‘Torio Amin’ny Fomba Feno ny Fanjakan’Andriamanitra’
1. Inona no hianarantsika amin’ny Fianarana Baiboly Ataon’ny Fiangonana manomboka amin’ny herinandron’ny 14 Martsa?
1 Ny boky ‘Torio Amin’ny Fomba Feno ny Fanjakan’Andriamanitra’ no hianarantsika amin’ny Fianarana Baiboly Ataon’ny Fiangonana, manomboka amin’ny herinandron’ny 14 Martsa 2011. Ny bokin’ny Asan’ny Apostoly no hazavaina ao amin’io boky io. Ho toy ny hoe iainanao mihitsy ny zavatra mahaliana voatantara ao, rehefa mamaky azy io ianao. Tsy natao hamakafakana ny andininy tsirairay ao amin’ny Asan’ny Apostoly ny boky Torio, fa mba hakana fianarana avy amin’ireo tantara ao sy hanampiana antsika hampihatra an’izany.—Rom. 15:4.
2. Hazavao ny lafiny mampiavaka an’ilay boky Torio.
2 Lafiny mampiavaka an’ilay boky: Misy taratasy mampahery avy amin’ny Filan-kevi-pitantanana ao amin’ny pejy 2 amin’izy io. Voaresaka ao fa tian’izy ireo handray soa avy amin’ilay boky isika. Manomboka eo amin’ny toko 2, dia omena eo am-piandohan’ireo toko ny hevi-dehibe, sy ny ampahany ao amin’ny Asan’ny Apostoly hodinihina ao amin’ilay toko. Misy efajoro miresaka momba ny olona, ny toerana, na ny zava-nitranga voaresaka ao amin’ny Asan’ny Apostoly, ao amin’ny ankamaroan’ireo toko. Lehibe ny sisim-pejy ka azontsika anoratana. Misy sary be tsipiriany koa ao, izay manampy antsika haka sary an-tsaina an’ilay tantara. Misy fanondroana sary any amin’ny pejy farany, manazava an’ireo sary samihafa. Misy sarintany koa ny fonony anatiny amin’izy io. Manampy antsika izy ireny haka sary an-tsaina hoe hatraiza no nandehanan’ireo mpiara-manompo tamin’ny taonjato voalohany, rehefa nampiely ny vaovao tsara ‘tany amin’ny faritra lavitra indrindra amin’ny tany’ izy ireo.—Asa. 1:8.
3. Inona avy ireo fanontaniana lehibe ho voavalintsika, rehefa hianatra ny bokin’ny Asan’ny Apostoly isika?
3 Mamaly fanontaniana lehibe: Ho haintsika ny valin’ireo fanontaniana lehibe momba ny fanompoana kristianina, rehefa mandinika ny bokin’ny Asan’ny Apostoly isika. Anisan’izany, ohatra, ny hoe: Inona no asa sy hafatra mampiavaka ny tena mpanara-dia an’i Jesosy Kristy? Iza no mitarika an’io asa fitoriana atao maneran-tany io, ary amin’ny fomba ahoana? Inona no vokatry ny fanenjehana sy fanoherana teo amin’ireo mpitory? Inona no anjara asan’ny fanahy masina eo amin’ny fanompoantsika?
4. Inona no tokony hataontsika raha te handray soa be dia be amin’ny fianarana an’ilay boky isika?
4 Ianaro mialoha àry ilay boky ary miomana hanome valin-teny any am-pivoriana, mba handraisanao soa be dia be. Tongava foana mivory, ary saintsaino ny fomba azonao ampiharana izay nianaranao, eny amin’ny fanompoana. Enga anie ka handrisika antsika hitory ny Fanjakan’Andriamanitra amin’ny fomba feno ny fandinihana an’io boky io!—Asa. 28:23.