Tsy Misy Afa-bela Amin’ny Vokatry ny Ady

Mety hisy ady tampoka any amin’ny toerana milamina. Mety hijaly na dia ny olona mipetraka any amin’ny tany lavitry ny ady aza, satria mifandray sy mifampiankina be mihoatra noho ny hatramin’izay izao tontolo izao. Ary na efa mifarana aza ny ady dia maharitra taona maro ny vokany. Diniho ireto ohatra ireto:

• 

  Mosary. Milaza ny Fandaharan’asa Momba ny Sakafo Eran-tany hoe: “Mbola ny ady no tena mahatonga mosary. Any amin’ny toerana misy ady sy herisetra no mipetraka ny 70 isan-jaton’ny olona tratran’ny mosary.”

• 

  Ratra ara-batana sy fikorontanan-tsaina. Mety hiady saina sy hitebiteby ny olona rehefa hatahorana hisy ady ao amin’ny faritra misy azy. Tsy vitan’ny hoe hatahorana kokoa haratra ny olona any amin’ny tany miady, fa hatahorana hikorontan-tsaina koa. Matetika anefa no sarotsarotra ny hahazoan’izy ireo fitsaboana.

• 

  Voatery mifindra toerana. Nilaza ny Vaomieran’ny Firenena Mikambana Mikarakara ny Mpitsoa-ponenana, tamin’ny Septambra 2023, hoe 114 tapitrisa mahery eran-tany no voatery nandao ny fonenany. Ny ady no tena mahatonga an’izany.

• 

  Olana ara-toe-karena. Rehefa misy ady, dia matetika no misy olana ara-toe-karena, ohatra hoe misondrotra ny vidim-piainana. Mety hijaly ny olona rehefa ampiasain’ny fanjakana hanohanana ny tafika ny vola, fa tsy hikarakarana ny fahasalamam-bahoaka, ny fampianarana, na ny toy izany. Vola be mihitsy koa no lany hanarenana ny simba, aorian’ny ady.

• 

  Simba ny tontolo iainana. Mijaly ny olona rehefa fanahy iniana simbana ny taniny. Mety hankarary mandritra ny taona maro ny rano sy ny rivotra ary ny tany rehefa voaloto. Mbola mampidi-doza koa ny vanja milevina, na dia efa ela be aza no nifarana ny ady.