Mivavaha ho An’ny Hafa

1. Ahoana no ahalalantsika hoe zava-dehibe amin’i Jehovah ny vavaka ataontsika?

FANOMEZANA miavaka ny vavaka. Eritrereto ange e! Nanankinan’i Jehovah asa ny anjely. (Sal. 91:11) Nomeny andraikitra ngezabe koa ny Zanany. (Mat. 28:18) Fa ahoana ny amin’ilay hoe mihaino vavaka? Tsy nankininy tamin’iza na iza izany, fa izy mihitsy no nandray an-tanana an’ilay izy. I Jehovah, ilay “Mpihaino vavaka”, irery ihany no mihaino ny vavaka ataontsika.​—Sal. 65:2.

2. Ahoana no ahitana hoe tia nivavaka ho an’ny hafa ny apostoly Paoly?

² Afaka mamboraka an’izay mampanahy antsika amin’i Jehovah isika. Tokony hivavaka ho an’ny hafa koa anefa isika. Nanao an’izany ny apostoly Paoly. Nanoratra ho an’ny fiangonana tany Efesosy, ohatra, izy hoe: “Mivavaka ho anareo foana koa aho.” (Efes. 1:16) Ankoatra izay, dia nivavaka ho an’olona manokana i Paoly. Izao, ohatra, no nolazainy tamin’i Timoty: “Misaotra an’Andriamanitra aho, ... ary mahatsiaro anao foana aho rehefa mitalaho amim-bavaka andro aman’alina.” (2 Tim. 1:3) Nanana ny zavatra nampiady saina azy i Paoly, ary nivavaka momba an’izany. (2 Kor. 11:23; 12:7, 8) Tsy hadinony anefa ny nivavaka ho an’ny hafa.

3. Nahoana isika no mety hanadino hivavaka ho an’ny hafa?

³ Hadinontsika indraindray ny mivavaka ho an’ny hafa. Nahoana? Milaza antony iray ilay anabavy atao hoe Sabrina. a Hoy izy: “Rotoroto lava ny fiainana. Mety ho variana be amin’ny olana mahazo antsika isika, dia izay ilaintsika ihany no resahintsika amin’ny vavaka.” Manao hoatr’izany koa ve ianao indraindray? Raha izany, dia hanampy anao ity lahatsoratra ity. Hodinihintsika ato hoe: 1) Nahoana no tena ilaina ny mivavaka ho an’ny hafa, ary 2) ahoana no hanaovana an’izany?

NAHOANA ISIKA NO TOKONY HIVAVAKA HO AN’NY HAFA?

4-5. Nahoana no hoe “misy vokany be” ny vavaka atao ho an’ny hafa? (Jakoba 5:16)

⁴ “Misy vokany be” ny vavaka atao ho an’ny hafa. (Vakio ny Jakoba 5:16.) Mety hanova zavatra tokoa ve ny vavaka atao ho an’ny hafa? Ie. Efa fantatr’i Jesosy mialoha hoe handa azy ny apostoly Petera, dia izao no nolazainy: ‘Efa nitalaho ho anao aho mba tsy ho levona ny finoanao.’ (Lioka 22:32) Fantatr’i Paoly koa fa mety hanova zavatra ny vavaka. Izao no nosoratany tamin’i Filemona, tamin’izy nogadraina tsy ara-drariny tany Roma: ‘Manantena aho hoe hafahana ka ho tonga any aminareo indray, satria mivavaka ho ahy ianareo.’ (Filem. 22) Tsy ela tokoa i Paoly dia nafahana ka afaka nitory indray.

⁵ Mazava ho azy, fa tsy afaka manery an’i Jehovah hanao an’izay angatahintsika isika. Mahita an’izay mampanahy ny mpanompony mantsy izy, ary mety hifidy ny hanatanteraka ny fangatahan-dry zareo indraindray. Rehefa fantatsika izany, dia lasa te hivavaka mafy momba ny zavatra iray isika sady matoky hoe mahalala ny fomba tsara indrindra hamahana an’ilay olana i Jehovah.​—Sal. 37:5; 2 Kor 1:11.

