Ampy ve ny Fanompoana Ataoko?
1. Inona no mety hahakivy ny Kristianina tsy mivadika?
1 Efa nanontany an’izany ve ianao? Nihena angamba ny fanompoanao noho ny fandrosoan’ny taona, ny aretina, na ny andraikitra ara-pianakaviana, ka kivy ianao. Nanoratra ny anabavy manan-janaka telo fa matetika izy no manamelo-tena satria lany amin’ny fikarakarana ny fianakaviany ny fotoanany sy ny heriny, ka tsy dia mahavita manompo izy. Inona no hanampy antsika hahay handanjalanja?
2. Inona no antenain’i Jehovah amintsika?
2 Tsy mitaky be loatra i Jehovah: Azo inoana fa te hanompo bebe kokoa isika rehetra. Matetika anefa no tsy araka izay tiantsika hatao ny tena azontsika atao. Na izany aza, raha te hanompo bebe kokoa isika, dia efa midika izany fa tsy hoe malaina na tsy miraika isika. Tokony hotadidintsika fa fantatr’i Jehovah tsara ny fetran’ny tenantsika ary tsy mitaky mihoatra noho izay azontsika atao izy. (Sal. 103:13, 14) Inona àry no antenain’i Jehovah amintsika? Ny hanompo azy amin’ny fo manontolo, ka hanome azy ny tsara indrindra.—Kol. 3:23.
3. Ahoana no ahafantarantsika izay fanompoana tokony ho vitantsika?
3 Ahoana no hamantarantsika izay fanompoana tokony ho vitantsika? Afaka mangataka an’i Jehovah isika mba hanampy antsika handini-tena amin’ny saina tsy miangatra. (Sal. 26:2) Mety ho azo anontaniana koa ny namana matotra atokisantsika, izay mahalala antsika tsara sy tsy matahotra manitsy antsika. (Ohab. 27:9) Mety hiova ihany koa ny toe-javatra misy antsika, ka tsara foana ny mandini-tena.—Efes. 5:10.
4. Ahoana no tokony handraisantsika an’ireo fampahatsiahivana momba ny fanompoana?
4 Natao hampahery fa tsy hanakivy: Matetika ny mpijery hazakazaka no mihorakoraka. Ny hampahery ny mpifaninana no tanjon’izy ireo fa tsy ny hanakivy azy. Toy izany koa fa mampahatsiahy antsika foana ny fivoriana sy ireo bokintsika mba ‘hitory ny teny tsy misy hataka andro.’ (2 Tim. 4:2) Natao hampahery antsika izy ireny, fa tsy midika akory hoe tsy ampy ny ezaka ataontsika. Raha manao izay tsara indrindra vitantsika foana isika, dia afaka matoky fa hankasitraka ‘izay ataontsika sy ny fitiavana asehontsika’ i Jehovah.—Heb. 6:10.