Telo Andro Ahazoana Famelombelomana
1. Manantena hahazo inona isika, amin’ny fivoriamben’ny vondrom-paritra amin’ity taona ity?
1 Toy ny tany karakaina ity tontolon’i Satana ity, ka miezaka mamelombelona ny mpanompony i Jehovah. (Isaia 58:11) Anisan’ny fomba ampaherezan’i Jehovah antsika ny fivoriamben’ny vondrom-paritra isan-taona. Inona àry no tokony hiomanantsika, mba hahazoana famelombelomana sy hamelombelomana ny hafa?—Ohab. 21:5.
2. Inona avy no fanomanana tokony hataontsika?
2 Alamino ny fotoananao sy ny asanao, mba ho afaka hanatrika mandritra ny telo andro ianao. Eritrereto hoe adiny firy ny lalana mankeny amin’ny fivoriambe, mba ho tonga ara-potoana ianao isan’andro ka hahazo toerana alohan’ny hanombohan’ny fandaharana. Tsy tiantsika ny ho diso anjara, na dia kely aza, amin’ny sakafo ara-panahy mampahery nomanin’i Jehovah ho antsika! (Isaia 65:13, 14) Efa voalamina koa ve ny fitaterana sy ny toerana hilasianao?
3. Inona no hanampy anao sy ny fianakavianao handray soa feno amin’ilay fandaharana?
3 Aza avela hiriorio ny sainao, mandritra ny fandaharana. Inona no hanampy anao amin’izany? Raha azo atao, dia manaova ampy torimaso tsara. Jereo ny mpandahateny. Araho ao amin’ny Baibolinao ny andinin-teny rehetra vakina. Tsara koa ny mandray an-tsoratra kely. Tokony hiara-mipetraka ny fianakaviana, mba ho afaka hanampy ny zanany hifantoka ny ray aman-dreny. (Ohab. 29:15) Afaka miresaka izay nisongadina nandritra ny fandaharana ianareo, isan-kariva. Azonareo averina amin’ny Fotoam-pivavahan’ny Fianakaviana ireo hevitra tokony hampiharina, mba ho velombelona foana ianareo na dia aorian’ny fivoriambe aza.
4. Ahoana no azontsika anampiana ny hafa, mba hahazo famelombelomana?
4 Ampio ny hafa: Tiantsika hampiana koa ny hafa mba hahazo famelombelomana. Misy zokiolona na mpitory hafa mila fanampiana ve eo anivon’ny fiangonanareo, mba hahafahany hanatrika fivoriambe? Afaka manampy azy ireny ve ianao? (1 Jaona 3:17, 18) Tokony hojeren’ny anti-panahy, indrindra fa ny mpiandraikitra ny andia-mpitory, raha mahazo fanampiana ireny mpitory ireny.
5. Ahoana no hizarantsika an’ireo fanasana ho amin’ny fivoriambe? (Jereo koa ny efajoro etsy ambony.)
5 Hanao ezaka manokana hizarana fanasana indray isika, roatokombolana alohan’ny fivoriambe. Tokony hataon’ny fiangonana tanjona ny hizara ny fanasana rehetra sy hamita faritany faran’izay betsaka. Raha tsy lany ny fanasana nalain’ny fianakavianao, dia ento eny amin’ny fivoriambe ny ambiny. Azo anaovana fitoriana tsy ara-potoana izy ireny. Horesahina ny zoma amin’ny fivoriambe ny fomba hanaovana izany. Omeo ny mpikarakara ny mpanatrika izay tsy hampiasainareo, rehefa eny amin’ny fivoriambe. Makà iray ho anao manokana, satria hilaina izany amin’ny lahateny famaranana ny alahady.
6. Ahoana avy no hanehoantsika fanajana eny amin’ny fivoriambe?
6 Manehoa fanajana: Maro izao ny olona “tia tena” sy tsy miraharaha ny hafa. (2 Tim. 3:2) Mamelombelona kosa ny miaraka amin’ny Kristianina izay miezaka manaja ny olon-kafa! Maneho fanajana isika raha miditra amim-pilaminana, rehefa mivoha ny vavahady amin’ny valo ora maraina. Ireo miray trano na fiara amintsika, na ny olona ampianarintsika Baiboly ihany no tokony hamandrihantsika toerana. Manaraka ny torohevitry ny mpanolotra fandaharana koa isika, ka mamonjy toerana rehefa manomboka ny mozika fanokafana. Maneho fanajana isika raha tsy avelantsika hanelingelina ny hafa ny findaintsika. Miezaka isika mba tsy hiresadresaka, handefa hafatra an-telefaonina, hihinan-javatra, na handehandeha tsy amin’antony mandritra ny fandaharana.
