Efa Mpisava Lalana Maharitra ve Ianao Taloha?
1. Inona no tombontsoa nananan’ny maro taloha, nefa voatery nanao inona ny sasany?
1 An’arivony no nanana tombontsoa ‘hampianatra sy hitory ny vaovao tsara’ manontolo andro, nandritra ny taona maro. (Asa. 5:42) Voatery nijanona anefa ny sasany, noho ny antony samihafa. Efa mpisava lalana maharitra ve ianao taloha? Maninona raha dinihina indray ny fiainanao, sao afaka miverina manao mpisava lalana ianao?
2. Nahoana ireo efa nanao mpisava lalana taloha no tokony handinika ny fiainany indray?
2 Miova ny fiainana: Mety ho efa niova ilay toe-javatra nahatonga anao hijanona tsy ho mpisava lalana. Tsy tratranao angamba ilay 90 ora isam-bolana taloha. Sao dia afaka manao indray àry ianao izao, satria efa 70 ny ora takina? Ary sao dia tsy voatery miasa be intsony ianao, na tsy miantsoroka andraikitra mavesatra intsony? Nisy anabavy voatery nijanona tsy ho mpisava lalana satria narary. Nanohy indray anefa izy rehefa 89 taona. Tsy niditra hopitaly mantsy izy nandritra ny herintaona mahery, ka hitany fa afaka nanao mpisava lalana indray!
3. Inona no azon’ny mpianakavy atao raha efa mpisava lalana ny iray tamin’izy ireo taloha?
3 Mety ho tsy ianao no efa mpisava lalana taloha fa ny iray amin’ny mpianakavinao. Voatery nijanona angamba izy mba hikarakara fianakaviana, ohatra hoe ray aman-dreny be taona. (1 Tim. 5:4, 8) Afaka manampy àry ve ianao na ny mpianakavinao hafa mba hiverenany ho mpisava lalana indray? Maninona raha miara-mandinika izany ianareo? (Ohab. 15:22) Rehefa miara-miasa ny mpianakavy mba ho afaka hanao mpisava lalana ny iray aminy, dia azo lazaina hoe samy mandray anjara amin’ilay fanompoana izy rehetra.
4. Inona no azonao atao raha mbola tsy afaka miverina ho mpisava lalana ianao izao?
4 Aza kivy anefa raha tsy mamela anao hiverina ho mpisava lalana ny toe-javatra misy anao izao. Efa mahafaly an’i Jehovah ny mahita hoe vonona ianao. (2 Kor. 8:12) Ampiasao foana ny fahaizana azonao fony ianao mpisava lalana. Resaho amin’i Jehovah ny fanirianao, ary manaova fanitsiana raha vao afaka manao izany ianao. (1 Jaona 5:14) Mety hanokatra “varavarana lehibe” ho anao i Jehovah any aoriana any, ka ho faly ianao hanao mpisava lalana indray!—1 Kor. 16:9.