Miderà An’i Jehovah Isan’andro
1. Inona no irin’ny mpanompon’Andriamanitra hatao, ary nahoana?
1 Araka ny nambaran’i Davida Mpanjaka, dia tapa-kevitra ny hidera an’i Jehovah “tontolo andro” izy, eny, mandritra ny fotoana tsy voafetra. (Sal. 145:2, 7, 21) Manana antony hiderana an’i Jehovah isan’andro koa isika.—Sal. 37:10; 145:14, 18; 2 Pet. 3:13.
2. Ahoana no ahafahan’ny mpianakavy midera an’i Jehovah isan’andro?
2 Ao an-trano: Mampahery ireo boky aman-gazetintsika ka azontsika anaovana fiaraha-midinika ara-baiboly, rehefa mandinika ny teny hodinihina isan’andro isika, na manao ny Fotoam-pivavahan’ny Fianakaviana, na manomana fivoriana. Fianakaviana maro no manao ho fahazarana ny miara-misakafo indray mandeha isan’andro, fara fahakeliny. Afaka miresaka tsara sy tsy manao resaka maimaika izy ireo amin’izay, sady afaka midera an’i Jehovah. Tokony hataon’ny ray aman-dreny izay hisian’ny resaka toy izany. Zava-dehibe mantsy izany eo amin’ny fitaizana ny ankizy “araka ny fananarana sy ny fomba fisainan’i Jehovah.”—Efes. 6:4; Deot. 6:5-7.
3. Inona no azontsika hararaotina hiderana an’i Jehovah rehefa miaraka amin’ny mpiara-manompo?
3 Rehefa miaraka amin’ny mpiara-manompo: Azontsika hararaotina hiderana an’i Jehovah miaraka amin’ny mpiray finoana amintsika ny fanompoana sy ny fivoriana. (Ohab. 15:30; Fil. 4:8; Heb. 13:15) Samy tia an’i Jehovah isika rehetra ka tokony handeha ho azy eo amin’ny resaka ifanaovantsika ny fankasitrahana amim-pahatsorana an’ireo toetra tsaran’i Jehovah.—Sal. 106:1.
4. Inona avy no toe-javatra azonao iderana an’i Jehovah?
4 Rehefa miresaka amin’ny olona tsy Vavolombelona: Tsy mamela antsika hanompo isan’andro angamba ny fiainantsika. Azontsika iresahana momba an’i Jehovah sy ny fikasany anefa ny mpiara-miasa sy ny mpiara-mianatra ary ny olona manodidina antsika, na dia fotoana fohy monja aza. Hanana fanantenana ny olona tso-po raha manao izany isika. (Sal. 27:14; 1 Pet. 3:15) Nandeha fiaramanidina, ohatra, ny anabavy iray ka afaka nitory tamin’ny mpandeha iray. Tena nampahery an’ilay olona ilay resaka, ka nomeny an’ilay anabavy ny adiresiny sy ny nomeraon-telefaoniny mba ho afaka hifandray foana izy ireo. Mihamikorontana sy miharatsy ity tontolo ity, fa ny vahoakan’i Jehovah kosa mitondra vaovao tsara foana ho an’ny olona vonon-kihaino, dia “vaovao tsara momba ny zavatra tsara kokoa.” Mahatonga ny hafa hanana fanantenana sy hidera an’i Jehovah izany.—Isaia 52:7; Rom. 15:11.
5. Nahoana isika no maniry hidera an’i Jehovah, ary inona no mety ho vokatr’izany?
5 Tena mahafaly an’i Jehovah ny mandre ny mpanompony midera azy isan’andro! Afaka manao toa an’ireo zavaboary manodidina antsika isika, ka hiboiboika fiderana an’i Jehovah isan’andro, na ao an-trano, na eo anivon’ny fiangonana, na rehefa miresaka amin’ireo mbola tsy anisan’ny mpidera an’i Jehovah.—Sal. 19:1-4.