Ampiasao Tsara Ireo Zavatra Mampiavaka ny Boky Ampianarina

Hitombo sy hamoa ny zavamaniry raha ampy rano tsara. Handroso tsara koa ny mpianatra Baiboly rehefa mahalala sy mampihatra an’izay ianarany. (Sal. 1:1-3) Hanampy azy hanao izany isika, raha mampiasa tsara an’ireo zavatra sasany mampiavaka ny boky Ampianarina.

Ny fanontaniana eny am-piandohan’ny toko: Hovaliana ao amin’ilay toko ireo fanontaniana ireo. Vakio fotsiny izy ireny mba hampisaintsainana an’ilay mpianatra, amin’izay tsy andriny izay hianarana azy. Na asaivo milaza kely ny heviny izy isaky ny fanontaniana. Aza tonga dia ahitsy izy raha diso. Ho hitanao amin’izay lazainy hoe aiza no mila hamafisina rehefa mianatra ianareo.—Ohab. 16:23; 18:13.

Fanazavana Fanampiny: Raha efa azon’ny mpianatra sy ekeny ilay lesona, dia ampirisiho fotsiny izy hijery an’ilay fanazavana fanampiny. Rehefa mianatra amin’ny manaraka ianareo, dia manokàna fotoana kely mba hahazoana antoka hoe azony tsara ilay izy. Azo dinihina mandritra ny fianarana anefa ilay fanazavana fanampiny na ny ampahany aminy, raha ilaina izany. Vakio ireo fehintsoratra, ary apetraho izay fanontaniana efa nomaninao mialoha.

Famerenana: Hita ao amin’ilay famerenana any amin’ny faran’ny toko ny valin’ireo fanontaniana eny am-piandohana. Azonao ampiasaina izy io mba hahafantarana raha azon’ilay mpianatra ny fianarana, ary hainy ny manazava ny hevi-dehibe. Vakio miaraka aminy ny hevitra tsirairay sy ny andinin-teny. Asaivo hazavainy avy eo hoe nahoana ilay andinin-teny no manohana an’ilay hevitra.—Asa. 17:2, 3.