LAHATSORATRA FIANARANA 42
HIRA 44 Vavaky ny Torotoro Fo
Hatsarao ny Vavaka Ataonao
“Miantso anao amin’ny foko manontolo aho ka valio, Jehovah ô!”—SAL. 119:145.
HEVITRA HODINIHINA
Hihatsara ny vavaka ataonao raha misaintsaina an’ireo vavaka ao amin’ny Baiboly ianao.
1-2. a) Nahoana isika no mety tsy hahavita hamboraka ny ao am-pontsika amin’i Jehovah rehefa mivavaka? b) Ahoana no ahalalantsika hoe mihaino tsara ny vavaka ataontsika i Jehovah?
MAHATSAPA ve ianao indraindray hoe miverimberina ny vavaka ataonao, na tsy tena avy amin’ny fo, na fahazarana fotsiny? Tsy ianao irery no hoatr’izany. Rotoroto be mantsy ny fiainana, dia mety ho lasa maimaika koa ny vavaka ataontsika. Mety ho sarotra amintsika aza ny hamboraka ny ao am-pontsika amin’i Jehovah, satria mahatsiaro ho tsy mendrika isika.
2 Manome toky antsika ny Baiboly hoe tsy ny teny ampiasaintsika no zava-dehibe amin’i Jehovah rehefa mivavaka isika, fa ilay izy avy amin’ny fo sy atao amim-panetren-tena. Mihaino “ny fitalahoan’ny mpandefitra” mantsy izy. (Sal. 10:17) Henoiny tsara ny teny tsirairay lazaintsika satria tena miahy antsika izy.—Sal. 139:1-3.
3. Inona avy ny fanontaniana hovaliantsika ato?
3 Hojerentsika ny valin’ireto: Nahoana isika no tsy tokony hisalasala hivavaka amin’i Jehovah? Inona no azo atao mba hisy heviny kokoa ny vavaka ataontsika? Nahoana no hihatsara ny vavaka ataontsika, raha misaintsaina an’ireo vavaka avy amin’ny fo ao amin’ny Baiboly isika? Ary ahoana no atao raha miady saina be isika ka tsy mahita holazaina rehefa mivavaka?
AZA MISALASALA MIVAVAKA AMIN’I JEHOVAH
4. Inona no hanampy anao tsy hisalasala hivavaka amin’i Jehovah? (Salamo 119:145)
4 Tsy hisalasala hivavaka amin’i Jehovah isika raha azontsika hoe namana tsy mivadika izy sady mitady an’izay hahasoa antsika. Niezaka ilay mpanoratra ny Salamo faha-119 mba ho hoatr’izany no fahitany an’i Jehovah. (Sal. 119:23, 69, 78) Tsy hoe tsy nanana olana mihitsy anefa izy. Nisy olona nanisy ratsy azy mantsy. Kivy koa izy indraindray satria nanao fahadisoana. (Sal. 119:5) Tsy nisalasala namboraka ny tao am-pony tamin’i Jehovah anefa izy.—Vakio ny Salamo 119:145.
5. Nahoana isika no tokony hivavaka foana na dia mahatsiaro ho tsy mendrika aza? Manomeza ohatra.
5 Asain’i Jehovah hivavaka aminy na dia ny olona nanao fahadisoana lehibe aza. (Isaia 55:6, 7) Tsy tokony havelantsika hisakana antsika tsy hivavaka amin’i Jehovah àry ilay isika mahatsiaro ho tsy mendrika. Eritrereto hoe mandeha any amin’ny toerana mbola tsy nalehanao mihitsy ianao, dia very. Misy olona mahay tsara an’ilay toerana anefa afaka manampy anao. Hisalasala ve ianao hanontany azy, satria hoe menatra fa very? Mazava ho azy fa tsia. Mety ho very hevitra koa isika indraindray, na hoe nisy fahadisoana nataontsika. Tsy tokony hisalasala hivavaka amin’i Jehovah anefa isika amin’izay.—Sal. 119:25, 176.
