Valin’ny Fanontanianareo

◼ Inona avy ny toro lalan’ny Baiboly mifandray amin’ny fampiasana finday rehefa mivory sy manompo?

“Ny zava-drehetra dia samy misy fotoana voatondro ho azy avy.” (Mpito. 3:1): Afaka mifampiresaka sy mifandefa hafatra amin’ny fotoana rehetra ny olona noho ny finday. Tsy te hohelingelenin’ny finday anefa ny Kristianina indraindray. Fotoana anompoana an’i Jehovah sy andraisana toromarika ary ifampaherezana, ohatra, ny fivoriana. (Deot. 31:12; Sal. 22:22; Rom. 1:11, 12) Tsara raha pihina ny finday rehefa tonga ao am-pivoriana ary rehefa miala ao vao jerena ny hafatra voaray. Raha tsy maintsy mamelona finday isika satria misy zavatra maika andrasantsika, dia tsy tokony hatao manelingelina ny hafa izany.

‘Ataovy noho ny vaovao tsara ny zava-drehetra.’ (1 Kor. 9:23): Ilaina indraindray ny mampiasa finday eny amin’ny fanompoana. Mety hampiasa finday, ohatra, ny rahalahy mitarika ny fitoriana mba hahafantarana an’izay misy ny mpitory hafa eo amin’ilay faritany. Mety hiantso ny olona liana na ny olona ampianariny Baiboly ny mpitory, alohan’ny hitsidihany azy, indrindra raha mipetraka lavitra ilay olona. Raha mitondra finday isika, dia tokony hitandrina mba tsy hanelingelina antsika ilay izy rehefa mitory amin’olona isika. (2 Kor. 6:3) Rehefa mifampiandry ny mpitory, tsy aleo ve mifantoka amin’ny fanompoana sy amin’ny mpitory hafa, toy izay hitelefaonina sy handefa hafatra?

Hajao ny hafa. (1 Kor. 10:24; Fil. 2:4): Tsy tokony hihevitra isika hoe tsy maninona raha tara amin’ny fivoriana alohan’ny fanompoana satria hoe afaka miantso olona na mandefa hafatra foana mba hahalalana ny faritany. Matetika no tsy maintsy averina alamina ny mpitory rehefa tara isika. Marina fa tara isika indraindray noho ny antony tsy azo anoarana. Rehefa zatra manaja fotoana anefa isika, dia mampiseho hoe manaja ny fandaharana nataon’i Jehovah sy ilay rahalahy mitarika ary ny mpitory namantsika.