Manao Fanasana Iray Mampientam-po ny Fivoriamben’ny Distrika! — Miderà An’i Jehovah Amim-pifaliana Isan’andro Isan’andro!
1 “Raha manao feo hafahafa ny trompetra, iza no hiomana hiady?” hoy ny fanontanian’ny apostoly Paoly. (1 Kor. 14:8). Moa ve mafy sy mazava ny fanasana navoaka tamin’ny Fivoriamben’ny Distrika “Mpidera An’Andriamanitra Amim-pifaliana”? Eny, izany tokoa. ‘Miderà an’i Jehovah amim-pifaliana sy isan’andro’, izany no hafatra mampientam-po nampitaina! Nentanin’io fanasana io hanao zavatra ve ny fonao? Nisy antony mahery be dia be nomena tamin’ny fandaharan’ny fivoriambe mba hiderantsika lalandava an’i Jehovah, ilay Mpanjaka mandrakizay. — Sal. 35:27, 28.
2 Ny lanitra mahatahotra dia mitory ny voninahitr’i Jehovah ‘isaky ny andro mifandimby’. (Sal. 19:1-3). Raha toa ireo zavatra noforonina tsy miloa-peo sy tsy manana aina midera lalandava an’i Jehovah, tsy tokony hahatsiaro ho voatosika ve isika olombelona manan-tsaina hanandratra ny feontsika mba hidera azy amin’ny fotoana rehetra noho ireo toetrany sy ireo zava-bitany tsy misy toa azy? Iza no mendrika kokoa ny fiderantsika amim-pifaliana noho ny Mpamorona antsika malaza? — Sal. 145:3, 7.
3 Isan’andro Isan’andro: Ny mpanao salamo nahazo tsindrimandrin’Andriamanitra dia nanoratra toy izao: “Lazao isan-andro isan-andro ny famonjeny mahafaly. Fa lehibe Jehovah ka mendrika hoderaina indrindra”. (Sal. 96:2, 4). Tsy mihatra afa-tsy amin’ireo mpisava lalana ihany ve io? Tsia! Midika ve izany fa isika rehetra dia tokony hiresaka amin’ny hafa momba an’i Jehovah na amin’ny fotoana inona na amin’ny fotoana inona ary na aiza na aiza ahafahantsika manao izany, na dia amin’ny andro tsy hanaovantsika fanompoana isan-trano aza? Eny! Maika dia maika ny ilana hidera an’i Jehovah isan’andro sy hiresahana amin’ny hafa ny amin’ny fomba famonjena noraisiny. Ny olona dia tsy maintsy mahafantatra fa i Jehovah no ilay Mpanjaka Mandrakizay ary Izy no nanome ny fanapahana eo amin’izao tontolo izao ho an’i Jesosy Kristy Zanany nomem-boninahitra. Ny fitiavana an’i Jehovah sy ny fitiavana ny olona dia hahatonga antsika tsy hitsahatra hiresaka momba io hafatra io sy momba ireo fandaharana noraisiny ho amin’ny famonjena, na aiza na aiza mety hahitana olona. — Sal. 71:15.
4 Tamin’ny andro rehetra nanompoany teto an-tany, i Jesosy Kristy dia nanome ny ohatra tsara dia tsara indrindra tamin’ny naha-mpidera an’i Jehovah mahitsy fiteny. Hoy izy: “Midera Anao [ampahibemaso, NW] Aho, Raiko, Tompon’ny lanitra sy ny tany”. (Matio 11:25). Nifanaraka tamin’izany teniny izany, dia nidera an’i Jehovah ampahibemaso i Jesosy na taiza na taiza nisy azy. Ary na taiza na taiza niangonan’ny vahoaka — na tao amin’ny synagoga, tao amin’ny tempoly tany Jerosalema, teo an-tampon’ny tendrombohitra, na teny amoron-dranomasina — dia nidera an’i Jehovah izy. Raha toa isika manaraka akaiky ny dian’i Jesosy amin’ny fanohizana manao asa tsy miovaova isan’andro rehefa midera an’i Jehovah ampahibemaso, dia hahita vokatra mahafaly sy mahasambatra isika.
5 Fanoinana ny fanasana: Hanoina ny fanasana mba hidera an’i Jehovah ampahibemaso isan’andro ve ianao? Tadidio fa tsy sakana ny taona. Ny Salamo 148:12 dia manasa ny zatovolahy sy ny zatovovavy sy ny antitra ary ny tanora mba hidera an’i Jehovah. Ry tanora, hidera an’i Jehovah ve ianareo eo amin’ny mpiara-mianatra aminareo sy ny mpampianatra anareo mandritra itỳ taom-pianarana vaovao itỳ? Ry olon-dehibe, mahare momba an’i Jehovah sy ny fikasany ve ireo mpiara-miasa aminareo any amin’ny toeram-piasanareo rehefa misy fotoana mety mba hiarahana miresaka? Isika rehetra dia tokony hanao ny firesahana momba an’i Jehovah ho tahaka ny tapany amin’ny fiainantsika toy ny fiaina sy ny fihinanana. Na dia tsy mihaino izay lazaintsika aza ireo olona tsy miraharaha, dia misy Persona iray mihaino, ary hamaly soa antsika izy. — Mal. 3:16.
6 Eo am-pahantomoran’ny faran’ny fandehan-javatra dia mivoaka hatrany amin’ny faran’ny tany ilay fanasana hoe: “Miderà an’i Jah ianareo, ry olona!” (Sal. 106:1, NW). Enga anie ny hiakam-piderantsika hihamafy isaky ny andro mandalo mba ho fantatry ny rehetra fa Ilay atao hoe Jehovah no ilay Avo Indrindra ambonin’ny tany rehetra. — Sal. 83:18.