TIANAO HISY HEVINY KOKOA VE NY VAVAKA ATAONAO?
6-7. Nahoana no hisy heviny kokoa ny vavaka ataontsika raha misaintsaina ny toetran’i Jehovah isika? Manomeza ohatra. (Jereo koa ny fanamarihana ambany pejy.)
6 Hisy heviny kokoa ny vavaka ataontsika, raha mamboraka ny ao am-pontsika amin’i Jehovah isika. Resahintsika aminy izay tena ao an-tsaintsika sy izay any am-pontsika lalina any. Ahoana no anaovantsika vavaka hoatr’izany?
7 Saintsaino ny toetran’i Jehovah.a Raha misaintsaina ny toetran’i Jehovah isika, dia ho mora kokoa amintsika ny hamboraka ny ao am-pontsika aminy. (Sal. 145:8, 9, 18) Nahery setra be, ohatra, ny dadan’i Kristine. Hoy io anabavy io: “Tsy mora tamiko ny nino hoe Ray be fitiavana i Jehovah, dia lasa sarotra tamiko ny niresaka taminy. Nieritreritra aho hoe tsy mendrika noho ny fahadisoako, dia tsy ho tiany intsony.” Inona ny toetran’i Jehovah nanampy azy? Hoy izy: “Lasa natoky aho hoe tia ahy i Jehovah rehefa nosaintsainiko hoe be fitiavana sy tsy mivadika izy. Fantatro hoe tsy hanary ahy izy. Na dia manao fahadisoana aza aho indraindray, dia mbola ho tia sy hanampy ahy foana izy. Lasa mora kokoa amiko àry ny mamboraka aminy an’izay tena mahafaly ahy sy izay tena mampalahelo ahy.”
8-9. Inona no mahatsara an’ilay hoe saintsainina mialoha izay holazaina amin’ny vavaka? Manomeza ohatra.
8 Saintsaino izay holazainao. Eritrereto, ohatra, ireto rehefa hivavaka ianao: ‘Inona ny olana atrehiko amin’izao? Nisy olona nanao zavatra tsy nety tamiko ve ka mila mamela azy aho? Nisy zavatra niova ve teo amin’ny fiainako ka ilako ny fanampian’i Jehovah?’ (2 Mpanj. 19:15-19) Azonao arahina koa ilay vavaka modely, dia saintsaino hoe inona no azonao resahina amin’i Jehovah momba ny anarany, ny Fanjakany, ary ny sitrapony.—Mat. 6:9, 10.
9 Sarotra tamin’ny Ranabavy Aliska ny nivavaka rehefa fantany hoe voan’ny kanseran’ny atidoha ny vadiny, ary efa ho faty. Hoy izy: “Nalahelo be aho, dia lasa tsy hitako izay holazaina rehefa nivavaka.” Inona no nanampy azy? Hoy ihany izy: “Isaky ny hivavaka aho, dia saintsainiko mialoha izay holazaina amin’i Jehovah, amin’izay mba tsy ny momba ahy foana no resahiko. Lasa tony kokoa aho rehefa nanao an’izany, dia afaka niresaka zavatra isan-karazany tamin’i Jehovah.”
10. Nahoana isika no tsy tokony ho maimaika rehefa mivavaka? (Jereo koa ny sary.)
10 Aza maimaika. Mety hisy heviny ihany ny vavaka fohy, kanefa hahavita hamboraka an’izay any am-pontsika amin’i Jehovah isika raha tsy maimaika.b Hoy i Elijah, vadin’i Aliska: “Miezaka mivavaka imbetsaka aho mandritra ny andro, fa tsapako anefa hoe vao mainka akaiky an’i Jehovah aho rehefa mivavaka ela kokoa. Tsy hoe tsy andrin’i Jehovah akory izay hahavitan’ny vavaka ataontsika, dia izay no mahatonga ahy maka fotoana tsara.” Andramo àry izao: Mitadiava fotoana sy toerana ahafahanao mivavaka, na amin’ny feo avo aza, sady tsy misy manelingelina, dia ataovy fahazarana ny mivavaka ela kokoa.
