Mitadiava Fomba Hitoriana
1 Samihafa ny toe-javatra misy ny olona eo anivon’ny fiangonana kristianina. Samy tapa-kevitra hidera an’i Jehovah anefa isika rehetra. (Sal. 79:13) Ahoana àry no ahitantsika fomba hitoriana ny vaovao tsara, raha tsy salama isika na manana olana hafa, ka voafetra ny mety ho vitantsika?
2 Isan’andro: Nanararaotra nitory tamin’ny olona nifaneraserany isan’andro i Jesosy. Niresaka tamin’i Matio izy, ohatra, rehefa nandalo tao amin’ny birao famorian-ketra. Niresaka tamin’i Zakaiosy koa izy rehefa nanao dia, ary tamin’ny vehivavy samaritanina iray rehefa niala sasatra. (Matio 9:9; Lioka 19:1-5; Jaona 4:6-10) Azontsika itoriana daholo koa ny olona miresaka amintsika isan’andro. Ho sahy hiresaka ny fanantenantsika isika raha mitondra Baiboly sy taratasy mivalona na bokikely.—1 Pet. 3:15.
3 Tsy dia afaka mitory isan-trano ve ianao, satria voafetra ny zavatra azon’ny vatanao atao? Hararaoty itoriana àry ny mpitsabo tonga mikarakara anao, sy ny olon-kafa ifaneraseranao. (Asa. 28:30, 31) Efa nanandrana nanao fitoriana an-taratasy ve ianao, raha tsy dia afaka mivoaka ny trano noho ny toe-javatra tsy azo anoarana? Manoratra tsy tapaka any amin’ny havany tsy Vavolombelona, ohatra, ny anabavy iray. Tantarainy amin’izy ireo ny zavatra mampahery hitany tao amin’ny Baiboly sy teny am-pitoriana.
4 Any am-piasana na any am-pianarana: Hitady fomba hamafazana ny voan’ny fahamarinana any am-piasana na any am-pianarana koa isika, raha maniry hidera an’i Jehovah. Notantarain’ny mpitory iray valo taona tamin’ny iray kilasy taminy, ny lahatsoratra iray momba ny volana, novakiny tao amin’ny Mifohaza! Lasa tia mandray Ny Tilikambo Fiambenana sy Mifohaza! ny mpampianatra azy, rehefa nahafantatra hoe taiza ilay mpitory no nahita an’ilay lahatsoratra. Mety hametraka fanontaniana koa ny mpiara-miasa amintsika, raha ataontsika talaky maso fotsiny ny boky Ampianarina. Ho afaka hitory aminy isika amin’izay.
5 Afaka mitady fomba hitoriana ve ianao isan’andro? Enga anie isika hahay hanararaotra ny toe-javatra misy antsika, ka hiezaka isan’andro “hanao sorona fiderana ho an’Andriamanitra.”—Heb. 13:15.