‘Mandehana Amin’ny Finoana fa Tsy Amin’ny Hitan’ny Maso’

Nanoratra ho an’ny Kristianina ny apostoly Paoly taloha kelin’ny nanaovana fahirano sy nandravana an’i Jerosalema. Nilaza izy fa miaramilan’i Kristy izy ireo ka tokony hanampo zava-tsarotra, fa tsy hanao izay mahafinaritra azy sy izay mampetipety ny fiainany fotsiny. (2 Tim. 2:3, 4) Kely sisa dia hisy fahoriana be eto amin’ity tontolo ity, ka mila manana finoana matanjaka isika mba hifantoka amin’ny zavatra ara-panahy foana. (2 Kor. 4:18; 5:7) Jereo ilay video hoe ‘Mandehana Amin’ny Finoana fa Tsy Amin’ny Hitan’ny Maso’, ao amin’ny jw.org/mg. (Ao amin’ilay hoe ZAVATRA MISY > VIDEO) Mariho hoe nahoana no nahafaty an’i Nahama sy Abitala ny fitiavan-karena. Diniho avy eo ireto fanontaniana ireto:

1) Inona ‘ilay zava-maharikoriko mahatonga faharavana mitsangana ao amin’ny toerana masina’, tamin’ny taonjato voalohany, ary inona no tsy maintsy nataon’ny Kristianina tany Jerosalema haingana? (Mat. 24:15, 16) 2) Nahoana no nitaky finoana ilay niala tao Jerosalema? 3) Inona avy no tsy maintsy nafoin’izy ireo? 4) Nahoana i Nahama sy Abitala no nangataka andro? (Mat. 24:17, 18) 5) Inona koa ny fitsapana nahazo an’i Rahely, rehefa hiala tao Jerosalema izy? (Mat. 10:34-37; Mar. 10:29, 30) 6) Inona ny porofo fa tena nanam-pinoana sy natoky an’i Jehovah i Etana? 7) Inona ny zava-tsarotra niainan’ny Kristianina tany Pela? 8) Nahoana no nihena tsikelikely ny finoan’i Nahama sy Abitala? 9) Ahoana no nikarakaran’i Jehovah ny Kristianina tany Pela? (Mat. 6:33; 1 Tim. 6:6-8) 10) Ahoana no hanahafantsika an’i Abrahama sy Saraha amin’izao andro farany izao? (Heb. 11:8-10) 11) Inona foana no noeritreretin’i Nahama sy Abitala ka nahatonga azy hiverina tany Jerosalema, nefa nahoana izy ireo no diso hevitra? (Lioka 21:21) 12) Nanao ahoana, raha ny marina, ny fiainana tany Jerosalema, rehefa niverina tany i Nahama sy Abitala? 13) Nahoana isika izao no tsy maintsy manatanjaka ny finoantsika, dieny mbola tsy tonga ny farany?—Lioka 17:31, 32; 21:34-36.

Mandeha amin’ny finoana isika raha 1) matoky fa mahasoa foana ny tari-dalan’i Jehovah, 2) manaraka ny tari-dalany amin’izay ataontsika rehetra, ary 3) mampiseho hoe ny zavatra ara-panahy no sarobidy kokoa amintsika noho ny harena. Mandehana foana àry amin’ny finoana, ka matokia fa “mandalo izao tontolo izao sy ny faniriany, fa izay manao ny sitrapon’Andriamanitra no maharitra mandrakizay.”—1 Jaona 2:17.