7. Inona no hanampy antsika hahazo famelombelomana sy hamelombelona ny hafa?
7 Namana maro mamelombelona: Amin’ny fivoriambe no tena ahitana hoe mpirahalahy miray saina tokoa ny Kristianina! (Sal. 133:1-3) Maninona àry raha miezaka mifankahalala amin’ireo rahalahy sy anabavy avy any amin’ny fiangonana hafa ianao, ka ‘manalalaka ny fonao’? (2 Kor. 6:13) Azonao atao tanjona ny hamantatra fianakaviana iray na olona iray isan’andro, fara fahakeliny. Azo atao tsara izany amin’ny fiatoana antoandro. Mitondrà àry sakafo maivana, mba ho afaka hifanerasera amin’ny hafa ianao fa tsy handeha hividy na hisakafo any an-toeran-kafa. Mety hahita namana vaovao, izay hiraiki-po aminao mandrakizay, ianao.
8. Nahoana isika no tokony hanao asa an-tsitrapo, ary ahoana no azontsika andraisana anjara amin’izany?
8 Tena mamelombelona ny miara-miasa amin’ireo namantsika manao ny fanompoana masina! Afaka miara-miasa amin’ny sampan-draharaha iray ve ianao, na manampy ny fiangonanareo amin’ny anjara fanadiovana? (Sal. 110:3) Raha mbola tsy nahazo fanendrena ianao, dia manatòna ny Sampan-draharahan’ny Fanompoana An-tsitrapo, eny amin’ny fivoriambe. Vao mainka mahafinaritra sy mora vita ny asa rehefa maro ny mpandray anjara!
9. Nahoana isika no tokony hitondra tena tsara sy hanao fitafy mendrika, mandritra ny fivoriambe?
9 Tokony hiavaka ny fitondran-tenantsika: Mandritra ireo telo andro manontolo isika no mila mitondra tena tsara, fa tsy hoe rehefa manaraka ny fandaharana ihany. Tokony ho hitan’ireo mpitazana fa tena hafa noho ireo olona tsy Vavolombelona isika. (1 Pet. 2:12) Tokony hanome voninahitra an’i Jehovah ny fitafiana sy taovolontsika, any amin’ny fivoriambe sy toerana ilasiana ary hotely. (1 Tim. 2:9, 10) Anaovy foana ny karatry ny fivoriambe, dia ho fantatry ny olona fa Vavolombelon’i Jehovah isika. Mety ho afaka hiresaka momba ny fivoriambe isika amin’izay, na hitory tsy ara-potoana.
10. Milazà fitantarana ahitana fa misy vokany ny fitondran-tena tsara.
10 Voamariky ny olona ve ny fitondran-tena tsarantsika rehefa fivoriambe? Nilaza toy izao tao amin’ny gazety iray ny tompon’andraikitry ny toerana iray nanaovana fivoriambe: “Tena mahalala fomba ry zareo. Faly be izahay rehefa tonga eto ry zareo, isan-taona!” Very tao amin’ny hotely ny poketran’ny lehilahy iray tsy Vavolombelona, tamin’ny herintaona. Nisy nanatitra tao amin’ny tompon’andraikitr’ilay hotely ilay poketra, sady tsy nisy very ny tao anatiny. Hoy ilay tompon’andraikitra tamin’ilay lehilahy: “Soa ihany fa nanao fivoriambe tetỳ akaiky tetỳ ny Vavolombelon’i Jehovah, ary feno azy ireo ny hotely. Raha tsy izany ianao tsy nahita ny poketranao intsony!”
11. Inona no tokony ho tanjontsika amin’ity fivoriambe ity, ary nahoana?
11 Vetivety dia ho avy indray ny fivoriambe. Be dia be ny ezaka natao sy ny fotoana lany nanomanana azy io, mba tena hamelombelona ilay fandaharana. Ataovy àry izay hanatrehana an’ireo telo andro. Aoka ianao ho vonona handray an’izay nomanin’i Jehovah sy ny fandaminany ho anao! Miezaha koa hamelombelona ny hafa, ka manehoa fanajana, mifandraisa amin’ireo rahalahy sy anabavy, ary tandremo tsara ny fitondran-tena. Hoy ny anabavy iray rehefa avy nanatrika fivoriambe tamin’ny herintaona: “Iny no fotoana nahafinaritra ahy indrindra hatramin’izay!” Izany koa no ho tsapanao, raha miomana tsara ianao.
