Ho Afaka ny Hiverina Amin’ny Laharan’ny Mpisava Lalana Indray ve Ianao?
1 Tao anatin’ireo dimy taona farany, dia mpisava lalana maharitra an’arivony maro no nahita fa voatery niala tamin’ny laharan’ny mpisava lalana izy ireo. Iray tamin’izy ireo ve ianao? Raha izany no izy, dia tsy isalasalana fa nanana antony namoizana io tombontsoa io ianao. Angamba izany zavatra tsy nampoizina sady tsy azonao anoharana. Mbola misy ve io antony io? Raha nitaky ny hijanonanao ny zava-nanahirana ara-pahasalamana na ara-bola, na ireo adidy ara-pianakaviana, efa nihatsara ve ny toe-javatra misy ianao? Afaka ny hanao fanitsiana sasany mety, izay hamela anao hifaly indray amin’ireo fitahiana entin’ny asan’ny mpisava lalana maharitra ve ianao? Efa nieritreritra ny hanao fangatahana indray ve ianao?
2 Araka ny fantatrao, dia ilaina ny fanaovana fandaminana tsara sy fandaharam-potoana amim-pitandremana raha ta hahomby amin’ny maha-mpisava lalana ny tena. Na dia tsy misy fotoana betsaka ho amin’ny fialam-boly aza mazàna, dia hita matetika fa mahafa-po sy ahitana valisoa kokoa ireo fe-potoana fialan-tsasatra fohy ananan’ny mpisava lalana. (Ohab. 19:17; Asa. 20:35). Rehefa be atao hatrany amin’ny asa fanompoana ianao dia voaro amin’ny fitaoman’ny tsy fitadiavana afa-tsy ny tombontsoan’ny tena manokana sy ny fomba fiaina mora sy mahafinaritra toy izay tadiavin’izao tontolo izao. I Jehovah dia nampanantena fa hampanankarena anao ara-panahy raha mandà tena sy mametraka ny tombontsoan’ilay Fanjakana eo amin’ny toerana voalohany ianao. Azo antoka fa hahita fifaliana sy fahafaham-po marina ianao amin’ny fanompoana an’i Jehovah amin’ny fo manontolo. — Ohab. 10:22; Kol. 3:23, 24.
3 Tokony hoheverina ho tombontsoa misokatra ho an’olona manokana vitsy monja ve ny fanompoana manontolo andro? Tsia. Noho ny voady nataontsika hanokana ny fiainantsika ho an’i Jehovah, dia tokony hihevitra amim-pitandremana ny fanompoana manontolo andro ny Kristiana rehetra, raha tsy hoe tsy mamela azy hanao izany angaha ny toe-javatra misy azy. — Marka 12:30.
4 Raha miharihary fa tsy mamela anao hanao ny asan’ny mpisava lalana ny fahasalamanao sy ireo andraikitra araka ny Soratra Masina amin’izao fotoana izao, dia afaka mahazo toky ianao fa mahafantatra sy mahazo izany i Jehovah. Hamaly soa anao izy noho ny fahatokianao amin’izay amelan’ny toe-javatra misy anao atao. (1 Kor. 4:2; 2 Kor. 8:12). Raha toa ka mety aminao anefa ankehitriny ny hanao ny asan’ny mpisava lalana indray, nahoana no tsy manatona ny mpiandraikitra prezidà mba hangataka taratasy fanaovana fangatahana?
5 Afaka mitondra fanampiana ve ny fianakavianao? Mety ho niala tamin’ny laharan’ny mpisava lalana ianao satria nila nisahana adidy ara-pianakaviana. Amin’ny toerana izay ahafahany mitondra fanampiana ve ankehitriny ny mpianakavy hafa mba hahafahanao hiverina amin’ny asan’ny mpisava lalana indray? Ho an’ny sasany, noho ny fanampiana kely fotsiny amin’ny fiantsorohana ireo andraikitra sasany, dia azo atao indray ny asan’ny mpisava lalana.
6 Ny fiaraha-miasa tsara sy ny ezaka kely fanampiny avy amin’ny mpianakavy hafa dia mety hahatonga izany hety. Mety haka ny endriky ny fanampiana amin’ny vola na amin’ny fitaterana izany, ary koa amin’ny fanaovana fotoana tsy tapaka mba hiara-miasa amin’ny fanompoana. Azo inoana fa misy fomba hafa ahafahan’izy ireo mitondra ny fanampiany. Raha tsy mamela anao hanomboka indray io tombontsoam-panompoana io ny toe-javatra misy anao, dia angamba azo omena ny mpianakavy hafa, izay ho afaka hanao azy io izany fanampiana izany.
7 Nahoana no tsy miara-mandinika io raharaha io amin’ny maha-fianakaviana? Ho tsara raha hataonareo ho tanjon’ny fianakaviana ny mety hisian’ny mpianakavy iray ho tonga mpisava lalana. Raha misy anankiray azo anampy eo amin’ny laharan’ny mpisava lalana, dia ny ankohonana manontolo no ho afaka hahatsapa ara-drariny fa mandray anjara amin’izany. Izany toe-tsaina malala-tanana izany dia tsy hoe hampitombo fotsiny ny fanambarana ilay Fanjakana ao amin’ny faritany, fa hitarika koa ny fianakaviana hifanakaiky ara-panahy kokoa. — Lioka 6:38; Fil. 2:2-4.