Manaova Mpianatra na dia Be Atao aza Ianao
1. Nahoana ny mpitory sasany no misalasala hanasa olona hianatra Baiboly?
1 Be atao ny mpitory sasany ka misalasala hanasa olona hianatra Baiboly. Mitaky fotoana ny mikarakara mpianatra, satria mila manomana ianao, mitarika ilay fampianarana, ary manampy ny mpianatra hiatrika olana. Nilaza ny apostoly Paoly fa tsy maintsy nahafoy tena izy mba hanampiana an’ireo Tesalonianina hahalala an’i Jehovah. (1 Tes. 2:7, 8) Ahoana no ahavitantsika mitarika fampianarana Baiboly na dia be atao aza isika?
2. Ahoana no ampiasantsika ny fotoanantsika raha tia an’i Jehovah isika?
2 Ilaina ny manokana fotoana hanompoana: Mitaky fotoana ny fanompoana. Mila manokana fotoana tsy tapaka, ohatra, isika mba hanatrehana fivoriana, hanompoana, hamakiana Baiboly, ary hivavahana. Mahafaly ny mpivady ny manokana fotoana iarahana, na dia be atao aza izy ireo. Vao mainka tokony hahafaly antsika ny ‘manararaotra’ fotoana mba hanompoana an’i Jehovah, satria tiantsika izy. (Efes. 5:15-17; 1 Jaona 5:3) Nilaza i Jesosy fa lafiny lehibe amin’ny fanompoantsika ny fanaovana mpianatra. (Mat. 28:19, 20) Tsy hiahotra hitarika fampianarana Baiboly isika rehefa misaintsaina an’izany.
3. Inona no azontsika atao raha manana olana isika, nefa tiantsika hitohy foana ilay fianarana?
3 Ahoana anefa raha tsy afaka mampianatra isika satria miasa, na marary lava, na be andraikitra eo anivon’ny fiangonana? Tsy maintsy mandeha lavitra ny mpitory sasany indraindray noho ny asany, ka mampiasa ordinatera na telefaonina mba hitarihana fampianarana. Misy indray tsy salama, ka asainy mankany an-tranony ny mpianany. Ny hafa kosa maniraka mpitory azo itokisana mba hampianatra an’ilay olona rehefa tsy afaka izy.
4. Inona no fitahiana ho azontsika raha mampianatra Baiboly isika?
4 Faly be i Paoly satria nanokana ny fotoanany sy ny heriny mba hanampiana ny hafa hahalala ny fahamarinana. (Asa. 20:35) Nisaotra an’i Jehovah izy rehefa nieritreritra ny vokatry ny asa mafy nataony tao Tesalonika. (1 Tes. 1:2) Vao mainka isika ho faly sy ho afa-po amin’ny fanompoana, raha mampianatra Baiboly foana na dia be atao aza.