Fotoana Mahafaly ny Fivoriamben’ny Vondrom-paritra
1. Inona no mampitovy ny fetin’ny Israely sy ny fivoriamben’ny vondrom-paritra?
1 Nankany Jerosalema foana i Josefa, Maria, ny zanany, ary ny olon-kafa, mba hamonjy an’ireo fety fanao isan-taona. Niezaka nanadino ny zavatra nanahirana azy andavanandro izy ireo tamin’izay, ary nifantoka tamin’ny zava-dehibe kokoa. Afaka nisaintsaina sy niresaka momba ny hatsaran’i Jehovah izy ireo nandritra ilay fety, ary nandinika ny Lalàna. Ho afaka hanao toy izany koa isika amin’ny fivoriamben’ny vondrom-paritra ho avy izao. Tena ho fotoana mahafaly izy io!
2. Inona no tokony hataontsika mba hiomanana ho amin’ny fivoriambe?
2 Ilaina ny fiomanana: Tsy maintsy nandeha an-tongotra 200 kilaometatra nandroso sy niverina i Jesosy sy ny fianakaviany, rehefa nankany Jerosalema. Tsy fantatsika hoe firy ny zanak’i Josefa sy Maria. Azo inoana anefa fa betsaka ny zavatra tsy maintsy nomanin’izy ireo. Ary ianao? Inona no tokony hataonao mba hanatrehana ny fivoriambe telo andro? Angamba ianao mila maka andro tsy iasana, na miera amin’ny mpampiasa anao, na ny mpampianatra ny zanakao. Sao dia misy zavatra azonao atao koa ho an’ireo mila fanampiana, mba hahafahany hanatrika?—1 Jaona 3:17, 18.
3. Inona no azon’ny olona natao rehefa namonjy an’ireo fety jiosy?
3 Fotoana ifampaherezana: Afaka nifampahery ny olona nanatrika ireo fety jiosy. Azo inoana fa tsy andrin’ny fianakavian’i Jesosy ny hihaona tamin’ny namany. Nety ho nahita namana vaovao koa izy ireo teny an-dalana na tany Jerosalema. Mety ho Jiosy izy ireny na olona niova ho amin’ny Fivavahana Jiosy.
4. Ahoana no hampisehoantsika fa zava-dehibe amintsika ny fiarahana amin’ny mpiara-manompo?
4 Tian’ny mpanompo mendri-pitokisana sy malina hifampahery isika. Tsy nataony boky mba hovakintsika any an-trano àry ireo lahateny, fa nasainy hohenointsika any amin’ny fivoriambe kosa, amin’izay isika rehetra tafaraka. (Heb. 10:24, 25) Ataovy àry izay hahatongavana aloha be isan’andro, mba hifaneraserana amin’ny mpiara-manompo dieny mbola tsy mandeha ny mozika fanokafana. Aza mitondra sakafo be loatra, ary aza mivoaka any ivelan’ny toerana anaovana fivoriambe mba hividy sakafo. Ho afaka hifampahery amin’ny olona ianao amin’izay. I Jehovah no nahatonga antsika ho tafaraka amin’ireo rahalahintsika kristianina. (Mika 2:12) Tsy tokony hohamaivanintsika izany.
5. Inona no tokony hataontsika, mba handraisantsika soa be dia be avy amin’ny fivoriambe?
5 Fotoana ianarana: Mbola kely i Jesosy, dia efa nanararaotra nianatra momba an’ilay Rainy any an-danitra, isaky ny fety fanao isan-taona. (Lioka 2:41-49) Inona no tokony hataonao sy ny fianakavianao, mba handraisanareo soa be dia be avy amin’ny fivoriambe? Aza mandehandeha na miresadresaka tsy amin’antony mandritra ny fandaharana. Aza avela hanelingelina anao sy ny olona ny finday na fitaovana hafa. Jereo ny mpandahateny ary mandraisa an-tsoratra fohy. Tokony hiara-mipetraka ny fianakaviana, mba ho hitan’ny ray aman-dreny raha mihaino tsara ny zanany na tsia. Rehefa hariva, dia resaho izay hevitra nahafinaritra anao tamin’ilay fandaharana.
6. Tokony hanao ahoana foana ny fitafiana sy taovolontsika?
6 Fitafiana sy taovolo: Nisy mikiramborambo teo amin’ny morontongotr’akanjon’ny Jiosy, ary nisy kofehy manga teo ambonin’ilay mikiramborambo. Tonga dia fantatr’ireo mpivarotra tsy Israelita àry izy ireo teny an-dalana, rehefa hamonjy an’ilay fety na niverina avy tany. (Nom. 15:37-41) Tsy manao akanjo miavaka toy izany ny Kristianina, kanefa malaza ho manao akanjo maotina sy madio ary milamina. Tokony ho mendrika foana àry ny fitafiana sy taovolontsika, na hamonjy fivoriambe isika na mody, na ao amin’ilay tanàna hanaovana fivoriambe. Na misolo akanjo aza isika aorian’ny fivoriambe, dia tokony ho maotina foana izany, ary tokony hanaovantsika ny karatry ny fivoriambe. Hiavaka amin’ny olona tsy Vavolombelona isika amin’izay, ary mety hisy vokany tsara eo amin’izy ireo izany.