6. Nahoana no manova ny fiheverantsika ny hafa ilay hoe mivavaka ho an-dry zareo? (1 Petera 3:8)

⁶ Hanampy antsika hahay ‘hangoraka’ ny mivavaka ho an’ny hafa. (Vakio ny 1 Petera 3:8.) Ny hoe mangoraka dia midika hoe mahatsapa ny fijalian’ny hafa sady te hanamaivana an’ilay izy. (Mar. 1:40, 41) Hoy ilay anti-panahy atao hoe Michael: “Rehefa mivavaka momba an’izay ilain’ny hafa aho, dia lasa tsapako kokoa ny manjo azy. Vao mainka aho tia an-dry zareo noho izany. Mahatsapa ho akaiky kokoa an-dry zareo aho, na dia mety tsy ho fantany aza izany.” Niresaka ny soa azony koa ilay anti-panahy atao hoe Richard. Hoy izy: “Vonona kokoa hanampy olona iray isika rehefa mivavaka ho azy. Rehefa manao zavatra hanampiana an’ilay olona isika avy eo, dia hoatran’ny hoe mandray anjara amin’ny famaliana an’ilay vavaka nataontsika ho azy.”

7. Nahoana no tsy hifantoka be amin’ny olana mahazo antsika isika raha mivavaka ho an’ny hafa? (Filipianina 2:3, 4) (Jereo koa ny sary.)

⁷ Tsy mifantoka be amin’ny olana mahazo antsika isika rehefa mivavaka ho an’ny hafa. (Vakio ny Filipianina 2:3, 4.) Miatrika olana isika rehetra satria samy miaina eo amin’ny tontolo iray fehezin’ny Devoly. (1 Jaona 5:19; Apok. 12:12) Raha zatra mivavaka ho an’ny hafa àry isika, dia ho tadidintsika foana ilay hoe ‘ampijalina toy izany koa ny rahalahintsika rehetra.’ (1 Pet. 5:9) Hoy ilay mpisava lalana atao hoe Katherine: “Rehefa mivavaka ho an’ny hafa aho, dia lasa tadidiko hoe mba miatrika ny mafy koa ry zareo. Mahatonga ahy tsy hifantoka be amin’ny olana mahazo ahy izany.”

MILA NY VAVAKA ATAONTSIKA RY ZAREO

8. Iza, ohatra, no azontsika resahina amin’ny vavaka?

⁸ Iza no azontsika resahina amin’ny vavaka? Afaka mivavaka ho an’olona amin’ny fitambarany isika, ohatra hoe ny marary, ny tanora esoesoin’ny mpiara-mianatra aminy na taominy haditra, na ireo manana olana satria mandroso taona. Betsaka koa ny mpiara-manompo enjehin’ny fianakaviany, na enjehin’ny fanjakana. (Mat. 10:18, 36; Asa. 12:5) Misy indray tsy maintsy miala amin’ny tranony noho ny korontana ara-politika. Dia eo koa ireo tratran’ny loza araka ny natiora. Mety tsy ho fantatsika akory ireny rahalahy sy anabavy ireny. Rehefa mivavaka ho an-dry zareo anefa isika, dia mampiseho fa manaraka an’ilay baikon’i Jesosy hoe: “Mifankatiava ianareo.”​—Jaona 13:34.

9. Nahoana isika no tokony hivavaka ho an’ireo mitarika eo anivon’ny fandaminana sy ny vadin-dry zareo?

⁹ Afaka mivavaka ho an’ireo rahalahy mitarika eo anivon’ny fandaminan’i Jehovah koa isika. Anisan’izany ny Filan-kevi-pitantanana sy ny mpanampy azy, ny Komitin’ny Sampana, ny mpiandraikitra sampan-draharaha ao amin’ny sampana, ny mpiandraikitra ny faritra, ny anti-panahy, ary ny mpikarakara fiangonana. Maro amin’izy ireny no manana ny olany manokana nefa mbola miezaka manampy antsika foana. (2 Kor. 12:15) Hoy ny mpiandraikitra ny faritra iray atao hoe Mark: “Anisan’ny tena mafy amiko ilay hoe lavitra an’i Dada sy Neny. Efa zokiolona mantsy ry zareo sady marary. Marina hoe efa mikarakara an-dry zareo ny anabaviko sy ny vadiny, kanefa mampalahelo ahy ilay izaho tsy tena afaka manampy an-dry zareo mivantana.” Tokony hivavaka foana ho an’ireny rahalahy miasa mafy ireny isika na fantatsika ny zavatra mampiady saina an-dry zareo na tsia. (1 Tes. 5:12, 13) Afaka mivavaka ho an’ny vadin-dry zareo koa isika. Tena manohana ny vadiny mantsy ireny anabavy ireny, dia lasa afaka manao ny andraikiny ireo rahalahy.

