Tahafo ny Finoan’izy Ireo
1. Inona no hodinihintsika amin’ny Fianarana Baiboly, manomboka amin’ny herinandron’ny 19 Oktobra?
1 Ny boky Tahafo ny Finoan’izy Ireo no hampiasaintsika amin’ny Fianarana Baiboly Ataon’ny Fiangonana, manomboka amin’ny herinandron’ny 19 Oktobra 2015. Hazavaina ao ny tantaran’ny lehilahy sy vehivavy 14 nanam-pinoana ao amin’ny Baiboly. Natao hoatran’ny hoe iainantsika mihitsy ilay tantara rehefa nosoratana. Azontsika sary an-tsaina amin’izay ny zavatra niainan’izy ireo sy ny zava-tsarotra natrehiny rehefa nanompo an’i Jehovah. Hianarantsika ao koa ny lesona azontsika ampiharina avy amin’ny tantaran’izy ireo.—Heb. 6:12.
2. Resaho ny zavatra sasany mampiavaka an’io boky io.
2 Ny mampiavaka azy: Misy sarintany sy daty ao amin’ilay boky, mba hahafantarantsika ny toerana nisy an’ilay olona sy ny fotoana niainany. Manampy antsika hisaintsaina an’ilay tantara sy hampihatra an’izay nianarantsika ilay hoe “Eritrereto Izao”, ary misy azy io isaky ny toko tsirairay. Misy sary miloko tsara tarehy koa ao amin’ilay boky. Manampy antsika haka sary an-tsaina an’ilay tantara izy ireny, satria natao tamin’ny an-tsipiriany mihitsy. Nokarohina tsara koa izy ireny vao natao tao.
3. Inona no azontsika atao mba handray soa isika rehefa mianatra an’io boky io?
3 Nahoana izy io no mahasoa anao? Mampirisika antsika ny Filan-kevi-pitantanana eo am-piandohan’izy io hoe: “Alao sary an-tsaina ilay tantara. Ataovy toy ny hoe ianao mihitsy ilay olona, ka eritrereto izay tsapany sy izay hitany. Saintsaino koa hoe inona no ho nataonao raha ianao no teo amin’ny toerany.” Tsy manombantombana be fotsiny ilay hoe maka sary an-tsaina, fa mieritreritra an’ilay tantara ary miezaka maka ny toeran’ny olona ao. Mila fotoana sy fisaintsainana izany. (Neh. 8:8) Tokony hamintina ny lesona teo aloha mandritra ny 30 segondra na iray minitra aloha ny mpitarika, raha eny antenatenan’ny toko ilay fianarana no manomboka. Raha tsy tafiditra amin’ny lesona ianarana ilay hoe “Eritrereto Izao”, dia mety hametraka fanontaniana famerenana iray na roa izy, amin’ny farany.
4. Nahoana isika no mila mianatra ny boky Tahafo ny Finoan’izy Ireo?
4 Miezaka mandrava na mampihena ny finoantsika foana ity tontolo ity isan’andro. Te hanampy antsika hanana finoana matanjaka anefa i Jehovah, ka nanome an’io boky io. (Jak. 1:17) Mbola mitohy koa ny lahatsoratra “Tahafo ny Finoan’izy Ireo”, ao amin’ny Tilikambo Fiambenana. Atreho tsy tapaka àry ny Fianarana Baiboly Ataon’ny Fiangonana, ary manomeza valin-teny imbetsaka araka izay azonao atao. Handray soa be dia be ianao raha manao an’izany.