Mahasoa Anao Ireo Boky Nosoratan’i Jeremia Mpaminany
1. Inona ilay boky azontsika tamin’ny fivoriamben’ny vondrom-paritra 2010, ary ahoana no hampiasantsika azy io?
1 Faly erỳ isika nahazo an’io boky io tamin’ny Fivoriamben’ny Vondrom-paritra 2010 hoe “Miezaha ho Akaiky An’i Jehovah Foana.” Asongadin’io boky io fa ilaintsika eo amin’ny fiainana andavanandro ny zavatra resahin’ny bokin’i Jeremia sy Fitomaniana. (Rom. 15:4) Hianarantsika amin’ny Fianarana Baiboly izy io manomboka amin’ny herinandron’ny 5 Novambra 2012.
2. Nahoana no mahasoa antsika ny mandinika ny bokin’i Jeremia sy Fitomaniana?
2 Mahasoa antsika: Naminany nandritra ny fotoana feno hotakotaka tao Joda i Jeremia. Nieritreritra izy tamin’ny voalohany hoe tsy hainy ny asa nanendrena azy. (Jer. 1:6) Nanenjika azy ny olom-pantany tao Anatota, tanàna niaviany, ary nanao toy izany koa aza angamba ny havany. (Jer. 11:21, 22) Tsy mahagaga àry raha kivy izy indraindray. (Jer. 20:14) Miatrika zava-tsarotra koa isika matetika rehefa mankatò ilay baiko ‘hanao mpianatra ny olona any amin’ny firenena rehetra’, ka mety hitovy fihetseham-po amin’i Jeremia. (Mat. 28:19) Hatoky tena sy hazoto amin’ny fanompoana anefa isika rehefa mandinika ireo boky nosoratan’i Jeremia.
3. Ahoana no hampiasantsika ireo lafiny mampiavaka ny boky Jeremia?
3 Ny mampiavaka azy io: Natao sora-mandry ny andinin-teny fototra, ary tokony hovakina mandritra ny fianarana. Misy fanontaniana natao sora-matevina amin’ny faran’ny fianarana isan-kerinandro. Natao hamerenana ny hevi-dehibe izy ireny. Misy sary tsara tarehy koa ao, ka azo ampiasaina rehefa hanome valin-teny.
4. Inona no tokony hataonao mba hitondra soa ho anao ny fandinihana ny boky Jeremia?
4 Hitondra soa ho anao ilay fianarana raha manomana mialoha ianao. Diniho izay azonao ampiharina eo amin’ny fiainanao sy eo amin’ny fanompoanao. Mazotoa manome valin-teny. Notahin’i Jehovah i Jeremia ka faly sy afa-po nanatontosa ny asa nanendrena azy. (Jer. 15:16) Enga anie ka hanampy antsika hahavita ny fanompoantsika toa an’i Jeremia ny fandinihana an’io boky io.