10-11. Mampifaly an’i Jehovah ve ny vavaka ataontsika ho an’ireo rahalahy sy anabavy amin’ny fitambarany? Hazavao.

¹⁰ Hitantsika teo hoe matetika isika no mivavaka ho an’ireo rahalahy sy anabavy amin’ny fitambarany. Afaka miangavy an’i Jehovah, ohatra, isika mba hanampy an’ireo migadra na hampionona an’izay nidonam-pahoriana, na dia tsy misy olona manokana tonga ao an-tsaintsika aza. Izao no nolazain’ilay anti-panahy atao hoe Donald: “Tena be dia be ny rahalahy sy anabavy miatrika zava-tsarotra, dia manao vavaka amin’ny ankapobeny isika indraindray amin’izay mba tafiditra ao daholo izay miatrika ny mafy.”

¹¹ Mampifaly an’i Jehovah ve ny vavaka hoatr’izany? Mazava ho azy! Isika rahateo tsy mahalala ny zavatra tena ilain’ny mpiara-manompo rehetra. Mety àry raha manao vavaka ho an’ireo rahalahy sy anabavy amin’ny fitambarany isika. (Jaona 17:20; Efes. 6:18) Ny vavaka hoatr’izany koa no manaporofo hoe ‘tiantsika ny rahalahy rehetra.’​—1 Pet. 2:17.

AHOANA NO ATAO REHEFA MIVAVAKA HO AN’OLONA MANOKANA?

12. Nahoana no ho voafaritra kokoa ny vavaka ataontsika raha mahay mandinika isika?

¹² Mahaiza mandinika. Tokony hivavaka ho an’olona manokana koa isika, ankoatra an’ilay hoe mivavaka ho an’ny mpiara-manompo amin’ny fitambarany. Mety hotononintsika mihitsy aza ny anarany. Misy manana aretina mitaiza ve, ohatra, ao amin’ny fiangonanareo? Sa misy tanora kivy satria teren’ny mpiara-mianatra aminy haditra? Misy ray na reny tokan-tena ve ao, ary miady mafy izy mba hitaiza ny zanany “araka izay anatra omen’i Jehovah sy izay atorony”? (Efes. 6:4) Vao mainka ho tia sy hangoraka ny hafa ianao raha mahay mandinika. Handrisika anao hivavaka ho azy izany.b​—Rom. 12:15.

13. Inona no hanampy antsika hivavaka ho an’ny olona mbola tsy fantatsika?

¹³ Tonòny ao anaty vavaka ny anarany. Azonao atao an’izany na dia ny olona mbola tsy nihaona taminao mihitsy aza. Saintsaino, ohatra, ireo rahalahy sy anabavy migadra any Crimée, Érythrée, Rosia, Singapour, ary any an-tany hafa. Azonao jerena ao amin’ny jw.org ny anaran’ireny mpiara-manompo ireny.c Hoy ilay mpiandraikitra ny faritra atao hoe Brian: “Nosoratako tamin’ny taratasy ny anaran’ny mpiara-manompo iray migadra, dia avy eo vakiko amin’ny feo avo ilay izy. Izany no manampy ahy hitadidy sy hiresaka momba an’iny olona iny rehefa mivavaka aho.”

14-15. Inona no hanampy antsika hanao vavaka voafaritra tsara?

¹⁴ Manaova vavaka voafaritra tsara. Hoy i Michael, ilay voaresaka terỳ aloha: “Rehefa mamaky ny tantaran’ireo rahalahy migadra ao amin’ny jw.org aho, dia miezaka misaintsaina hoe inona ho tsapako raha izaho no teo amin’ny toerany. Fantatro hoe hanahy momba ny vadiko aho, dia tiako raha voakarakara tsara izy. Mahita zavatra voafaritra tsara hangatahina aho amin’izay, rehefa mivavaka ho an’ireo rahalahy manambady nefa migadra.”​—Heb. 13:3, f.a.p.