Mitadiava fotoana sy toerana ahafahanao mivavaka ela kokoa (Fehintsoratra 10)
SAINTSAINO IREO VAVAKA AO AMIN’NY BAIBOLY
11. Nahoana no handray soa isika raha misaintsaina an’ireo vavaka vokatry ny fo ao amin’ny Baiboly? (Jereo koa ilay hoe “Azonao ve ny Fihetseham-pon-dry Zareo?”)
11 Mety hanampy anao ny misaintsaina ny vavaka sy ny hira na ny salamo ao amin’ny Baiboly. Hahavita hamboraka ny ao am-ponao amin’i Jehovah ianao, rehefa mandinika ny fomba nanaovan’ny mpanompony an’izany. Mety hahita hevitra vaovao hiderana an’i Jehovah koa ianao, ary mety hahita vavaka mifanaraka amin’ny zavatra iainanao mihitsy aza.
12. Inona avy ny fanontaniana azontsika eritreretina rehefa misaintsaina vavaka iray ao amin’ny Baiboly isika?
12 Rehefa mamaky vavaka iray ao amin’ny Baiboly ianao, dia saintsaino hoe: ‘Iza no nanao an’ity vavaka ity, dia inona ny zavatra niainany? Azoko ve ny fihetseham-pony? Inona no ianarako avy amin’ity vavaka ity?’ Mila manao fikarohana bebe kokoa angamba ianao mba hamaliana an’ireo, nefa tsy ho very maina ny ezaka ataonao. Diniho ireto ohatra ireto:
13. Inona no ianarantsika avy amin’ny vavak’i Hana? (1 Samoela 1:10, 11) (Jereo koa ny sary.)
13 Vakio ny 1 Samoela 1:10, 11. Niatrika olana lehibe roa i Hana tamin’izy nanao an’io vavaka io. Momba izy sady nampijaly azy ny rafivaviny. (1 Sam. 1:4-7) Inona no azonao ianarana avy amin’ny vavak’i Hana, raha tsy mety voavaha mihitsy ny olana atrehinao? Lasa maivamaivana izy rehefa nivavaka ela tamin’i Jehovah, ka namboraka ny tao am-pony. (1 Sam. 1:12, 18) Ho maivamaivana koa isika raha ‘apetratsika amin’i Jehovah izay manavesatra antsika’, izany hoe resahintsika aminy izay mampanahy antsika sy izay tsapantsika.—Sal. 55:22.
Momba i Hana sady nesoesoin’ny rafivaviny foana. Namboraka ny tao am-pony tamin’i Jehovah àry izy (Fehintsoratra 13)
14. a) Inona koa no azo ianarana avy amin’i Hana? b) Nahoana no hanatsara ny vavaka ataontsika ny misaintsaina ny Soratra Masina? (Jereo ny fanamarihana ambany pejy.)
14 Niteraka an’i Samoela i Hana, tatỳ aoriana, dia nentiny tany amin’i Ely Mpisoronabe ilay zaza taona vitsivitsy taorian’izay. (1 Sam. 1:24-28) Nanao vavaka vokatry ny fo izy, dia nolazainy tao hoe faly izy fa miaro sy mikarakara ny mpanompony tsy mivadika i Jehovah.c (1 Sam. 2:1, 8, 9) Nifantoka tamin’ny fitahiana nomen’i Jehovah azy i Hana, na dia mety hoe tsy nivaha tanteraka aza ny olana tao an-tranony. Inona no ianarantsika avy amin’izany? Hahavita hiatrika olana kokoa isika, raha ny fomba nanampian’i Jehovah antsika hatramin’izay no ifantohantsika.
