Tadidio Foana fa ny Hanao Mpianatra no Tanjontsika
1. Inona no ilaina atao raha tiana ho voavonjy ny olona?
1 Asehon’ny tatitra tamin’ny 2014 fa tena mazoto mitory ny vaovao tsara momba ilay Fanjakana isika. (Mat. 24:14) Vao mainka be dia be mihitsy ny olona itoriantsika, satria ankoatra ny fitoriana isan-trano, dia manao fitoriana eny amin’ny toerana be olona isika, sady manao ezaka manokana mba hizarana taratasy mivalona sy fanasana. Tsy ampy anefa izany raha tiantsika ho voavonjy ny olona, fa mila ampianarina Baiboly koa izy mba ho lasa mpianatr’i Jesosy.—1 Tim. 2:4.
2. Inona avy ny fanontaniana tokony hoeritreretintsika?
2 Miezaha foana hanomboka fampianarana: Mandray an-tsoratra tsara ve ianao rehefa mahita olona liana, ka mitsidika azy avy hatrany ary miezaka manomboka fampianarana Baiboly? Efa nandramanao ve ilay hoe manasa olona hianatra Baiboly dieny eo am-pitoriana? Asainao hianatra Baiboly koa ve ireo olona fanateranao gazety? Efa nasehonao tamin’ny mpiara-mianatra, mpiara-miasa, mpiray tanàna, havana, ary olom-pantatrao ve ilay video hoe Nahoana Ianao no Tokony Hianatra Baiboly? sy ilay hoe Ahoana no Atao Rehefa Mianatra Baiboly? Rehefa mampiasa tabilao azo afindrafindra ianao ka misy olona maka zavatra hovakina, hazavainao aminy ve fa azony atao ny mianatra Baiboly maimaim-poana?
3. Inona avy no ilaintsika, mba hahavitantsika tsara ny asa fampianarana?
3 Manampy antsika i Jehovah sy Jesosy: Rehefa naniraka antsika ‘hanao mpianatra’ i Jesosy, dia nilaza hoe “mandehana.” Mila miezaka sy mitady fomba hampianarana ny olona àry isika. Tsy namela antsika ho irery anefa izy fa nampanantena hoe homba antsika foana. (Mat. 28:19, 20) Manome antsika ny fanahy masina koa i Jehovah. (Zak. 4:6; 2 Kor. 4:7) Tsy vitan’izay fa omeny fitaovana tsara isika, sady ampiofaniny mba hahay hampianatra ny fahamarinana. Afaka mangataka aminy isika mba ho tia an’io asa lehibe io, sady hahavita hanatanteraka an’ilay izy.—Fil. 2:13.
4. Nahoana isika no tokony hitadidy foana hoe ny hanao mpianatra no tanjontsika?
4 Tena mahafinaritra ny mitory ny vaovao tsara. Vao mainka ho faly anefa isika rehefa mampianatra ny olona, ka manampy azy handeha amin’ilay “lalana mankany amin’ny fiainana.” (Mat. 7:14; 1 Tes. 2:19, 20) Ny tena zava-dehibe dia hoe mampifaly an’i Jehovah isika, satria “tsy tiany hisy ho ringana fa mba ho tonga amin’ny fibebahana kosa ny rehetra.” (2 Pet. 3:9) Tadidio foana àry fa ny hanao mpianatra no tanjontsika!