¹⁵ Hahita zavatra hafa horesahina koa isika, raha misaintsaina hoe hoatran’ny ahoana ny fiainan’ireny rahalahy migadra ireny isan’andro. Afaka mangataka, ohatra, isika mba ho tsara fanahy amin-dry zareo ny mpiambina, ary hamela an-dry zareo hanompo malalaka an’Andriamanitra ny tompon’andraikitry ny fonja. (1 Tim. 2:1, 2) Mivavaha koa mba hampahery ny fiangonana eo an-toerana ny ohatr’ireny rahalahy sy anabavy tsy mivadika ireny, na mba hahita ny fitondran-tena tsaran-dry zareo ny olona tsy Vavolombelona dia hihaino ny hafatra torintsika. (1 Pet. 2:12) Mazava ho azy fa azontsika ampiasaina koa ireo torolalana ireo rehefa mivavaka ho an’ireo mpiara-manompo miatrika fitsapana hafa isika. ‘Vao mainka isika hifankatia’ raha mahay mandinika, sy manonona ny anaran’ilay olona amin’ny vavaka, ary manao vavaka voafaritra tsara.​—1 Tes. 3:12.

MAHAIZA MANDANJALANJA

16. Inona no hanampy antsika hahay handanjalanja rehefa mivavaka? (Matio 6:8)

¹⁶ Hitantsika teo hoe mety hanova zavatra ny vavaka ataontsika. Mila mahay mandanjalanja koa anefa isika. Efa fantatr’i Jehovah ihany mantsy ilay zavatra resahintsika amin’ny vavaka, fa tsy hoe isika no mila mampahafantatra azy an’ilay izy. Tsy isika koa no handeha hanoro hevitra azy hoe ahoana no fomba tsara indrindra hamahana olana iray. Efa fantatr’i Jehovah ny zavatra ilain’ny mpanompony, na dia mbola tsy mahafantatra an’izany aza ry zareo. (Vakio ny Matio 6:8.) Dia maninona izany isika no tokony hivavaka ho an’ny hafa? Satria isika miahy an-dry zareo ankoatra an’ireo antony be dia be efa noresahina tato. Ny fitiavana no mandrisika antsika hifampivavaka. Faly koa i Jehovah rehefa mahita hoe manahaka ny toetrany ny mpanompony, izany hoe be fitiavana.

17-18. Hoatran’ny ahoana ilay hoe mivavaka ho an’ny mpiara-manompo? Hazavao amin’ny ohatra.

¹⁷ Na hoatran’ny hoe tsy manova zavatra aza ny vavaka ataontsika, dia hita avy amin’izy ireny hoe tia an’ireo rahalahy sy anabavintsika isika ary hitan’i Jehovah izany. Diniho ity ohatra ity: Andeha atao hoe manan-janaka mianadahy ny mpivady iray. Marary eo am-pandriana ilay ankizilahy kely. Miangavy an’ny dadany ilay zanany vavy hoe: “Dada ô! Eo mba ampio i Zoky! Marary be ange izy e!” Efa mikarakara ny fahasalaman’ilay zanany lahy ilay raim-pianakaviana. Tiany tsinona io zanany io, dia efa mitady an’izay hahasoa azy izy. Tsy maintsy hoe faly be anefa izy rehefa mahita fa tena miahy an’ilay anadahiny ilay zanany vavy, ka mitalaho aminy mba hanampy azy.

¹⁸ Hoatr’izany mihitsy no asain’i Jehovah ataontsika, izany hoe mifampiahy sy mifampivavaka. Rehefa manao an’izany isika, dia mampiseho hoe tsy tia tena fa tena miahy ny hafa. I Jehovah koa mahita an’izany. (2 Tes. 1:3; Heb. 6:10) Efa hitantsika teo koa fa mety hanova zavatra ny vavaka ataontsika. Aza hadinoina mihitsy àry ny mivavaka ho an’ny hafa.