7. Nahoana no tsara ny manao asa an-tsitrapo eny amin’ny fivoriambe?
7 Ilaina ny mpiasa an-tsitrapo: Maro ny mpiasa an-tsitrapo ilaina, mba hizotra tsara ny fivoriambe. Afaka manolo-tena hanampy ve ianao? (Sal. 110:3) Fanompoana masina ny asa atao eny amin’ny fivoriambe, ary fitoriana vita ho azy. Nanadio tsara ny toerana nohofan’izy ireo hanaovana fivoriambe ny mpiasa an-tsitrapo tao amin’ny tany iray. Tena variana ny tompon’andraikitra tao amin’ilay toerana, ka nanoratra hoe: “Mbola tsy nahita zavatra niavaka toy iny aho, ka te hisaotra anareo. Efa reko foana hoe olona miavaka ny Vavolombelon’i Jehovah. Ataonareo madio be noho ny talohan’ny nampiasanareo azy foana ny toerana hofanareo. Lasa tsara kokoa noho ny teo aloha ity toerana ity noho ny asa mafy nataonareo. Ianareo no olona tsara fanahy indrindra fantatray hatramin’izay.”
8. Afaka mitory ve isika ao amin’ilay tanàna anaovana fivoriambe? Hazavao.
8 Mety ho afaka hitory ianao: Rehefa mendrika ny fitafiana sy taovolontsika, ary manao karatry ny fivoriambe isika, dia hanaitra ny sain’ny olona ao amin’ilay tanàna anaovana fivoriambe izany. Mety ho afaka hiresaka aminy momba ilay fivoriambe àry isika. Nisakafo tany amin’ny hotely ny ankizikely iray efa-taona sy ny ray aman-dreniny, taorian’ny fivoriambe. Nasehony an’ilay mpandroso sakafo ny boky nivoaka tamin’iny andro iny. Afaka nanasa an’io olona io hanatrika an’ilay fandaharana àry ny ray aman-drenin’ilay zaza.
9. Nahay nankasitraka ny fanasan’i Jehovah ny fianakavian’i Jesosy. Ahoana no hanahafantsika azy ireo?
9 Fotoana mahafaly ireo fety fanao isan-taona fahiny, ka tsy andrin’ny Jiosy te hianatra momba an’i Jehovah ny hahatongavan’izy ireny. (Deot. 16:15) Tsy nampaninona ny fianakavian’i Jesosy ny namoy zavatra sasany, mba hanatrehana azy ireny. Nandray soa be dia be izy ireo. Ankasitrahantsika koa ny fivoriamben’ny vondrom-paritra, satria raisintsika ho toy ny fanomezana avy amin’ilay Raintsika be fitiavana any an-danitra izy io. (Jak. 1:17) Miomàna dieny izao àry, mba ho eo ianao amin’io fotoana mahafaly hiderana an’i Jehovah io!
[Efajoro, pejy 6, 7]
Fampahatsiahivana Momba ny Fivoriambe
◼ Fandaharam-potoana: Hanomboka amin’ny 9.20 maraina foana ny fivoriambe mandritra ny telo andro. Hivoha amin’ny 8.00 maraina ny vavahady. Tokony hipetraka daholo isika rehefa manomboka ny mozika fanokafana. Hanomboka amim-pilaminana ny fivoriana amin’izay. Hirava amin’ny 4.55 hariva ny fivoriambe ny zoma sy asabotsy, ary amin’ny 3.40 hariva ny alahady.
◼ Famandrihan-toerana: Izay olona miray fiara na trano aminao ihany, na ny olona ampianarinao Baiboly no azonao amandrihana toerana.—1 Kor. 13:5.
◼ Sakafo antoandro: Iangaviana ianareo hitondra sakafo antoandro, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely azo apetraka ao ambany seza. Tsy azo atao kosa ny mitondra harona lehibe loatra sy zavatra mora vaky.
◼ Fanomezana: Afaka mampiseho ny fankasitrahantsika ny fivoriambe isika, amin’ny alalan’ny fanomezana an-tsitrapo ho an’ny asa maneran-tany. Azo atao any amin’ny Efitrano Fanjakana izany na any amin’ny fivoriambe.
◼ Raha misy loza na marary: Ilazao ny mpikarakara ny mpanatrika raha misy olona marary tampoka na maratra ka mila fitsaboana maika. Io rahalahy io kosa no hampandre avy hatrany an’ireo ao amin’ny fitsaboana vonjimaika. Izy ireo no hijery izay mahazo an’ilay olona sy hikarakara azy. Hitady fanampiana izy ireo, raha ilaina izany.
◼ Fandraisam-peo: Tsy azo ampifandraisina amin’ny fitaovana elektrika na fanamafisam-peon’ny fivoriambe ny fitaovana fandraisam-peo anao manokana. Azonao atao ny mampiasa fitaovana fandraisam-peo raha tsy manelingelina ny mpanatrika izany.
◼ Taratasy Tsidiho Azafady: Tokony hosoratana ao amin’ilay taratasy hoe Tsidiho Azafady (S-43) ny mombamomba ny olona nitoriana tsy ara-potoana nandritra ny fivoriambe, ka nihaino tsara. Tokony hitondra iray na roa amin’io taratasy io any amin’ny fivoriambe ny mpitory. Omeo ny mpitan-tsoratry ny fiangonana ilay izy rehefa feno.—Jereo Ny Fanompoantsika Ilay Fanjakana Novambra 2009, p. 4.
◼ Hotely fisakafoana: Aoka ianareo ho tsara fitondran-tena any amin’ny hotely mba hanomezam-boninahitra ny anaran’i Jehovah.
◼ Asa an-tsitrapo: Misy asa tsy maintsy atao eny amin’ny fivoriambe. Ho sambatra kokoa isika raha manolo-tena manao ireny asa ireny. (Asa. 20:35) Tokony hanatona ny Sampan-draharahan’ny Fanompoana An-tsitrapo eny amin’ny fivoriambe izay te hanao izany. Afaka mandray anjara koa ny ankizy latsaka ny 16 taona, saingy tsara raha misy olon-dehibe manara-maso azy. Ohatra hoe ny rainy na ny reniny, na olon-kafa nahazo alalana tamin’izy ireo.