15. Inona no azontsika ianarana avy amin’ny vavak’i Jeremia mpaminany, raha miaritra ny tsy rariny isika? (Jeremia 12:1)
15 Vakio ny Jeremia 12:1. Nisy fotoana i Jeremia mpaminany kivy, rehefa nahita hoe hoatran’ny miadana ny ratsy fanahy. Nisy vokany taminy koa ny fomba nitondran’ny Israelita azy. (Jer. 20:7, 8) Mety hahatsapa hoatr’azy isika, rehefa mahita olona manao ny tsy marina nefa tafita, na rehefa misy manesoeso antsika. Na dia namboraka ny alahelony aza i Jeremia, dia tsy nomeny tsiny mihitsy i Jehovah hoe nanao ny tsy rariny. Vao mainka izy natoky hoe manao ny rariny i Jehovah, rehefa hitany ny fomba nanitsiana an’ilay vahoaka mpikomy. (Jer. 32:19) Afaka mamboraka ny alahelontsika amin’i Jehovah koa isika, sady matoky hoe hanitsy ny tsy rariny iaretantsika izy amin’ny fotoana mety aminy.
16. Inona no azontsika ianarana avy amin’ilay Levita natao sesitany, raha voafetra ny azontsika atao? (Salamo 42:1-4) (Jereo koa ny sary.)
16 Vakio ny Salamo 42:1-4. Levita natao sesitany no nanoratra an’io hira io, ary tsy afaka nifanerasera tamin’ny Israelita namany izy. Hita amin’ilay salamo hoe inona no tsapany. Mety hahatsapa hoatr’azy koa isika rehefa tsy afaka mivoaka ny tranontsika, na migadra noho ny finoantsika. Mety hifamahofaho be ny fihetseham-pontsika. Tsara anefa raha resahintsika amin’i Jehovah ilay izy. Mety hanampy antsika hahazo tsara ny fihetseham-pontsika izany, sady hampahatsiahy antsika hoe inona no tena zava-dehibe. Tonga saina, ohatra, ilay Levita hoe mbola hahita antony hafa hiderana an’i Jehovah izy. (Sal. 42:5) Nosaintsaininy koa ny fomba nikarakaran’i Jehovah azy. (Sal. 42:8) Hanampy antsika hahazo tsara ny fihetseham-pontsika ny mivavaka amin’ny fo, sady hahatonga antsika ho tony sy hanana hery hiaretana.
Namboraka ny tao am-pony tamin’Andriamanitra ilay Levita nanoratra ny Salamo faha-42. Rehefa mamboraka ny fihetseham-pontsika amin’ny vavaka isika, dia mety ho haintsika hoe inona no tena zava-dehibe (Fehintsoratra 16)
17. a) Inona no azo ianarana avy amin’ny vavak’i Jona mpaminany? (Jona 2:1, 2) b) Nahoana no mety hanampy antsika ny teny sasany ao amin’ny Salamo rehefa miatrika olana isika? (Jereo ny fanamarihana ambany pejy.)
17 Vakio ny Jona 2:1, 2. Nanao an’io vavaka io i Jona mpaminany, tamin’izy tao an-kibon’ilay trondro be. Marina hoe tsy nankatò an’i Jehovah izy, nefa natoky izy hoe haheno ny feony Andriamanitra. Nampiasa teny be dia be tao amin’ny Salamo izy tao amin’ilay vavaka.d Tsy maintsy hoe hainy tsara ireny salamo ireny. Rehefa nisaintsaina an’ireny izy, dia lasa natoky hoe hanampy azy i Jehovah. Miezaha koa àry hitadidy andinin-teny. Mety hiverina ao an-tsainao ireny sady hampahery anao, rehefa mivavaka amin’i Jehovah ianao ao anatin’ny sarotra.
MIEZAHA FOANA HIFANDRAY AMIN’I JEHOVAH AMIN’NY ALALAN’NY VAVAKA
18-19. Mety ho sarotra amintsika indraindray ny milaza an’izay tsapantsika rehefa mivavaka. Nahoana anefa no manome toky antsika ny Romanina 8:26, 27? Manomeza ohatra.