[Teny notsongaina, pejy 4]
Hanao ezaka manokana hizarana fanasana indray isika, roatokombolana alohan’ny fivoriambe
[Teny notsongaina, pejy 6]
Tokony hanome voninahitra an’i Jehovah ny fitafiana sy taovolontsika, any amin’ny fivoriambe sy toerana ilasiana ary hotely
[Teny notsongaina, pejy 7]
Miezaha hamelombelona ny hafa, ka manehoa fanajana, mifandraisa amin’ireo rahalahy sy anabavy, ary tandremo tsara ny fitondran-tena
[Efajoro, pejy 4-7]
Fampahatsiahivana Momba ny Fivoriambe 2011
◼ Fandaharam-potoana: Hanomboka amin’ny 9.20 maraina foana ny fivoriambe mandritra ny telo andro. Hivoha amin’ny 8.00 maraina ny vavahady. Tokony hipetraka daholo isika rehefa mandeha ny mozika fanokafana. Hanomboka amim-pilaminana ny fandaharana amin’izay. Hirava amin’ny 4.55 hariva ny fivoriambe ny zoma sy asabotsy, ary amin’ny 3.40 hariva ny alahady.
◼ Famandrihan-toerana: Izay olona miray fiara na trano aminao ihany, na ny olona ampianarinao Baiboly, no azonao amandrihana toerana.—1 Kor. 13:5.
◼ Sakafo antoandro: Iangaviana ianareo hitondra sakafo antoandro, fa tsy hitady sakafo any ivelan’ny toerana anaovana fivoriambe. Azo atao ny mitondra harona kelikely azo apetraka ao ambany seza. Tsy azo atao kosa ny mitondra harona lehibe loatra sy zavatra mora vaky.
◼ Fanomezana: Afaka mampiseho ny fankasitrahantsika ny fivoriambe isika, ka mandrotsaka fanomezana an-tsitrapo ho an’ny asa maneran-tany rehefa eny amin’ny fivoriambe.
◼ Raha misy loza na marary: Ilazao ny mpikarakara ny mpanatrika raha misy olona marary tampoka na maratra ka mila fitsaboana maika. Io rahalahy io kosa no hampandre avy hatrany an’ireo ao amin’ny fitsaboana vonjimaika. Izy ireo no hijery izay mahazo an’ilay olona sy hikarakara azy. Hitady fanampiana izy ireo, raha ilaina izany.
◼ Fanafody: Raha mila mihinam-panafody tsy tapaka ianao, dia ento eny amin’ny fivoriambe ilay izy satria tsy hanana azy io ny fitsaboana vonjimaika.
◼ Kiraro: Voamarika fa maro ny olona iharan-doza isan-taona satria tsy mety tsara ny kirarony. Mifidiana àry kiraro mendrika sy antonona anao tsara, sady mora andehanana amin’ny tohatra na vatovato na lalana malama.
◼ Taratasy Tsidiho Azafady: Tokony hosoratana ao amin’ilay taratasy hoe Tsidiho Azafady (S-43) ny mombamomba ny olona nitoriana tsy ara-potoana nandritra ny fivoriambe, ka nihaino tsara. Tokony hitondra iray na roa amin’io taratasy io any amin’ny fivoriambe ny mpitory. Omeo ny mpitan-tsoratry ny fiangonana ilay izy rehefa feno.—Jereo Ny Fanompoantsika Ilay Fanjakana Novambra 2009, pejy 4.
◼ Hotely fisakafoana: Aoka ianareo ho tsara fitondran-tena any amin’ny hotely mba hanomezam-boninahitra ny anaran’i Jehovah.
◼ Asa an-tsitrapo: Misy asa tsy maintsy atao eny amin’ny fivoriambe. Ho sambatra kokoa isika raha manolo-tena manao ireny asa ireny. (Asa. 20:35) Tokony hanatona ny Sampan-draharahan’ny Fanompoana An-tsitrapo eny amin’ny fivoriambe izay te hanao izany. Afaka mandray anjara koa ny ankizy latsaka ny 16 taona, saingy tsara raha misy olon-dehibe manara-maso azy. Ohatra hoe ny rainy na ny reniny, na olon-kafa nahazo alalana tamin’izy ireo.
[Efajoro, pejy 5]
Ahoana no Hizarana Ilay Fanasana?
Ataovy fohy ny teninao, mba ho vita daholo ny faritany. Azonao atao ny milaza hoe: “Manahoana ô! Manao ezaka manokana izahay maneran-tany, mba hizarana an’ity fanasana ity. Intỳ ny anjaranao. Efa voalaza ao ny fanazavana momba an’ilay izy.” Natao hanairana ny sain’ny olona ny pejy voalohany amin’ilay fanasana, ka ataovy mitodika any aminy ilay izy rehefa manolotra azy ianao. Aoka ianao hafana fo. Atolory ireo gazety raha azo atao, rehefa mizara fanasana amin’ny faran’ny herinandro.