Tahafo Ireo Mpaminany: Habakoka
1. Nahoana no azontsika tsara ny zavatra tsapan’i Habakoka mpaminany?
1 Miharatsy foana ity tontolo ity, ka mety hitovy amin’izay tsapan’i Habakoka ny tsapantsika. Hoy izy tamin’i Jehovah: “Nahoana no ataonao mahita zava-dratsy aho, ary jerenao fotsiny ny faharatsiana?” (Hab. 1:3; 2 Tim. 3:1, 13) Hahavita hiaritra mandra-pahatongan’ny andro fitsaran’i Jehovah isika, raha misaintsaina ny tenin’i Habakoka sy ny finoany.—2 Pet. 3:7.
2. Ahoana no anehoantsika fa velona noho ny finoana isika?
2 Asehoy hoe velona noho ny finoana ianao: Tsy nitsetra tena fotsiny i Habakoka, fa niambina sy nanao zavatra ara-panahy foana. (Hab. 2:1) Nanome toky azy i Jehovah fa ho tanteraka ara-potoana ny teniny, ary ‘ho velona noho ny finoany ny olo-marina.’ (Hab. 2:2-4; Gal. 3:11) Efa tena akaiky ny farany. Ahoana àry ilay hoe velona noho ny finoana? Tsy dia zava-dehibe ny mahafantatra ny fotoana hahatongavan’ny farany. Aleo kosa mino hoe tsy maintsy ho tonga izy io. Hiambina sy hanao loha laharana ny fanompoana foana mantsy isika, raha manam-pinoana.—Heb. 10:38, 39.
3. Nahoana isika no tokony ho faly foana raha mbola manompo an’i Jehovah?
3 Aoka ianao hifaly amin’i Jehovah: Handalo fitsapana mafy ny finoantsika rehefa hanafika ny vahoakan’i Jehovah i Goga avy any Magoga. (Ezek. 38:2, 10-12) Fotoana mangidy foana ny ady, na ho an’izay handresy aza. Mety tsy ho ampy ny sakafo, na ho very ny fananana, na hidina be ny fari-piainana. Ahoana no hataontsika rehefa misy olana? Efa nanampo zava-tsarotra i Habakoka, ka niezaka izy mba ho faly foana raha mbola mpanompon’i Jehovah. (Hab. 3:16-19) Hanampy antsika hiaritra an’izay fitsapana ho avy koa “ny fifaliana avy amin’i Jehovah.”—Neh. 8:10; Heb. 12:2.
4. Inona no mahafaly antsika dieny izao sy amin’ny hoavy?
4 Mbola hianatra ny fitsipik’i Jehovah foana izay tafavoaka velona amin’ny andro fitsaran’i Jehovah amin’ny hoavy. (Hab. 2:14) Hianatra momba an’i Jehovah koa ireo hatsangana amin’ny maty. Enga anie isika dieny izao ka hanararaotra ny fotoana rehetra hiresahana momba an’i Jehovah sy ny asany mahatalanjona!—Sal. 34:1; 71:17.