18 Vakio ny Romanina 8:26, 27. Mety hahatsiaro ho tototry ny adin-tsaina isika indraindray, dia tsy mahita holazaina rehefa mivavaka. Tsy miady irery anefa isika. “Miangavy” ho antsika ny fanahy masina amin’ireny fotoana ireny. Inona no dikan’izany? Nampiasa ny fanahiny i Jehovah rehefa nampanoratra an’ireo vavaka be dia be ao amin’ny Teniny. Rehefa tsy mahita holazaina isika dia raisin’i Jehovah ho toy ny hoe ilay zavatra tiantsika hangatahina ny ao amin’ireny vavaka ireny, ary mety hovaliany ilay izy.
19 Izany no nanampy an’i Yelena, anabavy any Rosia. Nogadraina izy satria nivavaka sy namaky Baiboly. Nitebiteby be i Yelena, dia lasa sarotra taminy ny nivavaka. Hoy izy: ‘Rehefa niady saina aho ka tsy hitako izay holazaina tamin’ny vavaka, dia tadidiko hoe raisin’i Jehovah ho hoatran’ny hoe ilay zavatra saika hangatahiko mihitsy ireny vavaky ny mpanompony fahiny ireny. Tena nampionona ahy izany rehefa mafy ny nanjo ahy.’
20. Inona no hanampy anao hahavita hivavaka rehefa miady saina ianao?
20 Raha miady saina isika, dia mety tsy hahavita hifantoka rehefa mivavaka. Afaka manomana ny saintsika isika rehefa mihaino ny bokin’ny Salamo noraisim-peo. Azontsika soratana koa izay tsapantsika, hoatran’ny nataon’i Davida Mpanjaka. (Sal. 18; 34; 142; sy ny teny mampiditra azy.) Mazava ho azy fa tsy misy fitsipika hentitra momba ny hoe inona no fiomanana tokony hatao rehefa hivavaka. (Sal. 141:2) Ataovy àry izay mety indrindra aminao.
21. Nahoana isika no afaka mivavaka amin’ny fo manontolo?
21 Mampahery ny mahalala hoe efa azon’i Jehovah izay tsapantsika na dia mbola tsy miteny aza isika. (Sal. 139:4) Tiany anefa raha isika mihitsy no mamboraka ny fihetseham-pontsika aminy, sady mampiseho hoe matoky azy. Aza misalasala àry mivavaka amin’ilay Rainao any an-danitra. Afaka maka hevitra avy amin’ireo vavaka ao amin’ny Teniny ianao. Mivavaha amin’ny fo, dia resaho aminy izay mahafaly anao sy izay mampalahelo anao. Ho eo foana i Jehovah satria tena Namanao izy!
HIRA 45 Izay Saintsainiko ato Am-poko
a Jereo ilay hoe “Toetran’i Jehovah miavaka sasany” eo ambanin’ilay foto-kevitra hoe “Jehovah” ao amin’ny boky Andinin-teny Manampy Amin’ny Fiainantsika Kristianina.
b Fohy matetika ny vavaka ampahibemaso atao any am-pivoriana.
c Nampiasa teny mitovy amin’izay nosoratan’i Mosesy i Hana tao amin’ilay vavaka nataony. Hita avy amin’izany hoe tia nisaintsaina ny Soratra Masina izy. (Deot. 4:35; 8:18; 32:4, 39; 1 Sam. 2:2, 6, 7) Nampiasa teny mitovy be amin’izay nolazain’i Hana koa i Maria renin’i Jesosy tao amin’ilay vavaka nataony, taonjato maro tatỳ aoriana.—Lioka 1:46-55.
d Ampitahao amin’ny Jona 2:3-9, ohatra, ny Salamo 69:1; 16:10; 30:3; 142:2, 3; 143:4, 5; 18:6; ary 3:8. Milahatra araka ny teny nampiasain’i Jona tao amin’ilay vavaka ireo andininy ireo.