho tsaroanao kokoa ny torohevitra omena amin’ilay fivoriana amin’izay. Ataovy fohy ny valin-teninao, mba ho maro no afaka handray anjara. Araho tsara ny fampisehoana, ary ampiharo izay torohevitra hitanao hoe hanatsara ny fanompoanao. Tehirizo koa ireo lahatsoratra ao amin’ny Fanompoantsika Ilay Fanjakana, izay mbola azo ampiasaina amin’ny hoavy.
4. Nahoana isika no tokony hanararaotra ny fampiofanana omen’i Jehovah?
4 Nirahina hitory ny vaovao tsara any amin’ny tany rehetra misy mponina isika. (Mat. 24:14) Tsy mora ilay asa, toy ny an’i Noa sy Mosesy ihany. Hahomby anefa isika, raha manararaotra an’ireo fampiofanana sady miantehitra amin’i Jehovah, ilay “Mpampianatra Be Voninahitra.”—Isaia 30:20.