Valin’ny Fanontanianareo
[Fanamarihana: Ampirisihinay ireo rahalahy sy anabavy manana telefaonina entin-tanana, mba hamaky ity lahatsoratra ity.]
◼ Inona no tokony hotadidintsika rehefa mampiasa telefaonina entin-tanana sy fitaovana fandraisana antso maika isika?
Manampy antsika hifandray amin’ny hafa, saika any amin’ny toerana rehetra mety hisy antsika, ny fitaovana toy ireny. Mety hahasoa izany. Tokony hitandrina anefa isika mba tsy hanelingelina ny fanompoantsika na ny fivoriana kristianina izy ireny. Ahoana no mety hahatonga izany?
Saintsaino ny mety ho vokany raha eo am-pitoriana isika no maneno ny telefaonintsika, na ny fitaovana hafa. Inona no mety hoeritreretin’ilay olona iresahantsika? Raha nanapaka ilay resaka isika ka namaly ilay antso, ahoana no mety hiheveran’ilay olona an’izany? Azo antoka fa tsy tiantsika ny hanao zavatra hanafintohina ireo mihaino ny hafatra momba ilay Fanjakana. (2 Kor. 6:3) Raha mitondra telefaonina entin-tanana, na fitaovana hafa àry isika eny amin’ny saha fanompoana, dia aoka hataontsika izay tsy hanapahan’izy io ny resatsika, na ny an’ny hafa.
Ahoana raha eo am-piandrasana ny hafa mamita ny anjarany isika? Tsy tokony hifantoka amin’ny fanompoana ve isika, rehefa nanokana fotoana ho amin’izany? Aoka hokarakaraina amin’ny fotoana hafa ny raharahan’ny tenantsika manokana, na ny raharaha ara-tsosialy, raha mbola azo ialana ihany. Hanaja ny fanompoana masina ataontsika isika amin’izay. (Rom. 12:7) Mazava ho azy, fa tsy mandrara ny fitoriana an-telefaonina, na ny antso handaminana fotoana hitsidihana akory izany.
Tokony hitandrina indrindra isika, raha sady mampiasa telefaonina entin-tanana no mitondra fiara. Nasehon’ny fanadihadiana mantsy fa mety hampidi-doza kokoa izany. Tokony harahintsika an-tsakany sy an-davany ny lalàna rehetra mikasika ny fampiasana telefaonina entin-tanana, rehefa mitondra fiara isika.
Tonga any amin’ny fivoriana kristianina sy ireo fivoriambe isika, mba hivavaka sy hampianarin’i Jehovah. Ekentsika fa masina ireny fotoana ireny. Moa ve izany tsy tokony hanosika antsika hanao izay tsy hanelingelenan’ny telefaonina entin-tanana sy ny fitaovana hafa antsika, na ny hafa? Tokony hiresaka any ivelan’ny toeram-pivoriana isika, raha misy zavatra ilana antsika maika. Ny tsara indrindra anefa, dia ny hikarakarantsika ny raharahantsika manokana sy ny raharaha tsy ara-pivavahana, amin’ny fotoana tsy misy fivoriana.—1 Kor. 10:24.
Aoka hasehontsika foana amin’ny fampiasantsika ny telefaonina entin-tanana sy ny zavatra elektronika hafa, fa miahy ny hafa isika ary tena mankasitraka ny zavatra ara-panahy.