Ahoana no Atao Rehefa Mitory Amin’ny Toerana Be Olona?

Tena mandaitra ny mampiasa latabatra fampirantiana na tabilao azo afindrafindra, mba hitaomana ny olona tso-po. (Jaona 6:44) Nampirisihina àry ny anti-panahy mba handamina fitoriana any amin’ny toerana be mpandeha an-tongotra. Azo afindrafindra ilay tabilao na latabatra ka tsy voatery mangataka alalana any amin’ny manam-pahefana isika. Iza no afaka mandray anjara amin’io fitoriana io? Mpitory matotra sy misaina tsara, sady mahay miresaka amin’olona, ary maotina ny akanjony sy ny taovolony. Inona avy no tokony sy tsy tokony hatao amin’izany? Ireto misy hevitra vitsivitsy.

Tadidio izao:

Mitsikia ary arahabao ilay olona. Raiso tsara izay tonga eo, ary aoka ianao ho vonona hanampy foana. Raha misy mpandalo mijerijery eo, dia azonao ilazana izy hoe: “Afaka maka ianao raha tianao.”
Mijanòna lavidavitra an’ilay tabilao. Misy mpitory aza mihataka mihitsy, ka rehefa misy olona mijanona vao mankeo izy. Amin’izay mantsy ny olona tsy misalasala manatona. Miezaha hampiresaka an’izay mpandalo mijerijery an’ilay tabilao. Azonao anontaniana izy hoe: “Efa mba nieritreritra an’io fanontaniana io ve ianao?”
Mampiasà Baiboly foana raha mbola azo atao.
Hazavao amin’izay olona mandray taratasy mivalona fa afaka mianatra Baiboly izy. Asehoy azy ilay video hoe Nahoana Ianao no Tokony Hianatra Baiboly?, raha tsy atahorana ny manao izany.
Alaivo foana ny mombamomba an’izay olona liana, raha azo atao. Raha tsy ao amin’ny faritaninareo izy no mipetraka, dia fenoy ilay hoe Tsidiho Azafady (S-43), ary tonga dia omeo ny mpitan-tsoratra.