Vola Madinika Roa Kely Vidy

Anisan’ny fomba lehibe anohanantsika ny asan’ilay Fanjakana ny fanomezantsika vola ho an’ny asa fitoriana maneran-tany. Ahoana anefa raha tsy dia manam-bola isika?

Nahatazana mpitondratena nandrotsaka vola madinika roa faran’izay kely vidy tao amin’ny vatan’ny tempoly i Jesosy, indray mandeha. ‘Nahantra’ io vehivavy io, nefa nanome “izay rehetra nananany” izy, izany hoe “ny fivelomany rehetra”, noho ny fitiavany an’i Jehovah. (Mar. 12:41-44) Sarobidy tamin’Andriamanitra ny fanomezana nataon’io vehivavy io, matoa niresaka momba azy io i Jesosy. Nanohana ara-bola ny fanompoana koa ireo Kristianina voalohany. Tsy nihevitra izy ireo hoe ny manankarena ihany no tokony hanome. “Nahantra be”, ohatra, ireo Makedonianina nefa nilaza ny apostoly Paoly fa ‘niangavy mafy tsy an-kijanona izy ireo mba hahafahany haneho hatsaram-panahy’, izany hoe hanao fanomezana.—2 Kor. 8:1-4.

Raha ‘vola madinika roa kely vidy’ fotsiny àry no azontsika atao fanomezana, dia tokony hotadidintsika fa ny kely mitambatambatra no manome be. Ho faly ilay Raintsika malala-tanana any an-danitra, raha manao fanomezana vokatry ny fo isika, satria “ny mpanome amim-pifaliana no tian’Andriamanitra.”—2 Kor. 9:7.