Torio ny Hafatra Momba Ilay Fanjakana Isaky ny Afaka Manao Izany Ianao!

1. Inona no ianarantsika avy amin’i Davida?

¹ Tsy navelan’i Davida Mpanjaka hisakana azy tsy hanao zavatra ny toe-javatra nisy azy. Te hanorina trano ho an’i Jehovah, ohatra, izy. Rehefa tsy navela hanao an’izany izy, dia nanova ny tanjony ka nanangona fitaovana mba hanorenan’i Solomona ny tempoly. (1 Mpanj. 8:17-19; 1 Tan. 29:3-9) Naleony nifantoka tamin’izay azony natao toy izay tamin’izay tsy azony natao. Ahoana no anahafantsika an’i Davida rehefa mitady fomba hitoriana ny hafatra momba ilay Fanjakana isika?

2. Inona no azontsika dinihina?

² Ataovy izay azonao atao: Maro no nanatsotra ny fiainany mba hanaovana mpisava lalana mpanampy na maharitra. (Mat. 6:22) Afaka manao toa azy ireny koa ve ianao? Rehefa mandinika amim-bavaka ny toe-javatra misy anao ianao, dia mety hahita fa ‘misy varavarana lehibe misokatra ho amin’ny asa’ ho anao. Hararaoty izany.—1 Kor. 16:8, 9.

3. Inona no azontsika atao na dia tsy afaka manao ny asan’ny mpisava lalana aza isika?

³ Ahoana raha tsy afaka manao ny asan’ny mpisava lalana ianao? Aza avela handalo fotsiny ny fahafahana anananao. Raha mifanerasera amin’ny olona tsy Vavolombelona, ohatra, ianao amin’ny asanao, nahoana raha manararaotra mitory amin’izy ireny? Na raha marary ianao, nahoana raha manararaotra mitory amin’ny dokoteranao? Tadidio fa afaka mamerina tatitra ireo be taona na marary mafy, na dia 15 minitra monja aza no vitany nandritra ny volana. Ampidiro ao amin’ny tatitra ataonao isam-bolana ny fotoana nanaovanao fitoriana tsy ara-potoana, sy ny boky sy gazety napetrakao. Anisan’izany koa ny taratasy mivalona, fanasana Fahatsiarovana na fivoriambe. Ho gaga ianao hahita ny fitambaran’ireny fotoana jerena toa kely ireny!

4. Tapa-kevitra ny hanao inona ianao?

⁴ Aoka isika hanararaotra hitory ny vaovao tsara foana, na inona na inona toe-javatra misy antsika. Ho afa-po isika amin’izay, satria manao izay rehetra azontsika atao mba hampandrosoana ny asan’ilay Fanjakana.—Marka 14:8; Lioka 21:2-4.